Taniel 7 - V'nen P'as iv'i Turanien Trtarep' m'a Turanien M'dah

A Taniel im'atr kala si dm arv'a

¹ Arna pai itauamu na ti a Pelsasar iv'i mlin a Papilun, a Taniel im'atr kala sei. Aau, ila sei arna v'ahienan, naran ilak arna piasan. Sarei, iulul a sei ilei, kavrur si lil ilei nakl.

² Laha, a Taniel iv'ana, kavr ti a, “Nla sei arna v'ahienak narn iv'i lihat. Laha, palei, nalen lilil, la avdan arna nut arv'a arna p'knaran ha, avuha Nata Lil, kavani ti nata ihua.

³ Sarei, si dm arv'a (4) avdan al nata. Laha, hir udlani p'sev' avuraur nakl.

⁴ Nki itauamu inep'a sera laiun, nil heian avv'i nka np'el. Laha, np'ei dav'a ti alev'lar nil heian. Sarei, si iamk iuadei eia, kani ti ip'tir arna tln arru. Laha, ip'tir kanep'a sera m'ertu. Sarei, itu m'im'il m'ertu ani.

⁵ Iv'amk ml, nla si dm uraur, inep'a sera si dm iv'i pea. Laha, ip'tir kah lm'an arna tv'eliel iamk. Sarei, iha su ninakl na si iamk al lun, aau, su ninakl lera artl. Laha, avvr ani, kavvr ti a, ‘!Pap'tir, kahan p'ak sei ipastudau!’

⁶ Sarei, nklau ml, laha, si dm iamk ml iak. Laha, inep'a sera lapt lil, la avr ti iv'i lepet ha. Laha, nil heian arv'a (4) avrater arna dun. Si dm lera ptn arv'a (4), sarei, iv'i mlin lil na sei.

⁷ Itauatah a si lera, nla sei naran nm'atr lihat ml. Palei, nla si dm iamk ml, iv'i niv'a nen. Nut huan ililet, iv'i sei apatah ani, aau, apadedrn ani ipastudau. Lun avlilet, kavv'i aian. Iutakm a sei istudau, kakakapr sei, kapas sei, la iter uam a nv' tln ha. Laha, ianep'a sarar si dm avtauamu ani. Laha, kuman avnal.

⁸ Laha, naran nv'ahurr kuma lera, nki iamk ml, isusupa uaki, ima eia dan arna p'akn, asnr kuma, la aviak itauamu ha. Laha, nki lera iani ti kuman artl aviaprla hir. Laha, arna kuma lera, m'eta natei iak, aau, avnep'a sera m'eta m'ertu. Sarei, iv'ana kavrp'ep'a pari lililan.

A Taniel ila sei ml

⁹ Laha, nlak kala sei, dav'a, nla ti atu napl p'as sena mlin. Sarei, a Mlin, la ilak tituei ha, iv'a kalak aranan. Laha, klusan itva kanep'a sera snu, niln arna ptn inep'a sera nil sivsiv, aau, nki la ip'eset ha. Napl p'asan iv'i nap', kaiak a uil, la avv'i nap' ha.

¹⁰ Salva idan asnn, kararev' nakl. Sarei, m'ertu avv'i 1,000,000 (miliun iamk) avpatei, sarei, m'ertu avv'i 100,000,000 (100 miliun) avp'tir arna nahn. Laha, arm'ertu avlak uaki, a ti Hin ipav'ana hua. Laha, avielar puk nakl.

¹¹ Np'ei naran lera, sena ti nrn drl kuma lahara, la iv'ana kavrp'ep'a pari lilan hara. Np'ei dav'a ti attrpep'n sera si dm, katutakm sarei a p'akn, katsran sarei al nep'v'en.

¹² Laha, avani ti si dm (la avtauamu ha) akavv'i mlin ml, v'eti avm'ahu a ti apavsilv' ipaier naran ipaviviln, m'a pnen ml.

¹³ Laha, nla sei ml naran nm'atr lihat. !Laha, palei, nki iamk inep'a sera Net M'ertu, ima dan arna p'knaran, la avrater arna nut eia ha! Laha, iv'a asn a Mlin, la ilak tituei ha. Laha, avuirv'a asnn, aau, imima kap'tir arna nahn.

¹⁴ Sarei, itaui ti iv'i Mlin Lil, katu si p'sp'as ani, m'a v'anu iamk, a ti arm'ertu udlani, m'er v'anu, m'er arm'ertu, la avv'ana arna v'nen ururaur nakl ha, apavpatei. Laha, sei ip'auri ipav'i sei ipap'auri ipel, aau, ipater ikahiris naran. V'anuan ipav'i v'anu akautakm ani kahiris ani naran kinkin.

A Taniel irn ti iparndu ti v'nen lera iv'iv'en v'ata

¹⁵ Laha, kana, nv'i a Taniel, nrn istu istudau arna m'im'ilk (la iter a nlk ha). Aau, sei nlei arna v'ahienak iani ti nrn istu, inep'a ti iuha v'ahienak.

¹⁶ Laha, nv'a asn nki iamk, la ip'tirtalu ha, kamiman ani ti si lera, la ntla sarei ha, iv'i si dau, v'aha inap'i. Sarei, iv'ana m'a kana, kav'iv'en sei a kana, iv'i sei kana ntla sarei. Laha, ivr ti a,

¹⁷ ‘Si dm lilil lera, la arv'a (4) ha, avv'i mlin arv'a. Hir lera apavdan arna nadep' kavp'tir.

¹⁸ V'eti arm'ertu p'asan a Mlin Eia, la ilak eia dau ha, apavlev' v'anu, ipav'i nkar dav'a ikahiris naran.’

¹⁹ Sarei, nrn ti p'erndu sei ier niv'a si dm, la ianep'a sarar si dm uraur ha. Si dm lera iv'i sei iviviln a ti apadedrn ani ipastudau, lun avv'i aian, nila nirh lm'an avv'i aian v'il, laha, iutakm a sei, kakakapr sei, kapas sei, la iter uam a nv' tln ha.

²⁰ Aau, nrn ti p'erndu sei ier kuma, la avnal, la avrater arna ptn ha, m'a kuma, la imamk kadama eia ha, kani ti kuma artl avrs, aau, kuma, la iv'ana kavrp'ep'a pari lilan ha. Sena ti si dm lera ilil kasiv'r tv'aln nakl.

²¹ Sarei, nklau, kala ti kuma lera ien naur m'er arm'ertu p'asan Atua, dav'a, itv'i ti ipasiv'r.

²² Sarei, a Mlin, la ilak tituei ha, iv'alet. Sarei, itu v'nen hua iamk, kani ti arm'ertu p'asan a Mlin Eia, la ilak eia dau ha, apavp'tir. Laha, itu naran na ti arm'ertu p'as apavlev' v'anu.

²³ Laha, iv'ana, kavr ti a, ‘Niv'a si dm ipav'i niv'a v'anu arna nadep' ka. Ikanep'a sarar v'anu uraur udlani. Iputakm a sei arna nadep' ka udlani, kapasi a nadep', kakapapri udlani.

²⁴ Laha, kuma, la avnal ha, apavv'i mlin apavnal, apavdan arna v'anu lera. Sarei, nki uraur ipap'tir, v'eti ipatauatah anr. Hin ikanep'a sarar arki, la avtauamu ha. Laha, ipani ti mlin, la apartl ha, apavrars.

²⁵ Hin ipav'ana, kavrp'ep'a pari lililan, kamlen a Mlin Eia, la ilak eia dau ha. Iputakm anr m'ertu p'asan a Mlin Eia, la ilak eia dau ha. V'ahienan ipav'i ti ipavav napn, kuha v'nen hua nakl. Sarei, apataur m'ertu p'sp'as al lm'an dav'a dav'a, ipap'eriet. Sarei, naran na ti si lera ipatu hin ipav'el ipav'amk mau.

²⁶ V'eti arm'ertu, la apavvrp'ep'a v'nen hua ha, apavlak arna napl. Sarei, apavlev'la v'anuan. Apavutakm ani kavhiris ani, dav'a, akalei ml ikahiris naran.

²⁷ Naran lera, apatu sei hin ip'auri, m'a v'anuan, m'er v'anu lilil udlani arna nadep' ka (la avrater a nv' p'knaran ha), apavv'i nkar arm'ertu, la avv'i m'ertu p'asan a Mlin Eia, la ilak eia dau ha. V'anuan ipav'i v'anu ipater ikahiris naran. Laha, sei, la avv'i mlin na si udlani ha, apavrama kavm'akaran a Mlin Eia, kavan sei Hin ipavr anr a ti apavani.’

²⁸ Laha, v'nenak ihiris atlera. V'eti asnk (nv'i a Taniel), v'ahienak lera iani ti nrn istu, sarei, nahk ima kastu sanan. V'eti nuada sei, la ntla sarei ha, arna nlk.”