Esekyelị 1 - BAIBULO INONGWA INUNU

IKISETUKA KYA NSOLOLI UKUNANGISYA UBUKULUMBA BWA KYALA ( 1.1—7.27 ) Ikikota kya Kyala

¹ Nkyinja kya malongo matatu (30), mmwesi gwa buna, pisiku lya buhano mmwesi gulagula, bo une ndi nkati mbakoligwa pambali pa lusoko lwa Kebara, kumwanya kulinkwiguka po lelo ndinkukibona ikisetuka kya Kyala.

² Pisiku lya buhano ilya mwesi (nkyinja kya buhano ikya kukoligwa kwa malafyale Yehoyakini),

³ ilisyu lya Ntwa lilinkunyisila une ne Ezekieli umputi, unnya Buzi nkisu kya ba Kaladeya, pa bupipi nulusoko lwa Kebara, amaka ga Ntwa galinkunyisila.

⁴ Lelo bo ngetile, ndinkwaga umbelo unkulumba gukwisa ukufuma kululu, nibingu ilikulumba lisyungutiligwe nubwelu, mu moto ugu gwa mulikaga mwibingu lila kisita kuleka, nkati mmoto gula bwalimo ubwelu ubu bwabukukaga ukuti nkyela lwa kikuba.

⁵ Nkati mmoto gula kilikusokamo ikifwani kya fyabumi fina. Akabonekelo ka fyabumi fila kali bo bunobuno:

⁶ filinkuboneka ukuti bandu; ikya bumi fyosa fyali nifyeni fina kangi namapiko mana.

⁷ Amalundi gabo galinkugoloka itolo, ifitende fya nyayo fyafwene itolo nifyuga fya ngwata, filinkung'alika ukuti kyela fya kikuba iki bapyasisye.

⁸ Kusi kumapiko gabo, kumbafu syosa syo ibili fyali namaboko ukufwana na bandu. Ifyabumi fila fyali nifyeni namapiko,

⁹ agene amapiko gabo go gapalamasaniaga; ikya bumi fyosa bo kikwenda kilinkugoloka itolo fyeni kisita kusanuka.

¹⁰ Ifyene ifyeni fyabo fyali bo bunobuno: iki na iki fyali nifyeni fya mundu nkyeni, fyosa fyo fina fyali nifyeni ifi: ikyeni kya ngalamu fyali kubwa ku kililo, kangi ifyeni kya ngambaku fyali kubwa ku kimama kangi ifyeni kya swanga fyali kunyuma.

¹¹ Mo muno fyayilile ifyeni fyabo. Filinkugabalulila amapiko gabo mmwanya ikyabumi fyosa fyali namapiko mabili, ilipiko fyosa lilinkulipalamasya ilipiko lyakinine, bo kikupikilile namapiko gake go mabili. Ikyabumi fyosa kilinkugoloka itolo ukwenda ukubuka nkyeni;

¹² Kosa kuno umoyo gwabo gwalabilaga, ko fili nkulabila kuko, kisita kusanuka bo fikwenda.

¹³ Nkati mfyabumi fila mulinkuyamo akandu kamo aka kaliti moto gwa mababu ugu gukwaka, kangi kali bo gu moto ugu gukumulika, kalinkwendenda kuno na kuno nkati mfyabumi fila.

¹⁴ Ifyene ifya bumi fila filinkwenda namaka bo yi njasi, ukulabila kunyuma na nkyeni.

¹⁵ Bo nikuketa pa fyabumi fila, ndinkuyibona iwilu na kisu iyi yali pambali pa fya bumi fila, ikya bumi fyosa silinkuya niwilu mumbali mmyake.

¹⁶ Ukuboneka kwake iwilu sila silinkufwana ibwe ili likumulika; gosa mana galinkufwana itolo muno gabombeligwe galinkufwana itolo iwilu fyosa lilinkwingililana ni nine.

¹⁷ Apa linga fikwenda filinkulabila kosakosa itolo kumbali syo ina kisita kusanuka kangi bo fikwenda.

¹⁸ Iwilu syo ina sila silinkuya ni rimu kangi nisipoko, irimu syosa syo ina sili nkuya namaso ukusyungutila kosakosa.

¹⁹ Apa linga ifya bumi fila fikwenda, iwilu sila silinkwendela lumo nafyo, kangi apa linga ifyabumi fila fikufyuka ukufuma pakisu, iwilu sila silinkufyukila lumo nafyo.

²⁰ Kosa kuno umoyo gwabo gwafilabikisyaga ko filinkulabila kuko, iwilu silinkufyukila lumo nifyabumi fila namanga ubumi bwa fya bumi fila bwali mu wilusila.

²¹ Apa linga ifyabumi kimo kyandile ukwenda ifinine fyope filinkwenda, apa linga kimo kyimile fyope nifinine filinkwima; kangi apa linga ifya bumi fila fikusumuka ukufyuka pakisu, iwilu silinkufyukila lumo nafyo, namanga ubumi bwa fyabumi fila bwali mu wilu sila.

²² Ifyabumi fyosa pantu palinkufwana palipo umwela ugu gwang'alikaga ukuti libwe ilyelu, go gulinkubaluka pamwanya pa mitu gyabo.

²³ Kusi kumwela gugugu ifyabumi fila filinkubalula amapiko gabo, agene amapiko gala go galinkupalamasania, bo ikyabumi fyosa kikingile namapiko mabili.

²⁴ Lelo bo ifyabumi fila fikwenda, ndinkupilika akogo ka mapiko gabo, kalinkufwana kogo ka misi aga gikobela, kangi kulinkufwana kutayanika kwa Mwenemaka gosa; kalinkufwana kogo ka njwego gwa balwa bwite. Bo fyimile ifyabumi fila, filinkugahobola amapiko gabo.

²⁵ Popapo ndinkupilika ilisyu lilikufuma mmwela pamwanya pa mitu gyabo, bo ifyene fyimile nukugahobola amapiko gabo.

²⁶ Pamwanya pa mwela ugu gwali pamitu gyabo, palinkuyapo lumo iki kyaliti kikota kya bunyafyale, kilinkuboneka ukuti libwe ilipala ilya Safiri; pa kikota kilakila po alitugesyepo yumo uyu aliti ali mundu.

²⁷ Muno abonekelaga ukufuma munsana nukufyuka alinkubukuka ukuti kikuba, bo mumo gukubonekela umoto ugu gusyungutiligwe; kangi ukufusa munsana ukwikilila pasi, gulinkufwana moto gukuboneka, ulumuli lulinkunsyungutila Umwene.

²⁸ Lulinkufwana ipingafula ili likuboneka mwibingu pakabalilo kafula. Mo muno kyayilile ikisetuka kya bukulumba bwa Ntwa. Lelo bo nkibwene ikisetuka iki, ndinkugwa ubukupama, po lelo ndinkupilika ilisyu lya mundu uyu ayobaga.