Vilipai 4 - V'nen P'as iv'i Turanien Trtarep' m'a Turanien M'dah

¹ Laha, tv'alk, nlap'as a kam'i karn nam'er a ti p'ela kam'i, karn ip'as nakl sanam'i, kvv'i manu p'asak. Sena si lera, tv'alk la nlap'as a kam'i ha, pavp'tir ipahua aranan a Mlin Lilad ipanap'i lera.

Pavp'lt arna v'ahien iamk kavrn ipap'as aranan a Mlin Lilad

² Nmiman ihua an a Iutia, kamima ihua an a Sintiki, a ti aparp'lt arna v'ahienar aranan a Mlin Lilad.

³ Aau, nakm ml, kv'i tv'alk dau arna parei, nmiman anh ihua ml, nakm pasr lm'ar tav'et la avm'akar m'a kana arna pari na v'nen p'as ra, kavm'akar m'er a Klemen m'er tv'alk ururaur arna parei, la nahar itater sarei arna puk na silv'ien ha.

⁴ Pavrn ipap'as aranan a Mlin Lilad ipel. Nvri ml, kam'i pavrn ipap'as.

⁵ Pavv'iv'en a nelnal a ti kvv'i m'ertu v'len. Ikap'arei a Mlin Lilad ipama.

⁶ Mavv'ah par a si kinkin, v'eti arna si udlani pavtu tamat kavmiman sei an Atua ipahua kavvr ip'as ani kavvr si udlani kvrni an Atua.

⁷ Laha, tamatan Atua la ip'as kasiv' si udlani nvrndaui ha, ipauada nlm'i m'a v'ahienam'i aranan a Kristu Iesu.

Pavv'ahur si p'as udlani uaki

⁸ Itauatah ml, tv'alk, pavv'ahur si udlani iviviln a v'nen dau, si udlani isapa p'kl p'as, si udlani iviviln, si udlani ilvlvar, si udlani ip'eset, m'a si udlani nelnal avvr ti ip'as. Pavv'ahur si p'as udlani m'a sei iviviln a ti apapatei.

⁹ Nrn ti pavan si udlani ntv'iv'en sarei a kam'i, m'a si udlani ktvlev' sarei asnk, katvrn sarei asnk katvla sera ti nani. Laha, Atua na tamat ipaliak asnm'i.

A Pul ivr ip'as anr sena ti avsr lm'an naran der iari

¹⁰ Laha, nrn ip'as istudau kapatei a Mlin Lilad, sena ti hilaha kvv'iv'en ti kvv'ahur kana ml. Aau, tituei kvv'ahur kana nakl, v'eti navanel na ti pavv'iv'ani ihei.

¹¹ Navr si lera sena ti naiak a si kinkin, sena ti Atua itv'iv'en sarei a kana ti p'ern ipap'as uaki arna si udlani ier kana.

¹² Ntrndu sera navanel na ti p'eiak a sei ipasusupa uaki, katrndu sera navanel na ti p'eiak a sei ipastudau. Arna naran udlani, arna si udlani, ntrndu sera navanel na ti p'ern ipap'as. Ipavr ti p'apd, v'aha p'ern nam'er, v'aha ipavr ti siak ipastudau, v'aha ipavr ti siak ihei, nrn ip'as nakl.

¹³ Nrndu ti p'en si udlani arna nut huan a Kristu la iani ti nhua ha.

¹⁴ V'eti kam'i kvan si p'as, sena ti kvsr lm'ak naran der ier kana.

¹⁵ Kam'i, kvv'i m'ertu a Vilipai, kvrndu ti naran nvrp'ep'a v'nen p'as itauamu, naran nln nut a Masetunia, sas uraur kinkin iasr lm'ak katu si kinkin a kana, v'aha kalev' si kinkin, v'eti kam'i uaki.

¹⁶ Sena ti naran nlak a Tesalunaika, laha kvtep'a si kinkin kavsr lm'ak. Kvan si lera nakl.

¹⁷ Iav'i sena ti nrn ti pavtu sei a kana, v'eti nrn ti nava pari p'asam'i ipastudau arna silv'ienam'i.

¹⁸ V'eti kana niak a si udlani, siak istudau. Narn nam'er a si kinkin ml, sena ti Epavrutaitas itu kana si udlani kam'i kvtap'ei ima asnk. Si lera inep'a sida p'as, m'in ip'eset, iv'i sei kvtau an Atua. Irn ip'as ani istudau.

¹⁹ V'eti Atuak ipatu si udlani ipaviviln a kam'i, ipadan arna si p'sp'asan udlani, sena ti kvp'lt m'ei a Iesu Kristu.

²⁰ Laha, nahan Atua, iv'i a Tetiad, ipav'a eia dav'a dav'a ikahiris naran, Amen.

A Pul ivr ip'as anr udlani

²¹ Pavvr ip'as anr m'ertuan a Kristu Iesu udlani. Artv'alk avlak m'a kana avvr ip'as a kam'i.

²² M'ertuan Atua udlani avvr ip'as a kam'i. M'ertu la avm'akar al nmaha kavman lil a Rum ha, avrni mau a ti apavvr ip'as a kam'i.

²³ Nrn ti vtmienan a Mlin Lilad a Iesu Kristu ipater asnm'i udlani, Amen.