भजनसंग्रह 129 - नेपाली नयाँ संशोधित संस्करणशत्रुहरूमाथि विजयको प्रार्थना यात्राको गीत 1 तिनीहरूले मेरो जवानीदेखि नै मलाई असाध्यै कष्ट दिएका छन्: इस्राएलले भनोस्: 2 तिनीहरूले मेरो जवानीदेखि मलाई असाध्य कष्ट दिएका छन्, तापनि तिनीहरू ममाथि विजयी भएका छैनन्। 3 हलीहरूले मेरो पिठिउँमा हलो जोते, र पिठिउँभरि लामा हलरेखाले कोरे। 4 तर परमप्रभु धर्ममय हुनुहुन्छ, र उहाँले दुष्टहरूका बन्धन छिनालिदिनुभएको छ। 5 सियोनलाई घृणा गर्नेहरू, सबै शर्ममा परून्, र हटेर जाऊन्। 6 तिनीहरू घरका धुरीमा भएको घाँसजस्तै होऊन्, जो बढ्न अघि नै ओइलाइहाल्छ, 7 र जसबाट घाँस काट्नेले एक मुट्ठी काट्न सक्दैन, र बिटा बाँध्नेले एक अँगालो पनि भर्न सक्दैन। 8 त्यताबाट भएर जानेहरूले कदाचित् नभनून्, “परमप्रभुको आशीर्वाद तिमीमाथि रहोस्! परमप्रभुको नाउँमा हामी तिमीलाई आशीर्वाद दिन्छौं।” |
Nepali New Revised Version © Nepal Bible Society 1997, 2006, 2009, 2012
Nepal Bible Society