Taniel 10 - V'nen P'as iv'i Turanien Trtarep' m'a Turanien M'dah

A Taniel ila dui p'as iamk

¹ Arna nitla pai na ti a Sairus iv'i mlin a Pesia, v'nen iamk ima asn a Taniel, la tv'el nahan iv'i a Peltasasar ha. V'nen lera iv'i v'nen dau, v'eti ivrur naran iamk idahma uam, naran lera ip'eriet. Laha, irndu sei v'nen lera ivri, aau, irndu sei ilei.

² Arna naran lera, kana, nv'i a Taniel, nlak kavalau uik itl.

³ Nahan tim'ah p'as kinkin. M'it kinkin, v'aha naui m'iel kinkin, iaier pnk. Natu ueil kinkin arna p'akk, dav'a ti uik artl lera atvv'siau sarei.

⁴ Sarei, arna nal itauamu, arna napn inelru pln iv'a (24) na nal lera, naran nlak a p'ak naui lil, la avr ti iv'i Taikris ha,

⁵ nklau eia, kap'a nut. Sarei, palei, dui iamk ip'tir, iua klus aani a kalik. Sarei, iv'u sitrav iamk arna v'atn, iv'i kul, la alav'i arna nut a Uvas ha.

⁶ Laha, p'akn inep'a sera nav'et p'as, avr ti iv'i perel. Nahan inep'a sera nav'l ilev' m'aten. Sarei, m'aten inep'a sera nap', lm'an m'er tln avnep'a sera aian v'il, la atm'akar sarei aranan a ti ipap'eset ha. Sarei, naran iv'ana, drln inep'a sera drlr m'ertu avnelnal kavkakar.

⁷ Laha, kana, nv'i a Taniel, nmamk uaki kala si lera. Sena ti arm'ertu avlak asnk ahavla sei kana nlei. V'eti avlak kavdedrn istudau, laha, avvrvr a ti apavtutuah.

⁸ Sena si lera, nlak mamk uaki naran nla si lil lera. Laha, nahua arna p'akk, sena ti nut huak iruh asnk, np'k istu udlani. Aau, nrn ti nut huak ihei ml.

⁹ V'eti nrn drl v'nenan. Laha, naran nrn drl v'nenan lera, nm'atr dul arna nahk, aau, nahk ier nadep'.

V'nen ier a Pesia m'ei a Kris

¹⁰ Sarei, iv'amk, lm'a m'ertu iamk ier kana. Iani ti plk tlk m'a m'e lm'ak avvrdedrn.

¹¹ Laha, iv'ana m'a kana, kavr ti a, “U Taniel, nakm kv'i m'ertu la Atua ilap'as ani ha. Parndu mamh v'nen kana p'evr anh hilaha. Pap'tir mamh, sena ti attep'a sera kana asnm.” Naran iv'ana kavrp'ep'a v'nen lera a kana, np'tir kavrdedrn.

¹² Sarei, ivr a kana, kavr ti a, “Taniel, madedrn, sena ti, itudina hin arna napn itauamu na ti kv'ahuri ihua a ti parndu sei, aau, naran krn ti palak a nadep' arna nahn Atuam, Hin iv'rn a v'nenam. Laha, kana ntama sarei sena v'nenam lera.

¹³ V'eti a mlin na v'anu a Pesia imlen kana napn inelru, pln iamk (21). Laha, palei, a Maikel, la iv'i mlin lil iamk ha, ima kasr lm'ak, sena ti nlak mamk atlera m'er armlin a Pesia.

¹⁴ Hilaha, kana ntama sarei a ti p'ani ti parndu v'ata ipaiarr arm'ertuam arna naran ipatauatah, sena ti sei klei ivrur naran iamk, v'eti napn ipastudau apavv'siau dav'a ti ipatu hin.”

¹⁵ Laha, naran itv'ana sarei inap'i lera m'a kana, nvav nahk kap'a nadep', narndu ti p'evr si kinkin.

¹⁶ Laha, iv'amk, m'ertu iamk (inep'a ti ap'ei kav'ahur ti iv'i m'ertu iamk) ier pnk. Sarei, niela pnk kav'ana. Laha, nv'ana m'a m'ertu la ip'tir asnk ha, kavr ti a, “Mlinak, kana nrn istu istudau, aau, v'ahien lera ittavkar sera kana. Nut huak ihei ml sena sei ntla sarei.

¹⁷ Mlinak, kana nv'i m'ertu na m'akarienam. ?Kana p'ev'ana m'ah ipanap'i? Asnk, nut huak ihei ml hilaha. Narndu ti p'em'im'in ml.”

¹⁸ Sarei ml, nki ap'ei kav'ahur ti iv'i m'ertu, ier kana ml, kamhmah a kana, sarei, nut huak im'alet.

¹⁹ Laha, iv'ana, kavr ti a, “!U m'ertu, la Atua ilap'as anh ha, madedrn! !Tamat ipater aranam--nakm pahua, aau, pahua pr!” Inap'i lera, naran iv'ana m'a kana, nut huak im'alet ml. Sarei, nv'ana, kavr ti a, “A mlinak ipav'ana, sena ti kttum'alet sarei a nut huak.”

²⁰ Sarei, ivr a kana, kavr ti a, “?Nakm kv'ah ti nma asnm sena v'ata? Hilaha, kana p'em'alet kan naur m'ei a mlin a Pesia. Laha, naran kana p'ev'el, nvrdaui, a mlin a Kris ipama.

²¹ V'eti kana p'evrp'ep'a sei anh, ipav'i sei attu sarei arna V'nen P'asan Atua, la iv'i v'nen dau ha. Palei, m'ertu kinkin iap'tir m'a kana naran nmlanr arki lera, v'eti a Maikel uaki, la iv'i mlinam ha, hin uaki ip'tir m'a kana.