Osịja 1 - BAIBULO INONGWA INUNU

¹ Aga go masyu aga Untwa ayobile kwa Hoseya unnya Beeri nkabalilo ka Uziya, Yotamu, Ahazi na Hezekiya aba bali banyafyale ba nkisu kya Yuda, kangi bo yope Yeroboamu, umwana gwa Yehoyashi, malafyale gwa kisu kya Israeli.

Unkasi gwa Hoseya palikimo na banabo

² Bo Untwa Kyala ikwanda itolo ukuyoba ku banya Israeli alinkuyobela mwa Hoseya alinkuti, “Buka ukege unkikulu Undogwe ukuti mwise mupape abana bamo aba bali bo yu nnabo ubulogwe. Namanga mo muno bambombile une abandu ba nkisu iki, apa bandekile une.”

³ Bunobuno Hoseya alinkumwega unkikulu uyu ingamu yake ali yo Gomora umwana gwa Dibulayimu. Bo bapapile umwana gwakwanda undumyana,

⁴ Untwa alinkumbula Hoseya alinkuti, “Umpege ingamu ya Yezerieli, buno pasyele panandi itolo po ndisa kuhabapo ukumfunda umalafyale gwa kisu kya Israeli pa nongwa ya bugogi iyi atulile Yehu umwisukulu gwake pabuyo bwa Yezerieli. Nsumwike pakubamala bosa aba nkikolo kya Yehu.

⁵ Bo ilisiku lila lifikile, nisakonanga ifilwilo fyosa fya banya Israeli nkikoga kya Yezerieli.”

⁶ Popapo Gomora alinkupapa umwana gwa bubili undindwana. Untwa alinkumbula Hoseya alinkuti, “Umpege ingamu ya Lo-ruhama, papo ndisakubagana kangi aba nnyumba ya Israeli nalinga ko kubaswa imbibi.

⁷ Loli nisakunangisya ulugano ku ba nnyumba ya Yuda. Une ne Ntwa Kyala gwabo nisakubapoka, loli ndisakubapoka nubwite nulubo pamo ubupinde, pamo ifalasi palikimo nabandu aba bikwitoga pa falasi.”

⁸ Bo Gomara andekisye amabele umwanake Undindwana alinkwenda nukuya nikifuba kangi, alinkupapa umwana uyungi undumyana.

⁹ Untwa alinkumbula Hoseya alinkuti, “Umpege ingamu iyi yikusanusya ukuti, ‘Bakaya bandu bangu,’ papo abanya Israeli bakaya bandu bangu, kangi nanine ngaya ne gwabo.”

Ukugomokela kwa banya Israeli

¹⁰ Abanya Israeli bisakoloka bisa kuya bo gu nsanga gwa munyanja ugu nayumo akabagila nukubala pamo ukupima. Lilino Kyala ikubabula ikuti, “Mukaya bandu bangu” loli akabalilo kikwisa apa isakuyobaga nanumwe ukuti, “Umwe muli bana ba Kyala umumi!”

¹¹ Abandu ba nkisu kya Yuda na ba nkisu kya Israeli bisakuya palikimo kangi. Bisakuyaga nundongosi yumoywene, po bisakuya bakabi kangi, bisakuya ba pamwanya nkisu kyabo. Naloli ilisiku lya Yezerieli lisakuya lisisya fiyo.