Taniel 3 - V'nen P'as iv'i Turanien Trtarep' m'a Turanien M'dah

A Nepukatnesa ien aitul lil iamk

¹ Sarei, a Nepukatnesa, iv'i mlin, ien aitul iamk m'a kul. Laha, nut eia ier a nadep' iv'i mita ineltl (30). Tv'eliel iamk ier tv'eliel uraur iv'i mita itl. Laha, itaui arna m'lden arna nut a Tura, arna v'anu a Papilun.

² Sarei, a Nepukatnesa, iv'i mlin, itep'a v'nen, a ti ipani ti arm'ertu lilil, m'er mlin, m'er kavman lilil, m'er arm'ertu avv'iv'en sei a m'ertu, m'er arm'ertu avp'aur nav'et, m'er arm'ertu na v'nen hua, m'er arm'ertu avv'ana hua, m'er kavman uraur na pruvins, apavrama kavp'lt kavan tim'ah lil ipamk sena aitul lil, la a mlin a Nepukatnesa ittu mamh sarei ha.

³ Sarei, arm'ertu lilil, m'er mlin, m'er kavman lilil, m'er arm'ertu avv'iv'en sei a m'ertu, m'er arm'ertu avp'aur nav'et, m'er m'ertu na v'nen hua, m'er arm'ertu avv'ana hua, m'er kavman uraur na pruvins, avrav'a kavp'lt sena tim'ah lil sena aitul lil, la a mlin a Nepukatnesa ittu mamh sarei ha. Laha, avp'tir arna nah aitul lil, la a mlin a Nepukatnesa ittu mamh sarei ha.

⁴ Sarei, m'ertu iamk, la iv'i m'ertu iv'ana eia ha, iv'ana eia sp'n, kavr ti a, “U arm'ertu udlani, m'er v'anu udlani, m'er arm'ertu avv'ana arna v'nen ururaur nakl,

⁵ naran pavrn drlr natav, m'a sei aiv'i iv'i vlut, m'a kita lil (iv'i hap), m'a kita uraur, m'a madulin, aau, naran pavrn drl si lera ipap'lt m'a si uraur kap'eset, pavrars a nadep' kavpatei aitul aani a kul, la a mlin a Nepukatnesa ittu mamh sarei ha.

⁶ Laha, ipavr ti m'ertu ikahrs a nadep', v'aha ikapatei, apasran m'ertu lera ipav'amk a p't nut na nep'v'en lil ipamk.”

⁷ Laha, arna naran lera, naran arm'ertu avrn drlr natav, m'a sei aiv'i iv'i vlut, m'a kita lil (iv'i hap), m'a kita uraur, kavrn drl si lera naran ip'lt m'a si uraur kap'eset, avrs a nadep' kavpatei aitul aani a kul, la a mlin a Nepukatnesa ittu mamh sarei ha.

A Satrak, a Misak, m'ei Apetniku ahavan sei a mlin ivri

⁸ Sena si lera, arm'ertu a Kaltia kinkin avp'tir kavmlanr arm'ertu a Suta.

⁹ Laha, avv'ana, kavvr an a Nepukatnesa, iv'i mlin, kavvr ti a, “!U mlin, nakm pasilv' ikahiris naran!

¹⁰ U mlin, nakm kttu sera v'nen hua iamk, a ti ipavr ti m'ertu iparn drlr natav, m'a sei aiv'i iv'i vlut, m'a kita lil (iv'i hap), m'a kita uraur, m'a madulin, aau, naran m'ertu iparn drl si lera, naran ip'lt m'a si uraur kap'eset nakl, m'ertu lera ipars a nadep' kapatei aitul, la aani a kul ha.

¹¹ Sarei, ipavr ti m'ertu ikahrs a nadep' kapatei, apasrani a p't nut na nep'v'en lil.

¹² Arm'ertu a Suta kinkin avlak, avv'i hir la kttu sarei a ti apavp'aur sei nakl arna nut udlani a Papilun ha. Avv'i a Satrak, a Misak, m'ei Apetniku. U, mlin, ardu lera adavv'ahurh arna navanel viviln. Ahavm'akarar atuam, ahavpatei aitul, la aani a kul, la nakm kttu mamh sarei ha.”

¹³ Sarei, a Nepukatnesa nln irer, aau, nln irer istudau. Sarei, itu v'nen hua iamk, a ti arm'ertu apavlav'r a Satrak, a Misak, m'ei Apetniku. Laha, avlav'r ardu lera kavani ti avp'tir arna nahn a mlin.

¹⁴ Laha, a Nepukatnesa iv'ana m'er, kavr ti a, “?Satrak, Misak, Apetniku--arm'ertu avvrdaui, naran avvr ti kam'i kaavm'akarar atuak, sarei kaavpatei aitul aani a kul, la nttu sarei ha--v'aha inap'i?

¹⁵ !Laha, ipavr ti pavandedp' kam'i naran pavrn drlr natav, m'a sei aiv'i iv'i vlut, m'a kita lil (iv'i hap), m'a kita uraur, m'a madulin, aau, naran pavrn drl si lera naran ip'lt m'a si uraur kap'eset--aau, ipavr ti pavrars a nadep' kavpatei aitul kana nten sarei, ip'as ra! V'eti, ipavr ti mkavpatei, apasran kam'i ipav'amk a p't nut na nep'v'en lil. ?Laha, atua v'ata ipalev'la kam'i al lm'ak?”

¹⁶ Laha, a Satrak, a Misak, m'ei Apetniku avvrpren a mlin, kavvr ti a, “U, Nepukatnesa, kam'em' nkavvrpranh arna si laha.

¹⁷ Ipavr ti ipanap'i lera, Atuam'em', la nvm'akaran ha, irndu ti ipalev'la kam'em' arna nep'v'en lil. U mlin, Hin ipalev'la kam'em' al lm'am.

¹⁸ V'eti, ipavr ti ikahei, mlin, nakm parndu si laha--kam'em' nkavm'akarar atuam, nkavpatei aitul aani a kul, la kttu mamh sarei ha.”

Atua ilev'lar arna nep'v'en

¹⁹ Sarei, a Nepukatnesa nln irer istudau. Laha, naran ip'ar a Satrak, a Misak, m'ei Apetniku, nahn ima kastu. Laha, iv'ana hua, kavr ti apavani ti nep'v'en ipavuv kasiv' itauamu, ipanep'a ti ipavuv ipav'asaru, ipasiv' nut avani ivuv inap'ei iel.

²⁰ Sarei, iv'ana hua, kataui ti m'rnur hua kinkin, la ahavdedrn ha, apavhudar a Satrak, a Misak, m'ei Apetniku, kavsranr al nep'v'en lil.

²¹ Sarei, avhudar ardu lera, v'eti avua klus na m'la, m'a trasis, m'a manu aani a kalik, m'a klus uraur. Sarei, avsranr a p't nut na nep'v'en lil.

²² Sarei, sena ti v'nen huan a mlin iv'i ti apavani ipalahml sarei, laha, nep'v'en lil ivuv istudau, nap', la idan arna nep'v'en lil ha, ikap'nr ardu, la avuirv'ar a Satrak, a Misak, m'ei Apetniku al nep'v'en ha.

²³ Laha, ardu lera artl, avv'i a Satrak, a Misak, m'ei Apetniku, avrs a p't nut na nep'v'en lil, sena ti atvhuda sarar.

²⁴ Sarei, a Nepukatnesa, iv'i mlin, itah istudau. Sarei, ip'tir ilahml sarei kav'ana, kavr anr arm'ertu, la avv'iv'en sei ani nakl ha, kavr ti a, “?Nvhudar ardu artl kavsranr a p't nut na nep'v'en, v'aha ihei?” Laha, avvrpren a mlin, kavvr ti a, “U mlin, nakm kvrdaui.”

²⁵ Sarei, ivrpranr, kavr ti a, “!Palei! Nlar ardu arv'a (4) avv'el kavunanut uaki, aau, avv'el a p't nut na nep'v'en. Laha, si kinkin idautakm anr. Sarei, nla ti niv'a nar inep'a sarei a Natn Atua.”

A Nepukatnesa ipatei Atua

²⁶ Sarei, a Nepukatnesa iv'a asn pn liu na nep'v'en lil, kav'ana, kavr ti a, “Satrak, Misak, Apetniku--kvv'i m'ertu na m'akarienan Atua, la ilak eia dau ha. Pavrama av'aran, aau, pavmima asnk.” Sarei, a Satrak, a Misak, m'ei Apetniku avv'el dan a p't nut na nep'v'en.

²⁷ Sarei, arm'ertu lilil, m'er mlin, m'er kavman lilil, m'er arm'ertu avv'iv'en sei an a mlin, avrav'a kavp'lt atlera, kavlar ardu lera. Laha, avla ti nap' idaier p'akr, nilr arna ptr idahapu, klusar avp'as uaki, kavla ti aharn m'i nap' arna p'akr.

²⁸ Laha, a Nepukatnesa iv'ana, kavr ti a, “Iviviln a ti p'vpatei Atuar a Satrak, a Misak, m'ei Apetniku, la itep'a Enselan, kalev'lar m'ertu na m'akarienan, la avv'ahi ha. !Atvvav sera v'nenan a mlin, katvm'ahu sarei a ti m'ertu iputakm a p'akr, a ti akavm'akarar atua kinkin, akavpatei atua kinkin, v'eti apavpatei Atuar uaki!

²⁹ Sena si lera, kana p'etu v'nen hua ipamk hilaha: Ipavr ti m'ertu kinkin, v'aha v'anu kinkin, v'aha m'ertu iv'ana arna v'nen uraur kinkin, ipavr si kinkin, la iaviviln ha, inep'a ti v'nen lera ipamlen Atuar a Satrak, a Misak, m'ei Apetniku, apatrpapr p'akr, sarei apani ti nmahar apavv'i tih nap' uaki, sena ti atua uraur ihei, la irndu ti ipalev'la m'ertu ipanap'i laha.”

³⁰ Sarei, a mlin itaui ti a Satrak, a Misak, m'ei Apetniku apavrama kavv'i mlin lilil arna v'anu a Papilun.