Taitas 3 - V'nen P'as iv'i Turanien Trtarep' m'a Turanien M'dah

Hir la atvv'ah sarei Atua ha, apavan pari p'as nakl

¹ Pavri ml nakl anr a ti apavlak a nv' v'nena kavman m'er mlin, kavsapar armlin, kavan pari p'as udlani.

² Amavsip'len m'ertu kinkin kavv'lv'al, v'eti apavv'len kavv'iv'en vtmien anr m'ertu udlani.

³ Sena ti tituei, nakd nvnap'ar. Ptd ihei. Navsapa v'nen. Nvv'ah v'nen hap'ilien, kavsapa si ururaur p'akd irni uaki, kavsapa sei nvrn ip'as ani, kavlak arna si stu. Nld ipr m'ertu uraur. M'ertu uraur ilep'la nakd, nakd nvlep'la m'ertu uraur.

⁴ V'eti Atua la ilev'la nakd ha, iv'iv'en nl p'asan kalap'as a m'ertu.

⁵ Hin ialev'la nakd sena pari p'as nvani, v'eti sena ti irn istu a nakd uaki kasilelua nakd kani ti silv'ienad im'dah arna paria M'im'iln P'as la iani ti nviakuri ml ha.

⁶ Atua itep'a M'im'iln P'as aranad istudau sanan a Iesu Kristu la ilev'la nakd ha.

⁷ A ti p'vviviln arna nahn sena vtmienan uaki, kavlev' sian, kavtrah silv'ien ikahiris naran.

⁸ V'nen laha iv'i v'nen dau. Nrn ti nakm pavrp'ep'a v'nen laha ipel, a ti hir la atvv'ah sarei Atua ha apavv'ahur ti apavan pari p'as nakl. V'nen lera ip'as kamhmah a m'ertu.

Marn v'nen hapr iv'i si kaka uaki

⁹ V'eti marn v'nen hapr iv'i si kaka uaki. Marn v'nen ivrur nl nam'el tituei. Map'lt m'a der m'a v'lv'elien ivrur v'nen hua, sena ti si lera udlani ikamhmah a m'ertu, v'eti iv'i si vn uaki.

¹⁰ Pav'ana hua m'a m'ertu ien ptn kakapr sas, ipav'amk sarei kav'aru sarei kasrani.

¹¹ Sena ti krndu mamh ti m'ertu inap'i lera, v'ahienan iaviviln. Hin ien si stu karndu ti ien si stu.

V'nen itauatah

¹² Naran p'etap'ei Atimas m'ei a Tikikas aparv'a asnm, nakm pandinei ipahua a ti pama asnk arna nut a Nikupulis, sena ti nrn ti p'elak atlera arna naran na m'la.

¹³ Nakm pam'akar ani ipahua a ti pasr lm'ar a Sinas, iv'i dui na v'nen hua, m'ei Apulus, kamhmah anr arna navanelar, a ti apaviak a si udlani.

¹⁴ Laha, nrn ti m'ertu arna sasad apavm'akar ani a ti apavan pari p'as nakl kavmhmah a m'ertu ahaviak a sei, imahei ti nava v'ahienar ikahei.

¹⁵ M'ertu udlani nvlak m'er avvr ip'as anh. Pavr ip'as anr nelnal avlap'as a kam'em' arna v'ahien p'as. Nrn ti vtmienan Atua ipater asnm'i udlani. Amen.