Taniel 5 - V'nen P'as iv'i Turanien Trtarep' m'a Turanien M'dah

A Pelsasar ien tim'ah lil iamk

¹ Laha, a Pelsasar, iv'i mlin, ien tim'ah lil iamk sanar arm'ertu lilil arna v'anuan, avv'i tausen iamk (1,000). Laha, im'n naui m'iel asnr m'ertu lahara avv'i tausen iamk.

² Laha, naran im'ndina naui m'iel lera, iv'ana hua, kavr ti apavlav'r panikin (la aani a kul m'a silva ha), la a tetian, iv'i a Nepukatnesa, itlev'la sarei al nmah tamatan Atua, la iter a Serusalem itauamu ha. Ivr si lera, a ti a mlin, m'er arm'ertu lililan, m'er a naun, m'er a hau papan, apavtvan naui m'iel a nlr panikin lera, sarei kavm'ni.

³ Sarei, avlav'r panikin, la aani a kul ha, la atvlev' sarei al nmah tamatan Atua la iter a Serusalem itauamu ha. Sarei, a mlin, m'er arm'ertu lililan, m'er a naun, m'er a hau papan, avtu naui m'iel a nlr kavm'ni.

⁴ Inap'i lera, avm'n naui m'iel kavpatar atua, la aani a kul, m'a silva, m'a aian v'il, m'a nai, m'a nav'et ha.

⁵ Arna m'etaneiel lera uaki, nirh lm'a m'ertu iamk iv'iv'en hin, sarei kulul a v'nen iamk arna simen arna naml na nmahan a mlin. Sarei, a mlin ila pna lm'a m'ertu, la iulul a v'nen ha.

⁶ Laha, nahn a mlin ima kastu, sarei, irn istu arna v'ahienan, dav'a ti plk sun arna tln eia avrdus hir, laha, plk tln avdudul kavspaspa hir.

⁷ Sarei, a mlin iv'ara eia, kavr ti apavlav'r arm'ertu avv'ah msi nakl, m'er arm'ertu a Kaltia, m'er arm'ertu avsapa p'kl tutuah. Sarei, a mlin iv'ana, kavr anr arm'ertu a Papilun, la aviak a v'ahien p'as ha, kavr ti a, “Ipavr ti m'ertu iparndu ti ipav'ana arna v'nen laha, kavrp'ep'a sei iv'iv'ani, apatu klus p'as, la aani a kalik m'ielm't ha, m'a sen aani a kul arna natavnan. Sarei, ipav'i nitla mlin na v'anu.”

⁸ Sarei, arm'ertu aviak a v'ahien p'as (la avm'akaran a mlin ha) avrav'a asnn, v'eti ahavrndu ti apavv'ana arna v'nen lera, sarei, ahavrndu ti apavvrp'ep'ei an a mlin sei iv'iv'ani.

⁹ Laha, naran lera, a Pelsasar, iv'i mlin, irn istu istudau arna nln, laha, nahn ima kastu. Laha, arm'ertu lilil avtah ani istudau.

¹⁰ Sarei, a hau lil ima eim na nut avhatat, sena ti irn v'nenan a mlin. Laha, a hau lil iv'ana, kavr ti a, “!U mlin, nakm pasilv' ikahiris naran! Mam'ahu a ti v'ahienam ipani ti parn ipastu, aau, mam'ahu a ti nahm ipama kastu sanan.

¹¹ Dui iamk ilak arna v'anuam, M'im'iln Atua P'as ilak a nln. Naran a tetiam isilv', apasla ti iak a v'ahien p'as. Laha, inep'a sarar atua nakl, inep'a ti nln ier, irndu sei istudau, aau, iak a v'ahien p'as. Laha, a mlin a Nepukatnesa, iv'i a tetiam--aau, iv'i a tetiam kav'i mlin--hin iani ti iv'i mlinar tiet, kav'i mlinar arm'ertu avv'ah msi nakl, m'er arm'ertu a Kaltia, m'er arm'ertu avsapa p'kl tutuah.

¹² Sena ti atpasla sarei ti a Taniel lera p'kln ip'eset, irndu sei istudau, aau, iv'ahur mamh sei, karndu ti ipavrp'ep'a sei alei naran am'atr, karndu ti ipavrpren v'nen hapr nakl, kav'iv'en sei istudau (inep'a ti ilev'la nahau naran itdedhar sarei)--nakm pav'ara an a Taniel--la a tetiam ittu sera nahan iv'i a Peltasasar ha--hin ipavrp'ep'a sei v'nen laha ipav'iv'ani.”

V'nen iter arna naml na nmah iv'iv'en sei

¹³ Sarei, avlev' a Taniel, kavani ti ip'tir arna nahn a mlin. Laha, a mlin iv'ana m'ei a Taniel, kavr ti a, “?Nakm kv'i a Taniel lahara, la kv'i m'ertu kp'resin m'er arm'ertu, la a tetiak, iv'i mlin, ilav'r dan a Suta ha?

¹⁴ Ntrndu sarah, sena ti m'ertu kinkin avvr ti M'im'iln Atua ilak a nlm, aau, avvr ti v'nen, la iv'iv'en sei ha, m'a v'ahien p'as, iter a nlm, sarei, nakm krndu sei istudau.

¹⁵ Hilaha, atvlev' sarar m'ertu aviak a v'ahien p'as, m'er arki avv'ah nal nakl, aau, atvp'tir sarei arna nahk, a ti apavv'ana arna v'nen laha kavvrp'ep'a sei iv'iv'ani. V'eti ahavrndu ti apavv'iv'en sei ivri.

¹⁶ Laha, ntrn sarei ti nakm krndu ti pavrp'ep'a sei, karndu ti pav'iv'en sei, la m'ertu uraur iarndu ti ipav'iv'ani ha. Laha, ipavr ti pav'ana arna v'nen laha, kavrp'ep'a sei iv'iv'en a kana, apatu klus p'as, la aani a kalik m'ielm't ha, m'a sen aani a kul arna natavnam. Sarei, pav'i nitla mlin arna v'anu.”

¹⁷ Laha, a Taniel ip'tir arna nahn a mlin, kavrprani, kavr ti a, “Ihei, sei krn patau a kana nakm pauadei uaki. Patu si p'sp'as a m'ertu uraur. V'eti kana p'ev'ana arna v'nen laha, kavrp'ep'ei an a mlin. Aau, p'evrp'ep'a sei v'nen laha iv'iv'ani.

¹⁸ U mlin, parndu ti Atua, la ilak eia dau ha, itu v'anu iamk an a Nepukatnesa, iv'i a tetiam, kataui ti iv'i mlin lil iamk, m'ertu avv'ahi nakl.

¹⁹ Laha, sena ti iani ti iv'i mlin lil iamk, arm'ertu udlani, m'er v'anu udlani, m'er arm'ertu avv'ana arna v'nen uraur nakl, avvrdedrn sanan, aau, avdedrn ani. Ipavr ti iparn ti iparpep'n m'ertu kinkin, v'eti ipani uaki. Ipavr ti iparn ti m'ertu kinkin ipasilv', v'eti m'ertu lera ipasilv' uam. Ipavr ti iparn ti m'ertu kinkin ipama eia arna v'anu, m'ertu lera ipama eia ra. V'aha, ipavr ti iparn ti m'ertu kinkin ipav'a a nadep' arna v'anu, m'ertu lera ipav'a a nadep' uaki.

²⁰ V'eti naran iukl hin arna nln, sarei kav'ahur (arna m'im'iln) ti hin iv'i mlin lil iamk, Atua ilev'lei arna napl p'as, la iv'i nkan a mlin ha. Laha, arm'ertu avlev'lar si p'sp'asan nakl.

²¹ Sarei, atp'av'i asnr m'ertu nakl. M'im'iln ima kanep'a sera m'im'il si dm iamk. Sarei, ilak nakl asnr tuki didi. Amsnani m'a nina, laha, inep'a sera pluk uaki. Laha, p'akn iuir sena niu irs dan arna p'knaran, dav'a ti ima karndu ti Atua, la ilak eia dau ha, iv'i Mlinar v'anu udlani, katu m'ertu Hin uaki itv'li sarei, a ti ipav'i mlin kap'aurr.

²² V'eti Pelsasar, nakm kv'i a natn dui. Nakm ktrndu sera si udlani laha, v'eti kdalak a nadep' arna nlm sanan.

²³ Laha, ktukl sarah, katmlen sarei a Mlin Eia, la ilak arna nut eia ha. Atvuirma sarar dis m'er panikin na nmah tamatan asnm. Sarei, nakm, m'er arm'ertu lililam, m'er a naum, m'er a hau papam, atvm'n sera naui m'iel al panikin lera. Sarei, nakm ktpata sarar atua, la aani m'a silva, m'a kul, m'a aian v'il, m'a nai, m'a nav'et, la ahavrndu ti apavla si kinkin, ahavrndu ti apavrn si kinkin, ahavrndu ti apavv'ahur si kinkin ha. Laha, nakm kdapata nahan Atua, la iuada m'im'ilm al lm'an ha, kav'i Mlin na si udlani nakm kani ha.

²⁴ Inap'i lera, Hin prki ittep'a sera nirh lm'a m'ertu laha, sarei, itulul sera v'nen laha.

²⁵ V'nen itulul sarei inap'i laha: MENE, MENE, TEKEL, UPHARSIN.

²⁶ Laha, p'ev'iv'en sei v'nen udlani laha avvri. MENE: Atua ittina sera v'anuam, kathiris sarei ani.

²⁷ TEKEL: Attina sarah, kapasla ti nakm kaaviviln.

²⁸ PERES: Attupr sera v'anuam, aau, attu sarei anr arm'ertu a Mitia, m'er arm'ertu a Pesia.”

²⁹ Sarei, a Pelsasar iv'ana hua m'er arm'ertu, sarei, avtu klus an a Taniel, avv'i klus aani a kalik m'ielm't, kavtu sen aani a kul arna natavnan, kavtu v'nen hua iamk, ivrp'ep'a ti a Taniel ipav'i nitla mlin arna v'anu.

A Pelsasar im'a

³⁰ Sarei, arna lihat lera uaki, m'ertu kinkin avtrpep'n a Pelsasar, iv'i mlinar arm'ertu a Kaltia.

³¹ Sarei, a Tarias, iv'i m'ertu a Mitia, ilev' v'anu, kav'i mlin. Avvr ti paian inellm'sei, pln iru (62), v'eti ahavrndu mamahi.