भजनसंग्रह 13 - नेपाली नयाँ संशोधित संस्करण

सङ्कष्‍टमा प्रार्थना

सङ्गीत-निर्देशकको निम्‍ति दाऊदको भजन

¹ कहिलेसम्‍म, हे परमप्रभु? के तपाईं सधैँभरि मलाई बिर्सनुहुन्‍छ? तपाईंले आफ्‍नो मुहार मसँग कहिलेसम्‍म लुकाउनुहुन्‍छ?

² मेरो आत्‍मामा कहिलेसम्‍म मैले चिन्‍ता बोक्‍ने, अनि दिनहुँ मेरो हृदयमा शोक राख्‍ने? कहिलेसम्‍म मेरो शत्रु ममाथि प्रबल भइरहनेछ?

³ ममाथि निगाह गर्नुहोस्‌, र मलाई जवाफ दिनुहोस्‌, हे परमप्रभु मेरा परमेश्‍वर। मेरा आँखालाई ज्‍योति दिनुहोस्‌, नत्रता म मृत्‍युको निद्रामा पर्नेछु।

⁴ नत्रता मेरो शत्रुले भन्‍नेछ, “त्‍यसमाथि मैले विजय पाएको छु।” अनि म ढल्‍दा मेरा शत्रुहरू रमाउनेछन्‌।

⁵ तर मैले त तपाईंको अचूक कृपामा भरोसा राखेको छु। मेरो हृदय तपाईंको उद्धारमा रमाउँछ।

⁶ म परमप्रभुको स्‍तुति गाउनेछु, किनभने उहाँ मप्रति भला हुनुभएको छ।