Taniel 9 - V'nen P'as iv'i Turanien Trtarep' m'a Turanien M'dah

A Taniel itu tamat sanar m'ertu

¹ Arna pai itauamu na ti a Tarias, la iv'i a natn Ahasueras kav'i m'ertu a Mitia ha, iv'i mlin kap'aur v'anuar arm'ertu a Kaltia -

² aau, arna napn itauamu na ti iv'i mlin, kana, nv'i a Taniel, nrndu mamh v'nen iter al puk nakl. Laha, npasla v'nenan a Mlin Eia iamk, la iendan asn a Seremaia (iv'i pruvet) ha, ivrurr pai nakl. V'nen lera ivrur ti Atua ipani ti a Serusalem ipater kav'i v'anu stu pai ipanelsaru (70).

³ Inap'i lera, nlak arna nahn a Mlin Atua, aau, inep'a ti nlak kap'ei nakl, a ti p'emiman sei ani, a ti p'etu tamat kamiman sei. Laha, kana nahan tim'ah, nua klus iv'i selpak uaki, sarei katu tih nap' arna p'akk.

⁴ Laha, ntu tamat asn a Mlin Eia, iv'i Atuak, kavrp'ep'a si stuak, kavr ti a, “U Mlin Eia, Nakm kv'i Atua Lil, kav'i Atua apadedrn anh. Kv'i Atua kuada turanienan, karn istu anr m'ertu avlap'as anh, m'er arki la avan sei v'nen huam ivri nakl ha.

⁵ Kam'em' ntvan sera si stu, katvan sera sei iaviviln. Ntvan sera si stuet, aau, nvv'i pthua nakl. Ntvruh sarei arna sei atv'iv'en sarei, m'er v'nen hua attu sarei.

⁶ Kam'em' ndavv'rn a sei arm'ertu na m'akarienam, la avv'i pruvet ha, atvr sarei. Atvv'ana sarei arna nahm, katvv'ana m'er mlinam'em', m'er arm'ertu lililam'em', m'er a tetiam'em', m'er arm'ertu udlani arna v'anu.

⁷ U Mlin Eia, p'klm iviviln udlani, v'eti iviviln a ti mamihien ipater arna nahm'em', inep'a nut inap'ei dika laha. Sena ti kttp'ev' sarar arm'ertu a Suta, m'er arm'ertu avlak a Serusalem, m'ei arna v'anu a Isrel, arki avmima, m'er arki avlak v'iv'a au arna v'anu udlani, sena ti atvruh sarei asnm, katvan sera si stu kavmlanh.

⁸ U Mlin Eia, iviviln a ti mamihien ipater arna nahm'em', m'ei arna nahr mlinam'em', m'er arm'ertu lililam'em', m'er a tetiam'em', sena ti ntvan sera si stu kavmlanh.

⁹ Ntvv'i sera pthua, katvmlen sarei Atua, v'eti a Mlin Eia, iv'i Atuam'em', iv'i Hin la irn istu a m'ertu ha, aau, irn istu anr sena si stuar.

¹⁰ Ndavsapa drln a Mlin Eia, iv'i Atuam'em', a ti p'vv'el kavsapa v'nen huan, la ittu sarei a kam'em' ha, iv'i v'nen idan asnr m'ertu na m'akarienan, la avv'i pruvet ha.

¹¹ Aau, arm'ertu a Isrel udlani atvluvn sarei a v'nen huam, katvruh sarei asnm, a ti nkavsapa drlm. Sena si lera, v'nen iv'iv'en nl reran Atua, m'a turanien, la iter arna v'nen huan a Musis (iv'i m'ertu na m'akarienan Atua) ha, ithsran sera hin aranam'em', sena ti ntvan sera si stu kavmlen Atua.

¹² Laha, itv'iv'en sarei ti v'nenan iv'i v'nen dau, v'nen la itvrp'ep'a sarei a kam'em' m'er arm'ertu na v'nen hua, la avlak asnm'em' kavv'ana hua m'a kam'em' ha. Sena ti ittep'a sera der lil laha, iv'i der lil iamk ier a Serusalem, adamulalei a nv' p'knaran naran kinkin.

¹³ Inep'a nut atulul sarei arna v'nen huan a Musis inap'ei, der lil udlani laha itier sera kam'em'. V'eti kam'em' ndavtu tamat arna nahn a Mlin Eia, iv'i Atuam'em', a ti p'vvav kam'em', kavruh arna si stuam'em', kavrndu mamh v'nen duan.

¹⁴ Sena si lera, a Mlin Eia ituada sera der lil laha arna v'ahienan, katrp sera kam'em' m'ei, sena ti a Mlin Eia, iv'i Atuam'em', iviviln arna pari udlani iani, v'eti ndavan sei itvr sarei a kam'em'.

¹⁵ !U Mlin Eia, la kv'i Atuam'em' ha, nakm ktlev'la sarar m'ertuam dan a Itsip m'a lm'am, la ihuet ha, kten sarei ti arm'ertu atvrndu sarei ti kv'i Mlin Lil, inep'a nut inap'ei dika laha--v'eti hilaha, kam'em' ntvan sera si stu, aau, ntvan sera sei, la istu istudau ha!

¹⁶ U Mlin Eia, sena ti Nakm kviviln udlani, ntu tamat anh, pam'ahu a ti nl reram, aau, nl reram la ihua ihuadau ha, ipav'a a nadep', a ti mkarp v'anu lilam, iv'i a Serusalem, m'a ptha lilam. Sena ti arm'ertu udlani, la avlak mima asnm'em' ha, avsip'len v'anu lil a Serusalem m'er arm'ertuam, sena si stuam'em', aau, sena si stu lil hir a tetiam'em' atvan sarei.

¹⁷ Sena si lera, Nakm, la kv'i Atuam'em' ha, parn tamatan a m'ertu na m'akarienam, m'a sei kana nmimani. Pani ti nahm ipar arna nmah tamatam, la iter vn uaki, aau, pani a ti naham ipav'a eia.

¹⁸ U Atuak, pav'rn a sei kana nvri, aau, parn v'nenak. Paiela m'atam kala ti kam'em' nvlak arna der lil iamk, aau, kam'em' m'a v'anu lil, la kttu sera naham aranan ha. Sena ti navrama kavmiman sei asnm sena ti nvan pari viviln, ihei, iv'i sena ti Nakm krn istu a m'ertu nakl.

¹⁹ !U Mlin Eia, parn kam'em'! !U Mlin Eia, parn istu a kam'em' arna si stuam'em'! !U Mlin Eia, pav'rn a kam'em', sarei kan sei! Atuak, makanut--v'eti pavrpren kana, a ti naham ipav'a eia, aau, sena v'anu lilam, m'er arm'ertuam, la naham iter aranar ha.”

A Kepriel ivrp'ep'a si iamk ml

²⁰ Laha, naran nv'ana uam, katu tamat uam, kavrp'ep'a si stuak, m'a si stuar arm'ertu a Isrel, kamiman sei an a Mlin Eia iv'i Atuak, sena ptha p'asan Atuak,

²¹ aau, naran nv'ana katu tamat uam, dui nahan iv'i a Kepriel, la ntla sarei naran nm'atr kala sei arna naran itauamu ha, ima asnk. Atua iani ti itetv kadama ilahml sarei uaki. Sarei, ier kana naran iv'i knarev', arna naran na ti apatu uvrin an a Mlin Eia.

²² Laha, iv'iv'en sei a kana, kav'ana m'a kana, kavr ti a, “U Taniel, kana nma hilaha a ti parndu navanel a ti parndu sei.

²³ Naran kandinei ti patu tamat kamiman sei, Atua ivrp'ep'a v'nen hua iamk. Laha, kana nma a ti p'ev'ana m'ah, sena ti Atua ilap'as anh. Sena si lera, pav'ahur si laha, karndu mamh sei nakm ktla sarei.

²⁴ Attu sera uik inelsaru (70) sanar arm'ertuam, m'a v'anu lilam (la ip'eset ha), a ti si stu ipahiris, a ti apatavkarr si stu, a ti apullar m'ertu sena si stu lilar, a ti p'kl viviln (la ipater ipel ha) ipama, a ti akala sei ml (naran am'atr), a ti akarn v'nen ivrur sei idatu hin uam ml, aau, a ti apavisen ueil arna pt m'ertu ipamk, la nahan iv'i M'ertu P'as ha.

²⁵ Sena si lera, parndu si laha, aau, parndu mamahi. Ipatudina hin naran v'nen hua ipav'el kavrp'ep'a ti apan mamh v'anu lil a Serusalem, kahluri, dav'a ti a M'isaia (iv'i a Mlin) ipama, ipav'i uik ipasaru, sarei ipav'i uik ipanellm'sei pln iru (62) ml. Laha, apanur navanel ml, kahlur naml hua lil na v'anu. Aau, der ipaiak naran lera, v'eti apan parei lera uam.

²⁶ Sarei, naran uik inellm'sei pln iru (62) lera apavv'siau, apatrlei a M'isaia lera, v'eti ikav'i sena sei Hin iani. Sarei, arm'ertuan a mlin, la ipama uam ha, apavutakm a v'anu lil, m'a nmah tamatan Atua. Laha, naran itv'i ti ipahiris, ipanep'a sera uiniv' ipamk. Aau, ipatu hin dav'a ti naur lera ipahiris, aputakm a sei karp si udlani. V'nen hua ier si lera itater sarei.

²⁷ Sarei, ipan turanien ipamk m'er arm'ertu apavnelnal, ipav'i sena uik ipamk. V'eti, naran uik lera idav'siau sarei, ipani ti akataur sakrivais m'er uvrin ml. Laha, naran arm'ertu apavan si stu, la alep'lei ha, m'ertu ipamk ipama--ipanep'a ti ipatetv arna nil heiar si stu lera. M'ertu lera ipalev'la siar m'ertu nakl. Ipatu hin ipanap'i lera dav'a ti si udlani ipahiris. Aau, ipani ti m'ertu siar ikahei ml, sena ti attu sarei ti ipanap'i lera.”