Taniel 8 - V'nen P'as iv'i Turanien Trtarep' m'a Turanien M'dah

A Taniel ila sei ml, ila pua na sivsiv m'a nani

¹ Arna nitla pai na ti a Pelsasar iv'i mlin, nla sei ml. Aau, kana, nv'i a Taniel, nlei. Laha, sei nlei iuraur m'a nki ntla sarei itauamu.

² Laha, naran nla sei, nla ti nlak arna v'anu hua lil a Susan, la iter arna pruvins iv'i a Elam ha. Sarei, nla ti nlak a p'ak nauei a Ulai.

³ Laha, nklau eia, kala ti pua na sivsiv iamk ip'tir a pak nauei. Laha, pua na sivsiv lera kuman arru, laha, kuman arru lera arp'eriet. V'eti nki iamk ip'arei kasiv' tv'aln. Sarei, nki ip'arei ip'tir itauatah kasiv' tv'aln.

⁴ Laha, nla ti pua na sivsiv iv'el ihua kadav'a arna Ues, kadav'a arna Nut, sarei kadav'a arna Saut. Laha, si slm kinkin iarndu ti ipap'tir arna nahn. Si kinkin iarndu ti ipalev'la sei al lm'an. Ien sei hin uaki irn ti ipani, laha, ima kalilet.

⁵ Sarei, naran nv'ahur si lera, ilahml sarei, pua na nani ima dan arna Ues. Laha, iv'el kasiv' nadep' ka udlani, v'eti inep'a ti tln iaier nadep'. Laha, nani lera iak a kuma lil iamk, iter a p't nut na m'aten.

⁶ Sarei, ima asn pua na sivsiv, la kuman arru, la nlei ip'tir a p'ak nauei ha. Laha, ivrvr a ti ipamlani, aau, ivrvr m'a nut huan udlani. Laha nln irer istudau.

⁷ Laha, nla ti imlen pua na sivsiv lera. Nln irer istudau ani. Laha, iutakm a pua na sivsiv kakaprr kuman arru. Pua na sivsiv lera, nut huan ihei a ti ipap'tir arna nahn. Laha, israni a nadep', sarei kapasi a nadep'. Si kinkin ihei a ti ipalev'la pua na sivsiv al lm'an.

⁸ Sena si lera, pua na nani ima kalilet. V'eti naran ima kahuet, kuman lil lahara irdausi. Sarei, kuma lil arv'a avrama eia kavua m'lna nki iter itauamu. Laha, avv'el kavrav'a arna nut nalen arv'a (4) avdan nakl.

⁹ Sarei, kuma isusupa iamk idan asn kuma lil iamk. Kuma lera ima kalilet, kav'el kadav'a arna Saut, kadav'a arna Is, sarei kadav'a arna nut avr ti iv'i V'anu P'as.

¹⁰ Laha, ima kalil kaiarr m'rnur, la avlak arna p'knaran ha. Laha, inep'a ti isranr m'rnur lera kinkin, kasran msi kinkin a nadep', kapas tln aranar.

¹¹ Laha, iv'a ti ipukl hin kanep'a sarei a Mlin na m'rnur ha. Sarei, ilev'lar sakrivais, la arm'ertu avani arna napn udlani ha, kakapr nmah tamatan Atua.

¹² Sarei, sena si stu lera, m'rnur kinkin avp'lt m'a kuma lera, a ti apavmlanr m'ertu (la avrn ti apavan sakrivais arna napn udlani ha). Inap'i lera, ilev' v'nen dau, kasrani arna nadep'. Ien si lera udlani, v'eti ima kalil mau.

¹³ Sarei, nrn m'ertu p'as iamk iv'ana, sarei nrn m'ertu p'as uraur iv'ana m'a nki iv'ana itauamu. Laha, ivr ti a, “?Si laha (la iv'i sei alei ha) ipater ipaier v'aran--inep'a ti ivrurr sakrivais ataui arna napn udlani, kavrur si stu lil, la iutakm a sei ha, inep'a ti attu sarei a ti nutet m'er si p'sp'as (la avrater arna p'knaran ha) apavrater arna nadep' a ti apapasi a nadep'--aau, si lera ipater ipaier v'aran?”

¹⁴ Sarei, ivr a kana, kavr ti a, “Ipater napn ipav'i 2,300. Sarei, apasilelua nmah tamat.”

Ensel iamk, nahan iv'i a Kepriel, iv'iv'en sei an a Taniel

¹⁵ Laha, itu hin naran kana, nv'i a Taniel, ntla sera si lera, sarei nlak katala navanel a ti p'erndu sei ivri, ilahml sarei uaki, si iamk ip'tir asnk, inep'a ti alei kav'ah ti iv'i dui iamk.

¹⁶ Sarei, nrn drl dui iamk, idan a p't nut nar p'ak nauei a Ulai arna tv'eliel arru. Laha, iv'ana eia, kavr ti a, “Kepriel, pani ti dui laha iparndu mamh sei hin itla sarei.”

¹⁷ Inap'i lera, imima asn nut kana np'tir. Laha, naran imima asnk, ndedrn kadars arna nadep', nahk ier nadep'. V'eti iv'ana m'a kana, kavr ti a, “Net m'ertu, parndu mamh ti sei nakm ktla sarei ier naran na ti si udlani ipahiris.”

¹⁸ Laha, naran iv'ana m'a kana, nm'atr dul, nahk ier nadep'. V'eti ier kana m'a lm'an, kani ti nilaph kap'tir mamh.

¹⁹ Sarei, iv'ana, kavr ti a, “Palei, kana nv'iv'en anh sei ipatu hin arna napn ipatauatah, naran Atua nln iparer. Sena ti sei ipahiris arna naran Hin ittu sarei.

²⁰ Laha, pua na sivsiv, la ktla sarei ha, la iak a kuman arru hara--kuman arru lera arv'i armlin a Mitia m'ei a Pesia.

²¹ Sarei, pua na sivsiv iv'i v'anu a Kris. Kuma lil, la iter a p't nut na m'aten ha, iv'i mlinar, la iv'i nki itauamu ha.

²² Sarei, naran pav'ahur kuma, la irdausi ha, m'er kuman arv'a, la avp'tir kavua m'lna nki la iter itauamu ha, parndu ti apavv'i v'anu aparv'a (4), apavdan arna v'anu lera, v'eti nut huar ikalil kanep'a sera nut hua na nki iter itauamu.

²³ Sarei, arna naran na ti hir apavv'i mlin ipahiris, naran arm'ertu na si stu atvan sera si stu istuduet, mlin ipamk ipap'tir. Nahn ipani ti m'ertu apavdedrn. Iparndu mamh navanel a ti ipuha m'ertu kutakm anr.

²⁴ Nut huan ipalilet, v'eti ikav'i sena ti hin iv'i m'ertu hua. Iputakm a m'ertu, apadedrn ani ipastudau. Ipaiak a sei istudau, kadama kalilet. Iputakm anr m'ertu hua, kahiris anr. Sarei, ipani ipanap'i lera anr arm'ertu p'sp'as.

²⁵ Sena ti hin irndu ti ipasner m'ertu, ipani ti m'ertu apavhp'hap'il nakl naran iv'i mlin. Laha, ipukl hin arna nln. Iparp m'ertu lilil, kakap'nr. Aau, ipap'tir arna nahn a Mlinar mlin, kamlani. V'eti apakapri, ipars a nadep', v'eti m'ertu na nadep' ka ikaiari.

²⁶ Sarei, sei nakm ktla sarei, la ivrur lihat m'a m'etav'aran ha, aau, iv'i v'nen dau. Sena si lera, patutuan sei ktla sarei, sena ti v'nen lera ivrur naran ipatauatah dau.”

²⁷ Sarei, kana, nv'i a Taniel, np'k istu, sarei nm'at napn istudau. Dav'a, nilaph kan parian a mlin. Ntah istudau sena sei nlei, v'eti m'ertu kinkin iarndu ti ipavr ti iv'iv'en v'ata.