Taniel 2 - V'nen P'as iv'i Turanien Trtarep' m'a Turanien M'dah

A Nepukatnesa ila sei naran im'atr

¹ Arna tv'el pai na ti a Nepukatnesa iv'i mlin, a Nepukatnesa lera im'atr kala sei nakl. Laha, irn istu arna m'im'iln, dav'a, iarndu ti ipam'atr dau.

² Laha, a mlin iv'ana hua, kavr ti apav'ara anr m'ertu, la avsapa p'kl tutuah ha, m'er arm'ertu avv'ah msi nakl, m'er tiet, m'er arki a Kaltia, a ti apavvrp'ep'a sei a mlin ilei naran im'atr. Laha, avrav'a kavp'tir arna nahn a mlin.

³ Sarei, a mlin iv'ana m'er, kavr ti a, “Kana ntla sera si iamk naran nm'atr. Laha, arna m'im'ilk, nrn ti p'erndu ti si lera iv'iv'en v'ata a kana.”

⁴ Sarei, arm'ertu a Kaltia avv'ana m'ei a mlin arna v'nenar arm'ertu a Siria (iv'i Arameik), kavvr ti a, “!U mlin, nakm pasilv' ikahiris naran! Pavrp'ep'a sei nakm ktla sarei a kam'em', sarei p'vrp'ep'a ti iv'iv'en v'ata.”

⁵ V'eti a mlin ivrpranr m'ertu a Kaltia lera, kavr ti a, “Nkavav v'ahienak. Ipavr ti kam'i mkavvrp'ep'a sei nlei a kana, m'a sei si lera iv'iv'en a kana, apatrpapr p'akm'i, sarei apani ti nmaham'i apavv'i tih nap' uaki.

⁶ V'eti ipavr ti pavvrp'ep'a sei kana nlei, kavvrp'ep'a ti iv'iv'en v'ata a kana, p'etu si p'sp'as a kam'i, katu nav'et lil ipastudau. Sarei, arm'ertu udlani apavv'ah ti kam'i kvv'i m'ertu lilil. Sena si lera, pavvrp'ep'a sei kana nlei, m'a sei iv'iv'en a kana.”

⁷ Sarei, avvrprani ml, kavvr ti a, “Nvmiman ti a mlin ipavrp'ep'a sei hin itla sarei anr arm'ertu na m'akarienan, sarei kam'em' p'vrp'ep'a ti iv'iv'en v'ata.”

⁸ Laha, a mlin ivrpranr, kavr ti a, “Ntrndu sarei ti kam'i pavkanut ipanap'i laha, sena ti kam'i ktvla sarei ti v'nen, la nttu sarei ha, ipap'tir uaki.

⁹ !Ipavr ti mkavvrp'ep'a sei, la ntla sarei naran nm'atr ha, v'nen hua ipamk ipaier kam'i! Sena ti kam'i ktvvrvr sarei a kam'i a ti pavvrp'ep'a hap'ilien a kana, m'a v'nen stu, inep'a ti pavani dav'a ti si kinkin uraur ipama katu hin, ipatauatah a naran laha. Sena si lera, pavvrp'ep'a sei kana nlei naran nm'atr. Ipanap'i lera, kana p'erndu ti kam'i pavrndu ti pavvrp'ep'a ti iv'iv'en v'ata.”

¹⁰ Sarei, arm'ertu a Kaltia avvrpren a mlin, kavvr ti a, “M'ertu kinkin ihei arna nadep' ka laha irndu ti ipavrp'ep'a sei a mlin iv'ahuri. Inap'i lera, mlin kinkin, v'aha m'ertu lil kinkin, v'aha m'ertu ip'aur nut kinkin idamumiman sei inap'i lera anr tiet, v'aha m'ertu la avvrur nal nakl ha, v'aha m'ertu a Kaltia.

¹¹ Sei a mlin imimani iv'i si hua lil iamk. M'ertu kinkin ikavrp'ep'ei an a mlin, v'eti nsarei aratua uaki nakl apavrndu ti apavani, sena ti ahavlak asnr m'ertu na nadep' nakl.”

¹² Laha, sena si lera, a mlin nln irer, aau, nln irer istudau. Sarei, itu v'nen hua iamk, kavr ti aparpep'nr arm'ertu udlani, la aviak a v'ahien p'as ha, arna nut a Papilun.

¹³ Inap'i lera, v'nen hua lera iv'el, sarei avandinei ti apavrpep'nr arm'ertu aviak a v'ahien p'as. Laha, avtala an a Taniel, m'er tv'aln, a ti apavrpep'nr.

Atua iv'iv'en sei a Nepukatnesa ilei naran im'atr

¹⁴ Laha, a Taniel ivrur si lera m'er m'ertu uraur, sarei kavrpren Ariuk, iv'i mlinar m'rnuran a mlin, la itv'el sarei a ti iparpep'nr arm'ertu, la aviak a v'ahien p'as ha, arna nut a Papilun. Laha, ivrprani arna navanel viviln, sena ti iak a v'ahien p'as.

¹⁵ Laha, ivrpran Ariuk, la iv'i mlinar m'rnuran a mlin ha, kavr ani, kavr ti a, “?V'nen hua laha itdan sarei asn a mlin ilahml sarei uaki sena v'ata?” Sarei, Ariuk ivrp'ep'a sei a mlin itvr sarei, a Taniel iv'rn ani.

¹⁶ Sarei, a Taniel iv'a eim, kamiman an a mlin a ti ipalaksrahi ipasusupa, a ti ipavrp'ep'ei an a mlin sei itla sarei naran im'atr.

¹⁷ Sarei, a Taniel im'alet a utan, kavrp'ep'a v'nen lera anr a Hananaia, a Misael, m'ei Asaraia, avv'i tv'aln.

¹⁸ Iani inap'i lera, a ti apavmiman an Atua, la ilak arna nut eia ha, a ti ipamhmah anr kav'iv'en v'nen tutuah lera anr. Sena ti, ipavr ti ipanap'i lera, a Taniel m'er tv'aln akavram'a m'er duanar arm'ertu, la aviak a v'ahien p'as ha, arna nut a Papilun.

¹⁹ Sarei, Atua iv'iv'en v'nen tutuah an a Taniel, naran im'atr kala sei, naran iv'i lihat. Sarei, a Taniel ipatei Atua, la ilak arna nut eia ha.

²⁰ Laha, a Taniel itu tamat kavrpren Atua, kavr ti a, “Nahan Atua ipav'a eia, ikahiris naran, aau, ikahiris naran, sena ti v'ahien p'as m'a nut hua iv'i nkan.

²¹ Hin ivav napn nakl. Hin iani ti nut ivuv, kani ti nut ihaha. Ilev'lar mlin arna pariar, sarei kani ti mlin uraur avrama eia. Itu v'ahien p'as mau anr m'ertu, la atviak sarei a v'ahien p'as ha, kani ti m'ertu, la atvrndu sera sei ha, apavrndu sei mau.

²² Iv'iv'en sei iter al nut tutuah, aau, iv'iv'en si tutuah nakl. Hin irndu v'ata iter al m'alk, aau, inep'a ti nut ren ilak m'ei.

²³ U Atua, kana nvr si p'as anh, aau, npata naham, Nakm kv'i Atuan a tetiak. Nakm kttu sera v'ahien p'as m'a nut hua a kana. Nakm ktv'iv'en sarei a kana sei nvmiman anh, sena ti ktv'iv'en sera sei a kam'em', iv'i sei, la a mlin imimani ha.”

A Taniel ivrp'ep'a sei a mlin ilei naran im'atr

²⁴ Sarei, a Taniel iv'a asn Ariuk, iv'i m'ertu a mlin ittu sarei a ti iparpep'nr m'ertu, la aviak a v'ahien p'as ha, arna v'anu a Papilun. Laha, iv'a asnn, kav'ana inap'i laha m'ei, kavr ti a, “Marpep'nr m'ertu, la aviak a v'ahien p'as ha, arna v'anu a Papilun. Pauirv'a kana asn a mlin, sarei, kana p'ev'ana m'ei a mlin, kavrp'ep'a sei hin ilei naran im'atr, m'a sei si lera ipav'iv'en ani.”

²⁵ Sarei, Ariuk irakn kauirv'a a Taniel asn a mlin. Laha, iv'ana m'ei a mlin, kavr ti a, “Kana ntpasla sera dui iamk asnr arm'ertu nvlav'i a Suta. Hin ipavrp'ep'a sei a mlin ilei, kavrp'ep'a sei si lera ipav'iv'en ani.”

²⁶ Sarei, a mlin ivrpranr, kavr an a Taniel (la nahan iv'i Peltasasar ha), kavr ti a, “Nakm krndu ti pavrp'ep'a sei kana nlei naran nm'atr, m'a sei ipav'iv'en a kana?”

²⁷ Laha, a Taniel ip'tir arna nahn a mlin, kavrprani, kavr ti a, “Arm'ertu aviak a v'ahien p'as, m'er arm'ertu avv'ah msi nakl, m'er tiet, m'er arm'ertu avsapa p'kl tutuah, ahavrndu ti apavvrp'ep'a si tutuah, la a mlin itmiman sarei anr ha.

²⁸ V'eti Atua iamk iak, la ilak arna nut eia ha. Hin irndu ti ipav'iv'en si tutuah nakl. Laha, itv'iv'en sarei an a Nepukatnesa, la ivi mlin ha, sei ipatu hin arna napn ipatauatah. Sei nakm klei naran km'atr, aau, sei kv'ahuri naran km'atr arna piasam kala sei, inap'i laha:

²⁹ U mlin, sei ima arna v'ahienam naran km'atr arna piasam, iv'i sei ipatu hin ipatauatah a naran laha. Laha, Hin, la iv'iv'en si tutuah ha, itv'iv'en sarei anh sei ipatu hin uam.

³⁰ V'eti asnk, Atua idav'iv'en si tutuah laha a kana sena ti niak a v'ahien p'as kasiv'r m'ertu uraur, la avsilv' ha, v'eti iv'i sanam'em', aau, kam'em' arm'ertu la nvv'iv'en sei an a mlin ha. Sarei, iv'i sena ti nakm parndu mamh v'ahienam.

³¹ !U mlin, nakm klak kap'a sei, laha, palei, si lil iamk ip'tir, inepa ti iv'i m'ertu lil iamk! Laha, m'ertu lil lera, la ip'eset istudau ha, ip'tir arna nahm. Laha, ililet, kav'i sei apadedrn ani.

³² Laha, pt m'ertu lera iv'i kul p'as. Sarei, mrn m'er lm'an avv'i silva. Sarei, v'atn m'a lihan arv'i aian v'il.

³³ Sarei, tln eia iv'i aian, tln auei inep'a ti auhap'lten aian m'a vdrei.

³⁴ Laha, nakm klak kap'ei, sarei si iamk itr nav'et iamk, v'eti aharndu ti apala lm'a sei itr nav'et lera. Sarei, nav'et lera irp m'ertu lera arna tln (la arv'i aian m'a vdrei ha), kakakaprr.

³⁵ Sarei, aian, m'a vdrei, m'a aian v'il, m'a silva, m'a kul avrs, kavrdapri udlani. Laha, avrama kavnep'a sera nina m'lih, la idan arna nmah aldan uit aranan ha, naran nut ivuv. Laha, nalen ilev'lar udlani, akapasla nut pa nar kinkin. Sarei, nav'et, la irp m'ertu lera ha, ima kav'i ptha lil iamk, aau, ima kalil dav'a katavkar nadep' ka.

³⁶ Sei nakm klei naran km'atr inap'i lera ra. Hilaha, kam'em' p'vp'tir arna nahn a mlin, kavvrp'ep'a sei si lera ipav'iv'en anh.

³⁷ Nakm, mlin, kv'i mlinar mlin. Sena ti Atua, la ilak arna nut eia ha, ittu sera v'anu iamk anh, kattu sarei ti kv'i m'ertu lil iamk, kaiak a nut hua, m'a si p'sp'as nakl.

³⁸ Arna nut udlani arm'ertu na nadep' ka avlak, v'aha si dm al lili, v'aha m'anh arna p'knaran, Hin ittu sarar si lera al lm'am. Ittu sarei a ti nakm pav'i mlin lilar si lera udlani. Inap'i lera, nakm kv'i pt m'ertu lera--la aani a kul ha.

³⁹ V'eti ipatautah anh, v'anu ipamk ipama eia, v'eti ikahua ipanap'ah. Sarei, v'anu ipamk ml ipama eia, ipav'i nitla v'anu, kav'i aian v'il. Laha, v'anu lera ipav'i mlinar v'anu udlani arna nadep' ka.

⁴⁰ Sarei, niv'a v'anu ipahua kanep'a sera aian, sena ti aian ikakapr sei, kardapr si udlani nakl. Laha, inep'a nut aian, la ikakapr sei ha, iani inap'ei, v'anu lera ipakapapr sei kardapr v'anu uraur udlani.

⁴¹ Sarei, inep'a nut nakm kla ti tln m'a prh tln inep'a ti auhap'lten aian m'a vdrei (la arndu ti apam'akar m'ei ha) inap'ei, v'anu lera ipatupr hin. V'eti nut hua na aian ipater a nln uam, inep'a nut kla ti auhap'lten aian m'a vdrei (la iuir uam ha) inap'ei.

⁴² Sarei, inep'a ti prh tln avv'i aian auhap'ltani m'a vdrei, v'anu lera ipahua arna nut kinkin, v'eti arna nut kinkin uraur, ikahua.

⁴³ Inep'a nut nakm kla aian auhap'ltani m'a vdrei (la iuir ha) inap'ei, arm'ertu na v'anu lera apavuha hir m'er arm'ertu ururaur. Akavp'lt dau mhmah ml, ipanep'a sera aian, la ikap'lt dau m'a vdrei ha.

⁴⁴ Laha, arna naran armlin lera apavsilv' uam, Atua, la ilak arna nut eia ha, ipani ti v'anu ipamk ipap'tir, akautakm ani kalev'lei naran kinkin. Akaln v'anu lera sanar m'ertu uraur, ikahei. Ipakaprr v'anu udlani lera, kahiris anr. Sarei, ipap'tir ikahiris naran.

⁴⁵ Inep'a nut nakm kla ti atr nav'et lera dan arna ptha lil iamk inap'ei, v'eti kala lm'a m'ertu, la iani ha, sarei kla ti ikakaprr aian, m'a aian v'il, m'a vdrei, m'a silva, m'a kul--Atua Lil itv'iv'en sera sei an a mlin--sei ipatu hin ipatautah a naran laha. Sei nakm klei naran km'atr iv'i si dau iamk, sarei, sei kam'em' nvvrp'ep'ei anh iv'i v'nen dau.”

A Nepukatnesa itaui ti a Taniel m'er tv'aln apavv'i mlin arna v'anu

⁴⁶ Sarei, a Nepukatnesa, iv'i mlin, irs a nadep', ptn ier nadep'. Im'atr arna nadep' inap'i lera arna nahn a Taniel. Sarei, itu v'nen hua iamk, a ti apavtu uvrin ipamk ani, kaval sida p'as asnn.

⁴⁷ Laha, a mlin ivrpren a Taniel, kavr ti a, “Nvrdaui, Atuam iv'i Atuar atua uraur. Iv'i Mlin Lilar mlin nakl. Hin uaki iv'iv'en si tutuah, sena ti nakm krndu ti pavrp'ep'a v'nen tutuah laha.”

⁴⁸ Sarei, a mlin itaui ti a Taniel ipav'i m'ertu lil ipamk arna v'anu. Itu si p'sp'as istudau ani, kani ti iv'i mlin kap'aurr pruvins udlani arna v'anu a Papilun. Sarei, itaui ti ipav'i m'ertu ipap'aurr m'ertu, la aviak a v'ahien p'as ha, arna v'anu a Papilun.

⁴⁹ Sarei ml, a Taniel imiman sei an a mlin. Sarei, itaui ti a Satrak, a Misak, m'ei Apetniku apavv'i m'ertu apavp'aur sei nakl arna nut udlani a Papilun. V'eti a Taniel ilak asn pn liu na nmah lilan a mlin.