Taniel 4 - V'nen P'as iv'i Turanien Trtarep' m'a Turanien M'dah

A Nepukatnesa ila sei naran im'atr ml

¹ Kana nv'i a mlin a Nepukatnesa. Kana nvrp'ep'a v'nen laha anr arm'ertu, m'er v'anu, m'er arm'ertu avv'ana arna v'nen uraur, aau, hir udlani la avlak arna nadep' ka ha. Nrn ti kam'i pavlak arna tamat ipel.

² Nv'ahur ti ipav'i si p'as ipamk a ti kana p'evrp'ep'a pari lilil, la avv'iv'en sei ha, kavrp'ep'a sei m'ertu avtah ani, la Atua Lil iten sarei sanak ha.

³ !Pari lililan avp'eset! !Sei iani, la iani ti m'ertu avtah istudau ha, avlilet! V'anuan iv'i v'anu ipamk ipater ikahiris naran. Nut udlani m'a si udlani Hin ip'auri apavrater dav'a ikahiris naran.

⁴ Kana, nv'i a Nepukatnesa, nlak karnrn kana al nmahak. Nlak p'as al nmah p'asak uaki, iv'i nmaha mlin.

⁵ Sarei, nla sei naran nm'atr, iani ti ndedrn. Laha, sei nv'ahuri arna piasak, m'a sei nlei arna v'ahienak avani ti nrn istu a nlk.

⁶ Sena si lera, ntep'a v'nen hua iamk, a ti arm'ertu, la aviak a v'ahien p'as ha, arna nut a Papilun apavrama kavp'tir arna nahk, a ti apavv'iv'en a kana sei nlei naran nm'atr.

⁷ Sarei, artiet, m'er arm'ertu avv'ah msi nakl, m'er arm'ertu a Kaltia, m'er arm'ertu avsapa p'kl tutuah avrama eim asnk. Laha, nvrp'ep'a sei nlei naran nm'atr, v'eti ahavvrp'ep'a sei iv'iv'en a kana.

⁸ Sarei, itauatah a naran lera, a Taniel ima kap'tir arna nahk. Tv'el naha dui lera iv'i a Peltasasar, nahan lera isapa nahan atuak. M'im'iln Atua P'as ilak a nln a Taniel lera. Laha, nvrp'ep'ei ani sei nlei naran nm'atr. Laha, nvr ani, kavr ti a,

⁹ “U Peltasasar, nakm kv'i mlinar tiet, sena ti nrndu ti M'im'iln Atua P'as ilak a nlm, karndu ti si tutuah kinkin ikautakm a v'ahienam. Sena si lera, nakm pavrp'ep'a sei kana nlei naran nm'atr, m'a sei iv'iv'en a kana.

¹⁰ Kana nla si laha nakl, naran nm'atr arna piasak: Nklau eia, sarei, palei, nai lil iamk ip'tir a p't nut na nadep' ka. Laha, nai lera ip'eriet.

¹¹ Sarei, nai lera ima kalil kahua. Ima kap'arei kaier p'knaran. Laha, arndu ti apalei arna nut v'iv'a au na nadep' ka.

¹² Sarei, raun ip'eset, navan istuduet, iv'i suadar m'ertu udlani. Laha, si dm na lili avlak a nv' m'lkn, sarei, m'anh na p'knaran avlak nakl arna ranan. Si udlani, la avsilv' ha, suadar iak, sena ti tim'ah idan arna nai lera.

¹³ Sarei, naran nla sei arna v'ahienak uaki, naran nlak arna piasak, aau, nla ensel ip'aur sei, iv'i ensel p'as iamk. Laha, idan arna nut eia, kadama auei.

¹⁴ Laha, iv'ana eia, kavri inap'i laha: ‘Patr nai laha, katrlar ranan. Palev'lar raun, kassran navan nakl. Arsi dm apavruh a nv'n, sarei, arm'anh apavtetv kavruh arna ranan.

¹⁵ V'eti paln tren m'a uarn al nadep'. Pahuda sei iter uam m'a nahau lil aani a aian m'a aian v'il. Palni, ipap'tir asn nina p'as arna m'lden. Laha, ipauir, sena ti niu na p'knaran ipars aranan. Laha, ipanep'a ti ipav'i m'ertu kahan nina m'er si slm, aau, ipahan nina, la isi arna nadep' ha.

¹⁶ Sarei, m'im'iln ipavav hin, ikav'i m'im'iln na m'ertu ml. Laha, m'im'iln ipav'i m'im'iln na si dm. Sarei, pai ipasaru (7) apavv'siau kavsiv'i.

¹⁷ V'nen laha iv'i v'nen huar arensel avp'aur sei, aau, iv'i v'nen hua ier m'ertu, sena ti arensel, la avp'eset ha, atvv'ana sarei. Atvv'ana sarei, a ti arm'ertu, la avsilv' ha, apavrndu ti a Mlin Eia, la ilak eia dau ha, iv'i Mlin na v'anuar arm'ertu. Itu v'anu a m'ertu Hin prki irn ti ipatau ani. Aau, iani ti m'ertu, la iav'i m'ertu lil ha, irndu ti ipap'aur v'anu.’

¹⁸ Kana, nv'i a mlin a Nepukatnesa, ntla sera si lera naran nm'atr. Hilaha, nakm, Peltasasar, pavrp'ep'a sei si lera ipav'iv'en a kana. Sena ti arm'ertu udlani arna v'anuak, la aviak a v'ahien p'as ha, ahavrndu ti apavvrp'ep'a sei iv'iv'en a kana. V'eti nakm krndu ti pani, sena ti M'im'iln Atua P'as ilak a nlm.”

A Taniel iv'iv'en sei an a mlin

¹⁹ Sarei, a Taniel (tv'el nahan iv'i a Peltasasar) itah istudau kalak uaki, sena ti irn istu arna v'ahienan. Inap'i lera, a mlin iv'ana, kavr ti a, “Peltasasar, mam'ahu a ti sei nlei, v'aha sei iv'iv'ani, ipani ti parn istu.” Sarei, a Peltasasar ivrprani, kavr ti a, “!Mlinak, nrn ti sei nakm ktla sarei ipav'i sei ipaiarr m'ertu, la avlep'lah ha, aau, nrn ti sei si lera iv'iv'ani ipaiarr m'ertu avmlanh!

²⁰ Nakm kla nai, la ima kalil kahua ha. Ima kap'arei kaier p'knaran. Laha, arndu ti apalei arna nut udlani arna nadep' ka.

²¹ Aau, raun ip'eset, navan istuduet, iv'i suadar si udlani. Si dm na lili avlak a nv'n, m'anh arna p'knaran avlak nakl arna ranan.

²² U mlin, nai lera iv'ih. Nakm ktlil sarei, aau, nakm ktama sarei kahua, sena ti kv'i m'ertu lil iamk, inep'a ti ktier sera p'knaran. Sarei, v'anuam itier sera nut v'iv'a dau arna nadep' ka.

²³ A mlin itla sera ensel ip'aur sei, la iv'i ensel p'as ha, idan arna nut eia, kavr ti a, ‘Patr nai lera, ipars a nadep', kutakm ani ipastudau, v'eti paln tren m'a uarn al nadep'. Pahudei m'a nahau lil aani a aian m'a aian v'il, kalni, ipap'tir asn nina p'as arna m'lden. Laha, ipauir, sena ti niu na p'knaran ipars aranan. Laha, ipanep'a ti ipav'i m'ertu kahan nina m'er si slm, dav'a ti pai ipasaru apavv'siau.’

²⁴ U mlin, kana p'evrp'ep'a sei si lera ipav'iv'en anh. V'nen laha iv'i sei a Mlin Eia, la ilak eia dau ha, itvrp'ep'a sarei. Laha, itama sarei aranam, tetiak, mlinak:

²⁵ Apatp'av'h, mkalak ml asnr m'ertu. Palak asnr si dm na lili. Apani ti nakm pahan nina ipanep'a nut pluk iani inap'ei. Apani ti pauir, niu na p'knaran ipaier p'akm. Laha, pai ipasaru (7) apavv'siau kavsiv'h, dav'a ti parndu ti a Mlin Eia, la ilak eia dau ha, iv'i Mlin na v'anuar arm'ertu, karndu ti Atua itu v'anu a m'ertu Hin prki irn ti ipatau ani.

²⁶ Aau, atvv'ana hua sarei, katvvr sarei ti tren m'a uarn apavrater uam. Inap'i lera, v'anuam ipam'alet asnm uam, v'eti ipatauatah a naran ktrndu sarei ti si udlani idan arna nut eia uaki.

²⁷ U mlin, sena si lera, nakm pam'ahu a ti v'nen kana ntu anh ipap'as uaki asnm. Pasapa navanel viviln, karn istu a m'ertu sian ihei. Ipanap'i lera, patrlar si stuam, la avstu istudau ha. Ipanap'i lera, nsarei palak p'as ipap'arei mau.”

A Mlin Eia iani ti a Nepukatnesa ilak a nadep' istudau

²⁸ Laha, si udlani lera ima aranan a Nepukatnesa.

²⁹ Laha, naran nal inal lman iru (12) atvv'siau sarei, hin iv'el kunanut al nmah p'asan a mlin a Papilun.

³⁰ Sarei, a mlin iv'ana, kavr ti a, “V'anu laha iv'i a Papilun, Iv'i v'anu lil hua iamk, kap'eset. Kana nthl sera nut laha, a ti ipav'i nmaha mlin. Nten sarei m'a nut huak, iv'i sei iani ti arm'ertu avv'ahur ti nv'i mlin lil iamk.”

³¹ Naran v'nen lera iter uam al pnn, drl m'ertu iamk idan arna nut eia. Laha, ivr ti a, “!Nepukatnesa, la kv'i a mlin ha, nv'ana m'ah hilaha: v'anu itruh sarei asnm!

³² Apatp'av'h, mkalak ml asnr m'ertu. Palak asnr si dm na lili. Apani ti pahan nina kanep'a sera pluk. Laha, pai ipasaru (7) apavv'siau kavsiv'h, dav'a ti parndu ti a Mlin Eia, la ilak eia dau ha, iv'i Mlin na v'anuar arm'ertu, karndu ti Atua itu v'anu a m'ertu Hin prki irn ti ipatau ani.”

³³ Arna naran lera uaki, v'nen lera, la ier a Nepukatnesa ha, ima katu hin. Arm'ertu avtp'av'i asnr m'ertu uraur. Sarei, ihan nina kanep'a sera pluk. P'akn iuir sena niu na p'knaran. Dav'a, niln ima eia kanep'a sera su nil heia np'el. Sarei, nila nirh lm'an avrama kavnep'a sarar nila nirh lm'a m'anh.

A Nepukatnesa ipata nahan a Mlin Eia

³⁴ Sarei, naran napn udlani lera atvv'siau sarei, kana, nv'i a Nepukatnesa, nklau eia kap'a nut eia. Sarei, v'ahien p'asak im'alet ml asnk. Sarei, npata nahan a Mlin Eia, la ilak eia dau ha. Aau, npatei, kav'ana, kavr ti Hin iv'i Atua Lil, la isilv' ikahiris naran ha--sena ti v'anuan iv'i v'anu ipater ikahiris naran. Nut udlani ip'auri ipater dav'a dav'a.

³⁵ Laha, arm'ertu udlani arna nadep' ka ahavv'i sei. Hin ipan sei Hin uaki irn ti ipani, asnr m'rnur udlani, la avlak arna nut eia ha, m'er arm'ertu udlani, la avlak arna nadep' ka ha. M'ertu kinkin ikauada lm'an katukari. M'ertu kinkin ikatu v'nen hapr ani, kavr ti a, “?Nakm kten sera v'ata?”

³⁶ Iv'amk, v'ahien p'asak im'alet asnk. Sarei, a ti v'anuak ipama kap'as ml, kana nma kap'as ml, m'ertu avv'ahur kana. Aau, si lera nakl avm'alet asnk. Sarei, arm'ertu, la avv'iv'en sei a kana ha, m'er arm'ertu lilil arna v'anu, avm'alet asnk. Inap'i lera, nma kav'i mlin ml. Avani ti nv'i mlin lil ml, kavtu pari p'as a kana ml.

³⁷ Hilaha, kana, nv'i a Nepukatnesa, npatei a Mlin na nut eia, aau, npata nahan, karndu ti Hin iv'i Atua dau. Si udlani Hin iani iv'i si dau. Naran iv'ana hua, iv'ana mamh. Laha, ipavr ti m'ertu apavv'el kavukl hir, Hin irndu ti ipani ti apavrars a nadep'.