Luti 1 - BAIBULO INONGWA INUNU

¹ Iyolo fiyo, nkabalilo ka balongi, injala yagwile nkisu; popapo umundu yumo ugwa nkaya ka Betelehemu uyu afumile nkisu kya Yuda, alinkubuka ukwakupona nkisu kya Moabu palikimo nunkasi gwake, nabanake babili abanyambala.

² Ingamu ya mundu uyu ali yo Elimeleki, unkasi ali yo Naomi; ingamu sya banake babili bala, yumo ali yo Maloni, unnine ali yo Kiliyoni; abandu bababa bali banya Efrati aba nkaya ka Betelehemu, nkisu kya Yuda.

³ Balinkubuka ku kisu kya Moabu, balinkwakwitugala kulakula. Loli bo Elimeleki, undume gwa Naomi afwile, Naomi unkasi asyele mwene nabanake babili,

⁴ aba balyegile abakikulu ba kikolo kya Moabu, yumo ingamu yake ali yo Oripa, unnine ali yo Ruti.

⁵ Lelo bo bagonilepo ifyinja ukufwana kalongo, bosa bo babili balinkwenda nukufwa. Bunobuno unkikulu yula Naomi alinkuya nubufwilwe pabili, ubwa ndume nubwa banake.

Naomi palikimo na Ruti bikugomokela ku Betelehemu

⁶ Popapo Naomi palikimo nabakamwana bake babili, balinkusokamo nkisu kya Moabu, balinkugomokela ku kisu kya kumyabo, namanga bo akali ali nkisu kya Moabu, apilike ukuti Untwa Kyala abaketile nikisa abandu ba kikolo kyake, abapele imboto ya fyakulya.

⁷ Bunobuno Naomi nabakamwana bake babili balinkusamapo pa buyo ubu balipo, balinkwenda ubuhesya bwa kugomokela ku kisu kya Yuda.

⁸ Lelo bo bendilepo, Naomi alinkubabula abakamwana bake alinkuti, “Mwesa mwe babili lilino mugomokelege ku nyumba sya bannemwe; umwene Untwa Kyala yo ayege nipyana kumyinu umwe bo mumo nanumwe mwali nipyana ku bafwe bala na kumyangu bubo.

⁹ Umwene Untwa Kyala bapege umwe ulutengano nnyumba sya balume binu.” Bunobuno Naomi alinkubasaya nukulagana nabo, loli abene balinkulila fiyo; balinkumwamula Naomi balinkuti,

¹⁰ “Twemma, tukubukaga twesa kumyinu.”

¹¹ Lelo Naomi alinkubamua alinkuti, “Mma mwe banangu, gomoka, bukaga, ngimba yiyege nongwa ngi iya kubukila nanine? Ngimba ngali ndi nabana abangi munda mmyangu ukuti bo bise bayege balume binu?

¹² Gomokaga banangu, bukaga kumyinu, buno ngangele fiyo ukuti nje nabana abanyambala; apene linga nayobaga ukuti ndi nulusubilo, pope napapo linga negigwaga nkabalilo ka lilino aka ukuti mbape abana, po mwati mubagulile balungwe bakule?

¹³ Ngimba mukwitugalaga itolo mwe basita kwegigwa lelo? Mma, banangu, nilikisigwe nuntwalo unsito fiyo ukukinda ugwinu, indumbula yangu yikumbaba fiyo panongwa yinu umwe. Namanga Untwa Kyala asindile une inyuma, ikiboko kyake kisito pamyangu.”

¹⁴ Popapo abene balinkwinula ilisyu balinkulila fiyo kangi; bunobuno Oripa alinkulagana nagwe unna gwa ndume, alinkugomoka ukubuka kumyabo, loli Ruti alinkumumilila unna gwa ndume.

¹⁵ Umwene Naomi alinkumbula Ruti alinkuti, “Keta, umwinako agomokile kumyabo, na kwa Kyala gwake, nanugwe ubukege unkonge unnino.”

¹⁶ Loli Ruti alinkwamula alinkuti, “Komma ukufimbilisya une ukuti nguleke, pamo ukuti ndeke ukukukonga ugwe; namanga kuno kubuka ugwe, ko nanine nikubukaga, na apa kwakwitugalaga ugwe, po nanine nikwakwitugalaga; bope nabandu ba kumyako bo bikwakuyaga bandu bangu nanine; Kyala gwako, yo ikwakuyaga Kyala gwangu nanine.

¹⁷ Posa apa kwakufwilaga ugwe, po ngwakufwilaga nanine, kangi nisakusyiligwaga pamopene nanugwe. Nikufinga ulufingo lwa naloli nkyeni muNtwa Kyala gwako ukuti, Kyala abombe simo nanine linga nikwitika ukuti akandu kamo katupagulanie uswe, loli bwene bu bufwe bo bwise butupagulaniege.”

¹⁸ Lelo bo Naomi asiketile ukuti Ruti ipele gwesa itolo ukubuka nagwe, alinkusita nukuyobapo nasimo isingi.

¹⁹ Bunobuno bosa bo babili balinkusumuka ukubuka balinkwakufika nkaya ka Betelehemu. Lelo bo bafikile, akaya kosa kalinkunyomoka panongwa yabo; abakikulu balinkukolela balinkuti, “Kali uyu ayege yo Naomi?”

²⁰ Popapo umwene Naomi alinkwamula alinkuti, “Komma ukuti mungolelege iya Naomi, loli mutigi, Mara, namanga Untwa Kyala anyilikisye nifyakubaba ifisito fiyo.

²¹ Lula mbukege nali nafyo fingi, loli lilino Untwa Kyala angomolile kuno ku kaya ne nsalabala itolo. Mukungolela fiki ukuti Naomi, buno Untwa Umwenemaka gosa anyingisye mbutolwe, nukumbika mbukamandanigwa?”

²² Mo muno Naomi agomokile ukufuma ku kisu kya Moabu, pamopene na Ruti ugwa kikolo kya Moabu unkamwanake. Bafikile ku Betelehemu bo abandu bikwanda ukutondola ingano.