Usia 14 - V'nen P'as iv'i Turanien Trtarep' m'a Turanien M'dah

!U Isrel, pam'alet!

¹ U Isrel, pam'alet asn a Mlin Eia, iv'i Atuam. Sena ti nakm kttitihap'el sarei sena si stu lilam.

² Arm'ertu, pavandedp' v'nen ipamk, sarei kavm'alet asn a Mlin Eia. Pavvr ani, kavvr ti a, “Palev'la si stu lilam'em' udlani. Palap'as a kam'em' kam'ahu a ti p'vmima asnm, sena ti kam'em' p'vtu sakrivais anh, nvvr anh hilaha.

³ Asiria ikalev'la kam'em' arna der. Kam'em' mkavvrvr arna hus, aau, mkavv'ana ml m'a sei nvani m'a lm'am'i, kavvr ti a, ‘Kam'i kvv'i atuam'em'.’ Sena ti m'ertu, la a tetian ihei ha, ipapasla ti nakm krn istu ani.”

⁴ Sarei, Atua iv'ana, kavr ti a, “Kana p'emhmah anr sena ti atvrarsm'alet sarei. Kana p'elap'as anr, nkatukari, sena ti nl rerak itav'a sarei a nadep', aau, itruh sarei asn a Isrel.

⁵ Kana p'enep'a sera niu asn a Isrel. Hin ipama kalil kanep'a sera plaua p'as, avr ti iv'i lili. Laha, uarn apavp'arei, kavnep'a sera uar nai a Lepanun.

⁶ Ranan apavrama kavp'eriet. Laha, ipap'eset kanep'a sera nai iv'i uliv. Laha, m'in ipap'as kanep'a sera m'i nut a Lepanun.

⁷ Arm'ertu, la avlak a nv' m'lkn ha, apavm'alet ml. Apavrama kavp'as arna silv'ienar kavnep'a sera uit. Apavrama kavp'arei kavnep'a sera nahau al pitvet. Sarei, m'ir ipanep'a sera m'i naui m'iel a Lepanun.

⁸ A Ivrem ipav'ana, kavr ti a, ‘?P'en v'ata ml m'er aitul laha?’ Ntv'rn sarei ani, katp'a sera sei iani nakl. Kana nnep'a sera nai m'dah, iv'i saipres, papasla navam aranak.”

⁹ ?Hin ak iak a v'ahien p'as? Iparndu mamh si laha nakl. ?Hin ak iv'ahur mamh sei? Iparndu si laha. Sena ti p'kln a Mlin Eia iviviln. Arm'ertu viviln apavv'el kavsapei, v'eti arm'ertu na si stu apavtitihap'el aranan.