Taniel 11 - V'nen P'as iv'i Turanien Trtarep' m'a Turanien M'dah

Armlinar v'anu arna Nut m'er v'anu arna Saut avan naur

¹ Sarei ml, arna pai itauamu na ti a Tarias (iv'i m'ertu a Mitia) iv'i mlin, kana, aau, kana, np'tir kasr lm'an, kani ti ima kahua mau.

² Hilaha, p'ev'iv'en si dau ipamk anh. Palei, mlin apartl ml apavp'tir arna v'anu a Pesia. Sarei, niv'a nar ipaiak a sei ipastudau, aau, ipasiv'r arki lera udlani. Sena ti nut huan ilil, nav'etan istudau, hin ipuhar m'ertu udlani, a ti apavmlen v'anu a Kris.

³ Sarei, mlin hua lil ipamk ipap'tir. Ipav'i mlin lil ipamk, v'anuan ipalilet. Laha, ipan si udlani hin uaki irn ti ipani.

⁴ Sarei, naran itp'tir sarei, apakakapr v'anuan, katupapri ipav'a arna nut la nalen arv'a (4) na p'knaran avdan aranan ha. Ipanap'i lera, v'anu ikahv'i nkar a natn kinkin, aau, ikanep'a sera v'anu, la hin ip'auri ha. Sena ti aparv'la v'anuan, katau a m'ertu uraur, akavv'i a natn.

⁵ Sarei, a mlin na v'anu arna Saut ipama kahua, hin m'a m'ertu lil ipamk arna v'anuan. Sarei, m'ertu lil lera ipama kahua kasiv'i, sarei kav'i mlin. Laha, ipap'aur v'anu ipamk, v'anu lera ipalilet.

⁶ Sarei, naran pai kinkin apavv'siau, apavp'lt, sena ti a natn tav'etan a mlin na v'anu arna Saut ipav'a asn a mlin na v'anu arna Nut, a ti apavan turanien ipamk. V'eti tav'et lera ikap'tir ipahua ipap'arei. Sarei, dui lera ikap'tir ipahua. V'eti apatu tav'et lera al lm'ar m'ertu ahavlap'as ani, hin, m'er arm'ertu avuirv'a asnr, m'ei a tetian, m'er arm'ertu, la avsr lm'an arna naran lera ha.

⁷ V'eti ranan ipamk, la ipadan arna uarn ha, ipap'tir kaua m'lna dui lera. Hin ipama m'er m'rnur, kadav'a eim al nmah hua lilan a mlin na v'anu arna Nut. Ipan naur m'er arm'ertu atlera, kasiv'r.

⁸ Sarei, ipauirv'ar atuar, a ti apavp'resin arna v'anu a Itsip. Ipalev'lar mlinar m'er si p'sp'asar (la avani a silva m'a kul ha). Sarei, apaspan pai, kala ti hin itv'i sera mlin kasiv' naran na ti a mlin arna Nut itv'i sera mlin.

⁹ Sarei ml, a mlin arna Nut ipav'a arna v'anuan a mlin arna Saut, v'eti, ipatauatah, hin ipam'alet ml arna v'anuan.

¹⁰ V'eti a natn apavuha sei, kavani ti m'rnur ipanelnal apavp'lt a nut ipamk. Sarei, nki ipamk nar ipav'a kasiv'r m'ertu, kav'el kadav'a arna v'anu. Sarei, ipam'alet ml arna v'anu hua lilan, kuha sei ml.

¹¹ Sarei, a mlin arna Saut nln iparer ipastudau. Sarei, ipav'el kan naur m'ei, aau, ipan naur m'a mlin arna Nut. Laha, a mlin arna Nut lera ipani ti m'rnur ipanelnal apavp'lt a nut ipamk, v'eti arm'ertu lera apavrars al lm'a m'ertu imlanr.

¹² Laha, naran itlev'la sarar nelnal lera, ipukl hin arna nln. Laha, ipasranr m'ertu ipanelnal ipav'anelnal (10,000) a nadep' v'eti ikasiv'r.

¹³ Sena ti a mlin arna Nut ipam'alet ml, kani ti m'ertu apavp'lt kavstudau kavsiv'r arki, la avrama itauamu ha. Aau, hin ipav'a, naran pai kinkin apavv'siau, hin m'er m'rnur ipastuduet, m'a sei ipastudau.

¹⁴ Laha, arna naran lera, m'ertu istudau apavp'tir kavmlen a mlin arna Saut. Sarei ml, ardu stu kinkin (la avkakapr sei ha) asnr arm'ertuam apavukl hir, kavvr ti avv'i m'ertu lilil, a ti sei nakm ktla sarei ipatu hin uam. V'eti ardu lera apavrars a nadep'.

¹⁵ Ipanap'i lera, a mlin arna Nut ipama kan m'ev' lil ipamk, a ti m'ertu ikahv'a eim al v'anu lil, m'ertu ikahv'a av'aran nen. Sarei, ipalev' v'anu hua lil ipamk. Laha, arm'rnur arna Saut akavp'tir arna nahn. Aau, arm'rnur p'sp'asan akavhua dau a ti apavp'tir kavmlani.

¹⁶ V'eti m'ertu ipamk ipamlani kan sei hin uaki irn ti ipani, m'ertu kinkin ikap'tir arna nahn. Ipap'tir arna V'anu P'as, kutakm a sei ipastudau, sena ti nut huan ililet.

¹⁷ Sarei, ipani ti nahn ipahua a ti ipav'a eim al v'anu. Hin ipani m'a nut hua na v'anuan, arm'ertu p'as apavsapei. Aau, ipani ipanap'i lera. Sarei, ipatu net tav'et ipamk ani, a ti iputakm ani, v'eti tav'et lera ikap'tir asnn, ikasr lm'an.

¹⁸ Itauatah a si lera, ipavav nahn kadav'a arna nut a p'ak nata. Sarei, ipalav'r nut ipastudau. V'eti mlin ipamk ipani ti der lil lera, la ipaiarr ha, ipahiris. Laha, naran ipalev'la der lil, hin ipam'alet ml kamlani.

¹⁹ Sarei, ipavav nahn ml, kadav'a arna v'anu hua lil arna v'anuan. V'eti ipatitihap'el kadars, akapaslei naran kinkin.

²⁰ Sarei, m'ertu ipamk ipap'tir kaua m'lnen. Dui lera ipani ti arm'ertu arna v'anu (la avr ti ip'eset ha) apavul takis nakl. V'eti naran napn idastudau atvv'siau sarei, aputakm ani kahiris ani, v'eti ikav'i sena nl rera m'ertu kinkin, v'aha sena naur kinkin.

²¹ Sarei, m'ertu stu ipamk ipap'tir kaua m'lnen. Akavr ti iv'i mlin, v'eti ipav'a kav'i mlin arna naran na tamat, ipalev' pari na mlin, sena ti ihap'il uaki nakl.

²² Sarei, ipalev'lar m'ertu arna nahn kakap'nr, sena ti ipahua kanep'a sera uiniv'. Sarei, ipani ipanap'i lera m'ei a mlin na turanien.

²³ Laha, naran atturan sera sei m'ei, hin ipahap'il uaki, a ti ipama eia arna v'anu. Aau, hin ipama kahua, v'eti ipav'i mlinar m'ertu ahavstudau ki.

²⁴ Ipanap'i lera, ipama arna tamat, kaiarr nut udlani arna pruvins, la avv'i nut nav'et iak ha. Laha, ipan sei hir a tetian m'er a pupuan ahavani. Ipatutu sei anr arm'ertuan, aau, ipatu si p'as, la alav'i arna naur ha, m'a si ml alav'i arna naur, m'a nav'et. Ipaiak a v'ahien iamk a ti ipamlanr nut hua nakl, v'eti ikanap'i lera ipap'arei.

²⁵ Ipuha hin, kap'tir ipahua, aau, ikadedrn a ti ipamlen a mlin arna Saut, hin m'er m'rnur, la avstuduet ha. Sarei, a mlin arna Saut ipuha hin a ti ipan naur m'ei, hin m'er m'rnur, la avstuduet kavhuet ha. V'eti mlin (la itauamu ha) lera ikasiv'r, sena ti apavv'ahur mamh navanel a ti apavsiv'i.

²⁶ Aau, m'ertu kinkin, la avhan pna si p'sp'asan ha, apavutakm ani kavhiris ani. Laha, apavlev'lar m'rnuran ipanep'a nut nauei irarev' ilahml sarei inap'ei. M'ertu ipastudau apavrars a nadep' kavram'a.

²⁷ Armlin arru lera aparv'ahuri arna nlr a ti aparan si stu nakl. Aparlak asn tiv' ipamk, v'eti aparhap'il uaki nakl. V'eti si lera ikahter ipap'arei, sena ti naran na ti si lera ipahiris ipama uam, arna naran attu sarei.

²⁸ Laha, naran ipav'el kam'alet arna v'anuan, aau, hin m'a nav'etan udlani, iparn ti ipamlen turanien p'as. Ipanap'i lera, iputakm a sei, sarei kam'alet ml arna v'anuan.

A Mlin arna Nut isip'len a Mlin Eia

²⁹ Arna naran attu sarei, ipam'alet ml kav'el arna navanel a ti ipaier nut arna Saut. V'eti ikanep'a sera nut nki itauamu iani, v'aha nki itauatah iani.

³⁰ Sena ti nauak dan a Saipres apavrav'a kavmlani. Sena si lera, iparn ipastu ipastudau, sarei kam'alet ml--v'eti nln iparer. Ipanap'i lera, ipamlen turanien p'as, kutakm a sei nakl. Ipam'alet, sarei, iparn ipap'as anr m'ertu, naran apavtetvan tahr a turanien p'as.

³¹ Sarei, ipani ti m'rnur apavp'lt a nut ipamk, kavutakm a nut hua, la itukar nmah tamat ha. Sarei, apavlev'la sakrivais, la arm'ertu avani arna napn udlani nakl ha, kavtu sei alep'lei atlera, iputakm a nut, dav'a ti ipama kav'i nut stu ipamk.

³² Laha, iputakm anr m'ertu, la avan si stu kavruh arna turanien ha, sena ti ipav'ana p'as m'er nakl. V'eti arm'ertu, la avrndu mamh Atuar ha, apavp'tir ipahua, kavan pari p'as nakl.

³³ Laha, arm'ertu, la avrndu mamh sei ha, apavv'iv'en sei anr m'ertu ipastudau. V'eti hir kinkin apavrars a nv' tali han, v'aha nap' iparpr, v'aha apavp'resin, v'aha m'ertu apavv'nah siar. Laha, ipanap'i lera napn ipastudau.

³⁴ Laha, naran apavrars ipanap'i lera, m'ertu kinkin apavsr lm'ar, v'eti apavani ipasusupa uaki. V'eti m'ertu ipastudau apavp'lt m'er, v'eti apavani arna navanel tutuah.

³⁵ Sarei, arki kinkin, la avrndu mamh sei ha, apavrars, a ti Atua ipadinar, a ti ipasileluar, a ti ipani ti (ipanep'a ti) apavtva, dav'a ti naran na si lera ipahiris, sena ti si lera ipatu hin dav'a ti ipaier naran attu sarei.

³⁶ Laha, a mlin lera ipan sei hin uaki irn ti ipani. Ipukl hin, kavrp'ep'a ti hin iv'i m'ertu lil iamk kasiv'r atua udlani. Ipasip'len nahan Atua (iv'i Atua kasiv'r atua udlani), kaiak a sei istudau, dav'a ti Atua ipahsran nl reran udlani. Sena ti sei attu sarei ipama katu hin pr.

³⁷ Dui lera ikav'ahur a Mlin Eia, la iv'i Atuar a tetian ha. Ikav'ahur tav'et naran avlap'as ani. Ikav'ahur atua kinkin. Sena ti ipukl hin kav'ah ti hin iv'i m'ertu lil kasiv'r udlani.

³⁸ Laha, ipav'ah atua nar v'anu hua lilil nakl. Atua lera ipaua m'lnar atua uraur, ipav'i atua hir a tetiar adavrndaui. Laha, ipapatei m'a kul, m'a silva, m'er nav'et p'sp'as, m'er si p'sp'as nakl.

³⁹ Laha, ipani ipanap'i lera, kamlanr v'anu hua lilil (la avhua ihuadau ha). Ipani m'ei atua na v'anu uraur. Ipav'ahi nakl, kav'el kalak p'as arna nut huan. Laha, ipani ti apavv'i mlinar m'ertu ipastudau, katupapr v'anu a ti ipalev' sei nakl.

A mlin arna Nut isiv'r m'ertu uraur

⁴⁰ Naran si lera itv'i ti ipahiris, a mlin arna Saut ipav'a kan naur m'ei. Sarei, a mlin arna Nut ipav'a kamlani. Laha, ipanep'a sera nalen lil ipamk. Ipav'a m'er kat na naur, m'er arm'ertu avua hus, m'er nauak ipastudau. Laha, a mlin lera ipav'a eim al v'anu ipastudau, kasiv'r, sarei kav'el mau.

⁴¹ Sarei, ipav'a eim al v'anu, avr ti iv'i V'anu P'as. Laha, ipakasrr v'anu ipastudau, v'eti arki laha apavruh a nv' lm'an: a Itum, a Muap, m'er arm'ertu lilil arna v'anu Amun.

⁴² Ipah lm'an a ti iparpr v'anu nakl. V'anu a Itsip ikaruh asnn.

⁴³ Ipauada nav'et na v'anu nakl, la iv'i kul m'a silva ha. Ipauadar si p'sp'as udlani arna v'anu a Itsip. Arm'ertu a Lipia m'er arm'ertu a Itiupia apavv'el kavsapei nakl.

⁴⁴ V'eti v'nen ipamk ipama dan arna Is, kadan arna Nut. Laha, v'nen lera ipani ti iparn ipastu. Sena si lera, ipav'el arna nl reran kutakm a sei ipastudau, kakap'nr m'ertu ipastuduet, aau, ipahiris anr.

⁴⁵ Laha, ipahl nmah kanuisan, la iv'i nmah p'asan ha, arna nadep' iter a p't nut nar nata nakl. Sarei ml, nut lera iter a p't nut na ptha lil (la ip'eset udlani ha). V'eti a mlin lera ipam'a uaki, m'ertu kinkin ikasr lm'an.