Jesaja 1 - BAIBULO INONGWA INUNU

¹ Uyu yo buku gwa nongwa isi sikuyoba nisya kisu kya Yuda nisya kaya ka Yerusalemu, isi Kyala ayobile nkisetuka kwa Yesaya unnya Amozi, nkabalilo ka Uziya, Yotamu, Ahazi, na Hezekiya, aba bali abanyafyale ba nkisu kya Yuda.

Kyala ikubakemela abandu bake

² Untwa Kyala alinkuyoba alinkuti, “Pilika, gwe kisu kya kumwanya, nanugwe gwe kisu kya pasi, mutegege imbulukutu kuli isi nikuyoba, mbapapile abana abanyambala mbakusisye, loli abene bansambukile une.

³ Ing'ombe yo yimmenye umwenenayo, yope nimbunda yikimenye ikipondo kyake kyakulilamo. Loli abandu bangu abanya Israeli bakammanya une, kangi batikusyagania nasimo.”

⁴ Mwe kikolo kya bandu abatulanongwa, mwe bandu aba biswile itolo na bubutulanongwa, mwe kikolo kya bandu abaniongafu umwe. Muli bana aba bikubomba isya mwalwe itolo. Mundekile Untwa Kyala, munsyokile umwikemo gwa Israeli, munsindile inyuma.

⁵ Nongwa yafiki mukulonda ukwendelela ukufundigwa apa mukali mukusambuka? Namanga mubinile untu gosa kangi indumbula syinu siyetile itolo.

⁶ Ukufuma ku njayo syinu nukwakufika kuntu, bukayamo ubukafu nabumo mmibili gyinu, loli bu bufulafu butupu nifilonda ifi finyekile, ifi nayumo umundu akabandamo nalinga ko kupinyamo ni bandeji pamo ukupakapo unkota.

⁷ Ikisu kipelile ukuya fisame, utwaya twinu tupile numoto; kangi abahesya bikupoka ikisu nukufyonanga fyosa bo mukuketa namaso; ndupyuto lwake kyonangike itolo bo ka kaya ka Sodomu.

⁸ Aba nkaya ka Zioni balekigwe bafwene itolo ninyumba ya bubinga, bali bo ki kitembe iki kili mungunda gwa mafilu, bo kikitembe kya kugonamo iki kili mungunda. Ukufwana itolo nakaya aka abalwa bwite bakasyungutile.

⁹ Linga Untwa Kyala gwa filundilo akatusyakisyeko bamo aba basyeleko, angali twafwanaga itolo nakaya ka Sodomu, kangi angali tukakindanapo nakaya ka Gomora.

¹⁰ Amupilikege isi Untwa Kyala ikuyoba mwe balagili ba nkaya ka Gomora! Amutegege imbulukutu ku lumanyisyo lwa Kyala mwe bandu ba nkaya ka Gomora!

¹¹ Untwa Kyala ikuti, “Ngimba amakemo ginu aga mukwikemesya kumyangu, kali gali nimbombo yafiki kuli une? Nikwite une namakemo ginu amokye aga ng'osi inyambala isi mukwikemesya, namafuta ga ifi mukwikemesya; ndikwikyela napanandi nilopa lya ngambaku, pamo ifya tung'osi, pamo ilopa ifya mbongo.

¹² Ywani uyu ikubabula ukuti mwisege nafyo bo mukwisa kumyangu une. Ywani ababulile ukwisa kukanyanga ulubingilo lwangu?

¹³ “Mungisa kwandisyaga ukwisa kangi kumyangu na makemo ginu aga itolo aga. Ifyakufukisya lyinu fyo kinyanyasi itolo kumyangu palikimo na si ngomano syinu isunguligwa, isya mwesi unsomoka, nisya basabata, ningomano syosa isi mukubungana. Ngabagila ukufikapo ukufisa ilyoyo pabuniongafu bwinu ubu mukubomba palikimo ningomano syinu isunguligwa.

¹⁴ Ifyaka lyinu fya pa mwesi unsomoka nifyaka ifingi ifisunguligwa fyo ngafigana napanandi; fili bo ki kitwalo kumyangu fingatesye une.

¹⁵ “Napa linga mukufugama bo mukwiputa nkyeni mmyangu ndisakuketako, nalinga mukwiputa inyiputo indali ndisakupilikaga mma, namanga amaboko ginu gapakele ilopa.

¹⁶ Amusugusule lelo muye belu; musosyemo nkyeni mmyangu imbibi syinu isi mubombile,

¹⁷ mumanyilege ukubomba inunu, musilondege bugolofu, mubatulege aba bikwangaliligwa, mubapakisyege abapina nukubayila abafwilwe.”

¹⁸ Untwa Kyala ikuyoba ikuti, “Oko, isaga lelo tuyobesanie; napa linga imbibi syinu siye ngesefu bo li lilopa nisakusipelaga ukuya nyelu bo lulufube, napapo linga siye nditu fiyo, loli nisakusipelaga ukuya swee itolo bo ga masapa.

¹⁹ Syene si syakuti, linga mukukonga isi nikubabula, po mukulyaga ifindu ifinyafu ifi ikisu kikubamekesya;

²⁰ loli linga mukumfuya une, mukusambuka, po lelo mwisakupyutigwaga nubwite, namanga sisisi syo njobile yuyune ne Ntwa Kyala.”

Akaya ka butulanongwa

²¹ Akaya ka bandu abasubiligwa lilino kipelile ukuya kaya ka balogwe; akaya aka bwalimo ubwanaloli, muno bwitugalaga ubugolofu lilino bulimo bu bugogi bwene.

²² Ikyuma kyinu kya siliva lilino kipelile minyolonyondo mwali bo bu bwalwa bwa mafilu, loli lilino monangike muli bo ga misi.

²³ Abanyafyale binu basambwike bipelile ukuya bamanyani ba mindu imihiyi, bosa itolo biganile ukwambilila ifya kuhongela kangi indumbula syabo silabile ku kufyabupe ifi bikwambilila.

²⁴ Bunobuno Untwa Kyala gwa filundilo, uyu yo Mwenemaka gosa, Kyala gwa Israeli ikuyoba ikuti, “Nikuya pakubabukisya imbibi umwe mwe balugu bangu, po lelo mutisa kwandisya ukundamya kangi.

²⁵ Nikuya pakubafunda umwe, nukwengulamo mmyinu amanyolonyondo kangi nukusosyamo mmyinu iki kikaya kyela kyene.

²⁶ Nikuya pakubagomokesyamo kangi abalongi kangi nabakubatalusya, bo mumo mwayilile ulutasi lula, panyuma po akaya kinu kisakuyobigwaga ukuti kaya kabugolofu nakabusubiligwa.”

²⁷ Akaya ka Zioni kisakubangigwa nubugolofu, palikimo nabandu aba bali mumo, aba linga bapindwike,

²⁸ Loli abandu aba basambwike nabatulanongwa bo isakubakonyolania bosa palikimo. Kangi aba bikundeka Untwa Kyala bisakupyutigwa bosa itolo.

²⁹ Namanga isoni sisakubakola panongwa yakubika indumbula syinu pa mipiki gya mpandapanda, gope namasyeto aga gali mmigunda gyinu gisakubakosyaga isoni.

³⁰ Buno mwisakufwanaga itolo bo gu mpiki gwa mpandapanda ugu amani gake gikuma, bo gu ngunda ugu nayumo atikonelelamo amisi.

³¹ Bo li lisu ili likupya linga akatulukila ka moto kakosisye, bunobuno abandu abamaka fiyo sisakubapyutaga si mbombo syabo imbibi, kangi atisakuyapo yumo ugwakulukanisya ulupyuto lwabo.