Abalagilị 1 - BAIBULO INONGWA INUNU

Abankikolo kya Yuda nikya Simeoni bikunkola Adonibezeki

¹ Lelo bo afwile Yoswa, abanya Israeli balinkunsuma Untwa Kyala balinkuti, “Kali kyo kikolo kiliku nkati mmyitu iki kyo kisa kutalangapo ukwakulwa ubwite nabakikolo kya Kanani?”

² Untwa Kyala alinkubamula alinkuti, “Abakikolo kya Yuda bo bikwakutalangapo ukulwa nabo, une nikuya pakukibika ikisu mmaboko gabo.”

³ Popapo abankikolo kya Yuda balinkubabula abamyabo abakikolo kya Simeoni balinkuti, “Oko, tubukege twesa ku kisu iki Untwa Kyala atupele, ukuti tukalwege na bakikolo kya baKanani; nanuswe twisakubukaga nanumwe ku kisu iki Untwa Kyala abayabile umwe.” Popapo abankikolo kya Simeoni balinkubuka pamopene nabinabo.

⁴ Abene abakikolo kya Yuda balinkubuka ukwakulwa ubwite, popapo Untwa Kyala alinkubatula, balinkwenda ukubatola abankikolo kya Kanani nikya Perizi, balinkubagogapo abandu aba elifu kalongo (10,000) pa buyo bwa Bezeki.

⁵ Palapala po balinkulwa ubwite numalafyale Adonibezeki, balinkwenda nukuntola, balinkubatola bope na bakikolo kya baKanani nikya ba Perizi.

⁶ Umwene Umalafyale Adonibezeki alinkubopa, popapo balinkunkonga, balinkwakunkola, balinkutumula inyobe isya nna isya mmaboko na mmalundi.

⁷ Umwene Adonibezeki alinkuyoba alinkuti, “Abanyafyale amalongo mahano na mabili (70) aba batumwile inyobe sya nna isya mmaboko na malundi bo aba basalaga utumenya utu twagwaga pasi bo une nikulya ifindu. Kyala ambombile une isi bo mumo nanine nababombile.” Balinkuntwala Adonibezeki ku Yerusalemu, alinkwenda nukufwila kuko.

Abakikolo kya Yuda bikukatola akaya ka Yerusalemu na ka Hebroni

⁸ Abakikolo kya Yuda balinkwakulwa ubwite naba nkaya ka Yerusalemu naka Hebroni, balinkwenda nukupoka akaya kala, balinkubagoga abenekisu nulubo kangi nukukosya numoto akaya kabo.

⁹ Panyuma po abakikolo kya Yuda balinkwikilila ukwakulwa ubwite nabakikolo kya baKanani aba bitugalaga nkisu kya mfyamba kulubafu lwa kwitongo na nkisu kya Ntebela.

¹⁰ Balinkubuka kangi ukwakulwa na bakikolo kya baKanani aba bitugalaga nkaya ka Hebroni. (Pabwandilo Hebroni abilikiligwaga ingamu ya Kiriati-araba); popapo balinkwenda nukubatola abafikolo ifi, Sheshayi, Ahimani nikya Talamayi.

Otanieli ikukatola akaya ka Debiri

¹¹ Ukufuma kula abanya Israeli balinkwenda nukwakulwa naba nkaya ka Debiri, aka pabwandilo ingamu yake ali yo Kiriyatiseferi.

¹² Kalebu alinkuyoba alinkuti, “Uyu linga alwile naba nkaya ka Kiriyatiseferi lelo abatolile, yo nisakumpa umwanangu undindwana Akisa, ukuti ayege nkasi gwake.”

¹³ Popapo Otanieli umwana gwa Kenazi, uyu ali yo nnuguna gwa Kalebu, alinkwakupoka akaya kala, bunobuno Kalebu alinkumpa umwanake undindwana uyu ingamu yake ali yo Akisa, ukuti ayege nkasi gwake.

¹⁴ Unkikulu yula bo isile, Otanieli alinkumfimbilisya ukuti akasume ungunda ku gwise Kalebu. Akisa alinkusuluka pa mbunda yake, umwene Kalebu alinkundalusya alinkuti, “Ngimba kulonda ukuti ngupe fiki?”

¹⁵ Umwene alinkwamula alinkuti, “Ngusuma ikyabupe, namanga unjabile une ikisu kya kwitongo, lelo natigi umbepo na fi fisiba fya misi.” Popapo Kalebu alinkumpa Akisa ifisiba fya mbwalulu na mbwitongo.

Ubutoli bwa bakikolo kya Yuda nikya Benjamini

¹⁶ Aba nkikolo kya Keni unko gwa Mose balinkufyuka palikimo naba kikolo kya Yuda ukufuma nkaya ka Yeriko aka mipiki gya tugindwa, ukwakufika mmatengele ga nkisu kya mwa Yuda, kwitongo kubupipi na kaya ka Arada; ukufuma palapala balinkwakwitugala nkati mbakikolo kya Amaleki.

¹⁷ Aba kikolo kya Yuda palikimo na bankikolo kya Simeoni, balinkulwa naba nkikolo kya baKanani nkaya ka Zefati, balinkubapyuta bosa, yo nongwa iyi akaya kala kalinkubilikiligwa ingamu yakuti, Horoma.

¹⁸ Aba nkikolo kya Yuda balinkupoka akaya ka Gaza palikimo nikisu iki kikasyungutile, kangi nakaya ka Ashikeloni, palikimo nikisu iki kikasyungutile; balinkupoka nakaya ka Ekroni, nikisu iki kikasyungutile.

¹⁹ Untwa Kyala alinkubatula abakikolo kya Yuda, popapo balinkupoka ikisu kya fyamba, loli balinkusita nukubakagamo abenekisu aba bali mu ntebela, namanga bali namagereta ga fyela. Balinkumpa Kalebu akaya ka Hebroni,

²⁰ bo mumo Mose ayobile; umwene Kalebu alinkubakagamo abana ba Anaki batatu.

²¹ Abene abakikolo kya Benjamini bo balinkusita nukubakagamo aba kikolo kya Yebusi, abandu aba bikwitugala mu Yerusalemu na ku lilino kuno.

Aba kikolo kya Efraimu bikubatola aba nkaya ka Beteli

²² Aba nkikolo kya Yosefu balinkulwa ubwite naba nkaya ka Beteli, umwene Untwa Kyala alinkubimila.

²³ Balinkutuma abatendesi nkaya ka Beteli, aka mbwandilo batigi Luzi ingamu.

²⁴ Balinkumbona umundu ikusoka nkaya, balinkundalusya balinkuti, “Utunangisye injila yakwingilila nkaya aka, tutisakukubombela nasimo imbibi, palikimo nabannyumba yake.”

²⁵ Popapo alinkubanangisya muno babagile ukwingilila nkaya kala, po lelo abene balinkubagoga abandu bosa nulubo alinkupona mwene yu mundu yuyuyu pamopene naba nnyumba yake bosa.

²⁶ Umundu yula alinkwakwitugasya nkisu kya baHiti, alinkuyenga akaya, alinkukapa ingamu ya Luzi, iyi yo ngamu yake na ku lilino kuno.

Abandu aba bakagigwe nabakikolo kya Manasi nikya Efraimu

²⁷ Abakikolo kya Manasi bakabakagilemo abenekisu ntwaya utu: Betesheani, Taanaka, Dori, Ibuleyamu na Megido, pamopene nutwaya tosa utunandi utu tukasyungutile akaya kosa, abakikolo kya baKanani balinkwendelela ukwitugala mumo.

²⁸ Bo aba Israeli babakindile amaka abakikolo kya baKanani, balinkubingisya pa mbombo iyi babafimbilisyaga itolo, balinkusita nukubakagilamo ngani nkisu kila.

²⁹ Aba kikolo kya Efraimu balinkusita nukubakagamo aba kikolo kya baKanani aba bitugalaga nkaya ka Gezeri, balinkubaleka ukuti bitugalege palikimo nabo.

³⁰ Abakikolo kya Zebuloni balinkusita nukubakagamo abakikolo kya ba Kanani aba bitugalaga nkaya ka Kitironi naka Nahaloli; balinkwitugala mumo balinkubapela ukuya babombi babo pambombo iya kufimbilisya.

³¹ Abakikolo kya Asheri balinkusita nukubakagamo abandu aba bitugalaga ntwaya utu: Ako, Sidoni, Akiziba, Helebe, Afiki na Rehobo.

³² Abakikolo kya Asheri balinkusita nukubakagamo abakikolo kya baKanani balinkwitugala nabo. Balinkubaleka itolo ukwitugala palikimo nabo.

³³ Abakikolo kya Nafutali balinkusita nukubakagamo abakikolo kya Kanani, abenekisu aba bitugalaga ntwaya twabo, aba nkaya ka Betishemeshi na ka Betanati, balinkwitugala itolo nabo, loli balinkubapela ukuya babombi babo pa mbombo ya kufimbilisya.

³⁴ Abakikolo kya ba Amori bo balinkubakagila ku fyamba abakikolo kya Dani, balinkusita nukubitikisya ukwikilila muntebela.

³⁵ Abene aba kikolo kya ba Amori balinkwendelela ukwitugala ntwaya utu; Hara-heresi, Aiyaloni na Shalabimu. Loli aba kikolo kya Yosefu bo balinkuya ba maka ukubakinda aba kikolo kya ba Amori bunobuno balinkubafimbilisya ukuya babombi babo.

³⁶ Ugwene umpaka gwa kisu kya ba Amori go gwalyandile pa bufyukilo bwa kamba ka Akarabimu, gulinkwakukisania nkaya ka Sela.