Taniel 6 - V'nen P'as iv'i Turanien Trtarep' m'a Turanien M'dah

M'ertu kinkin avmlen a Taniel

¹ Laha, a Tarias irn ip'as a ti ipataur kavman avnelnal iv'amk, pln inelru (120), a ti apavp'aurr nut udlani arna v'anu.

² Sarei, itaurr mlin lilil artl (la avp'tir eia nar kavman lera ha). Laha, nki iamk nar mlin lilil lera iv'i a Taniel. Inap'i lera, itaui ti arkavman apavvrp'ep'a sei anr armlin lilil, a ti m'ertu kinkin ikautakm an a mlin, iv'i a Tarias.

³ Laha, a Taniel lera ien pari lera ip'as kasiv'r mlin lilil uraur, m'er kavman nakl, sena ti p'kln ip'eset. Inap'i lera, a mlin (a Tarias) iv'ahur ti ipataui a ti a Taniel ipav'i mlin lil na v'anu udlani.

⁴ Sena si lera, armlin lilil m'er kavman avtala a navanel a ti apavmlen a Taniel sena v'ata, kavv'ah ti apavpasla ti hin iten sera si stu kinkin, v'eti ahavrndu ti apavpasla si stu kinkin, sarei, ahavrndu ti apavpasla ti hin itkasmn sera si kinkin, sena ti p'kln iviviln. Aau, idahan si stu kinkin, idakasmn si kinkin.

⁵ Sarei, ardu lera avv'ana, kavvr ti a, “Nkavpasla si stu kinkin, a ti p'vmlen a Taniel laha. V'eti nsarei p'vpasla si kinkin, ipavr ti p'vv'ahur sei hin iani nakl naran isapa v'nen huan Atuan.”

⁶ Inap'i lera, armlin lilil m'er kavman avp'lt arna nahn a mlin, kavvr ani, kavvr ti a, “!Tarias, nakm kv'i mlin! !Nakm pasilv' ikahiris naran!

⁷ Armlin lilil udlani arna v'anu, m'er arm'ertu avp'aur sei, m'er kavman, m'er arm'ertu avv'iv'en sei a m'ertu, atvp'lt sarei kavvrur ti apavtu v'nen hua ipamk, ipav'i nkan a mlin, kav'i v'nen ipamk ipap'tir ipahua. Ipanap'i laha, m'ertu, la itu tamat asn atua, v'aha m'ertu kinkin, la iav'ih ha, U mlin, apasran m'ertu nen al m'lnar laiun. Laha, v'nen hua lera ipater napn ipaneltl (30).

⁸ U mlin, nakm pavrp'ep'a v'nen hua lera, aau, pulul ani arna ruplet ipamk, a ti akavavi, ipav'i v'nen huar arm'ertu a Mitia m'er arm'ertu a Pesia--la akavavi naran kinkin ha.”

⁹ Sarei, a Tarias iulul a nahan arna ruplet, la v'nen hua lera iter aranan ha.

Avsran a Taniel al m'lnar laiun

¹⁰ Laha, naran a Taniel itrndu sarei ti a mlin itulul sera v'nen lera, im'alet a utan. Laha, isishpu iv'av'atl arna napn lera, katu tamat, kavr si p'as an Atuan, inep'a nut iani inap'ei itauamu. Iani inap'i lera arna m'lna m'ertu eia, kaiela uiduan, a ti ipap'a nut a Serusalem.

¹¹ Sarei, ardu lera avp'lt, kavpaslei a Taniel, naran itu tamat, kamiman sei arna nahn Atuan.

¹² Sarei, avrav'a kavp'tir arna nahn a mlin, kavvrur v'nen hua lahara, la a mlin ittu sarei hara. Laha, avvr ti a, “?Nakm ktulul sera naham arna ruplet, katvr sarei ti ipavr ti m'ertu kinkin ipatu tamat asn atua v'aha m'ertu kinkin iav'ih, dav'a ti napn ineltl (30) atvv'siau sarei, U mlin, apasrani al m'lnar laiun, v'aha ihei?” Sarei, a mlin ivrpranr, kavr ti a, “Aau, v'nen lera iv'i v'nen dau, kasapa v'nen huar arm'ertu a Mitia m'er arm'ertu a Pesia, akavavi naran kinkin.”

¹³ Sarei, avvrprani, kavvr ti a, “A Taniel lahara, la iv'i net m'ertu a Suta, la avp'resin ha, hin iav'ahurh, U mlin. Iav'ahur v'nen hua nakm ktulul sarei, sena ti itu tamat iv'av'atl nakl arna napn iamk.”

¹⁴ Sarei, naran a mlin irn v'nen lera, irn istu istudau a nln. Sarei, iv'ahur a nln navanel a ti ipalev'lei a Taniel. Laha, im'akar a ti ipalev'lei, dav'a ti iv'i knarev'.

¹⁵ Sarei, ardu lera avrav'a asn a mlin, kavvr an a mlin, kavvr ti a, “U mlin, parndu ti v'nen huar arm'ertu a Mitia m'er arm'ertu a Pesia iv'i ti akavav v'nen hua v'aha v'nen attu sarei, la iv'i v'nen a mlin ittu sarei ha.”

¹⁶ Inap'i lera, a mlin itu v'nen hua, sarei, avuirv'a a Taniel kavsrani al m'lnar laiun. V'eti a mlin iv'ana m'ei a Taniel, kavr ti a, “Atuam, la km'akaran iel ha, ipalev'lah.”

¹⁷ Sarei, avlev' nav'et lil iamk, kavtaui asn karliu na m'lnar laiun. Laha, a mlin itu makan aranan m'a rinan, m'er rinar armlin lilil, a ti akavav sei hin ittu sarei, la ier a Taniel ha.

Atua ilev'lei a Taniel asnr laiun

¹⁸ Sarei, a mlin iv'a eim al nmah p'asan. V'eti iahatat lihat lera, ahavuirv'ar m'ertu avhai nakl asnn. Sarei, iarndu ti ipam'atr.

¹⁹ Sarei, a mlin ithal m'etav'aran nrnren, karakn kadav'a asn m'lnar laiun.

²⁰ Laha, naran ier m'lnar laiun, iv'ara an a Taniel, karn istu naran iv'ana. Laha, a mlin iv'ana, kavr an a Taniel, kavr ti a, “Taniel, nakm kv'i m'ertu na m'akarienan Atua, la isilv' ha. Hin Atuam, la km'akaran iel ha, itrndu sarei ti ipalev'lah asnr laiun, v'aha inap'i?”

²¹ Sarei, a Taniel ivr an a mlin, kavr ti a, “!U mlin, nakm pasilv' ikahiris naran!

²² Atuak itep'a enselan iamk, ip'leskarr pnr laiun, a ti akavutakm a kana, sena ti kana ndahan si stu kinkin arna nahn. Sarei, U mlin, kana ndahan si stu kinkin arna nahm.”

²³ Laha, a mlin irn ip'as istudau sanan, kav'ana hua, kavr ti apavlev'lei a Taniel dan al m'lnar laiun. Inap'i lera, avlev'lei a Taniel dan al m'lnar laiun. Laha, ahavpasla ti adavutakm a p'akn kinkin, sena ti iv'ah Atuan.

A Tarias ivr ti a Mlin Eia iv'i Atua dau

²⁴ Sarei, a mlin ivrp'ep'a v'nen hua iamk ml. Laha, avlav'r ardu la avmlen a Taniel hara, kavsranr al m'lnar laiun--hir, m'er a natr, m'er a naur. Laha, arlaiun avsiv'r kavkapaprr sur udlani, naran p'akr adaier nadep' al m'lnar laiun lera.

²⁵ Sarei, a Tarias, iv'i mlin, iulul a v'nen iamk. Laha, ivri inap'i laha: Arm'ertu udlani, m'er v'anu udlani, m'er arm'ertu, la kvv'ana arna v'nen uraur nakl, la kvlak arna nadep' ka ha. Nrn ti kam'i pavlak arna tamat ipel.

²⁶ Kana ntu v'nen hua iamk hilaha. Arna nut udlani arna v'anuak, arm'ertu apavvrdedrn kavdedrn arna nahn Atuan a Taniel. Sena ti Hin iv'i Atua la isilv' ha. V'ahienan ip'tir ihua, ikahiris naran. Laha, akautakm a v'anuan kahiris ani naran kinkin. Hin ipav'i Mlin na v'anu, ipap'tir ipel.

²⁷ Hin ilev'lar m'ertu, aau, ilev'urr nakl. Hin ien pari p'as, kan sei iani ti m'ertu avtah ani istudau, arna nut eia m'ei arna nut a nadep'. Hin itlev'la sarei a Taniel arna nut huar laiun nakl.

²⁸ Inap'i lera, a Taniel lera ima kav'i m'ertu lil iamk, naran a Tarias iv'i mlin. Sarei, inap'i lera dav'a kaier naran a Sairus, iv'i m'ertu a Pesia, ima kav'i mlin.