Taniel 12 - V'nen P'as iv'i Turanien Trtarep' m'a Turanien M'dah

¹ Arna naran lera, a Maikel ipap'tir, iv'i mlin lil la ip'tir kap'aurr a natr arm'ertuam ha. Laha, der lil ipama, aau, ipalilet. Adamulela der inap'i lera, itudina hin arna naran v'anu, la iter itauamu ha iak, dav'a kaier hilaha. Laha, arna naran lera, hir udlani, la atulul sera nahar arna puk ha, apavlak p'as, sena ti apalev'lar arna der lera.

² Laha, m'ertu ipastudau, la avm'atr a nv' nadep' ha, apavthal. Hir kinkin lera apavthal a ti apavsilv' ikahiris naran, sarei, arki uraur apavthal a ti apavmamih, laha, apasip'lanr ikahiris naran.

³ M'ertu, la aviak a v'ahien p'as ha, apaver kavnep'a sera sei ier arna liha masamas. Hir, la avm'akar a ti m'ertu apavviviln arna nahn Atua ha, apavnep'a sera msi, dav'a ikahiris naran.

⁴ V'eti nakm, Taniel, patutuan v'nen, aau, pap'leskar puk dav'a ti sei ipahiris. M'ertu ipastudau apavvrvr kavrav'a, sarei kavrama ml. Sarei, m'ertu apavrama kavrndu sei mau.”

⁵ Sarei, kana, nv'i a Taniel, nklau eia. Laha, nla m'ertu arru arp'tir. Nki iamk ip'tir arna p'ak nauei laha. Sarei, tv'aln ip'tir arna p'ak nauei a tv'eliel.

⁶ Laha, nki iamk iv'ana m'a nki iua klus aani a kalik, la ip'tir eia na nauei ha, kavr ti a, “?Apatrah si laha, la avv'i sei m'ertu apatah ani ha, ipaier v'aran?”

⁷ Sarei, nrn m'ertu, la iua klus aani a kalik ha, la ip'tir eia na nauei ha, iv'ana. Iah m'ldu lm'an eia, kah lm'an, arna m'ir nen, eia, inep'a ti apavier nut eia. Sarei, iv'ana hua arna nahan Atua la isilv' ikahiris naran ha, kavr ti ipav'i sena naran ipamk, m'a naran uraur, sarei pna naran ml. Laha, naran atkakapr sera nut huar arm'ertu p'as, si udlani lera apavhiris.

⁸ Laha, nrn sei ivri, v'eti inep'a ti narndu mamh sei ivri. Sarei, nv'ana, kavr ti a “?Mlinak, si laha nakl apavhiris v'aran?”

⁹ Sarei, iv'ana, kavr ti a, “Taniel, pav'el, sena ti attutuan sera v'nen ra, atp'leskar sarei dav'a ti si udlani ipahiris.

¹⁰ M'ertu ipastudau apavrama kavp'as, apavtva, aau, der ipalev'la tkv aranar, v'eti arm'ertu stu apavan si stu uam. Aau, arm'ertu stu kinkin akavrndu sei, v'eti arm'ertu aviak a v'ahien p'as apavrndu sei.

¹¹ Laha, ipatudina hin arna naran na ti atlev'la sera sakrivais (la aani arna napn udlani ha), arna naran na ti attu mamh sei alep'lei (la iutakm a nmah tamat ha), ipav'i napn ipav'i 1,290.

¹² Atua ipamhmah a m'ertu ilaksrahi, la ilak dav'a ti napn ipav'i 1,335 atvv'siau sarei.

¹³ V'eti nakm pav'el dav'a ti si udlani ithiris sarei. Sena ti nakm parnrnh. Sarei, pilaph kalev' nadep'am naran napn udlani atvhiris sarei.”