Sup 9 - V'nen P'as iv'i Turanien Trtarep' m'a Turanien M'dah

A Sup ivrpren a Piltat

¹ Sarei, a Sup ivrprani, kavr ti a,

² “Aau, nrndu ti v'nen kvri iv'i v'nen dau. ?V'eti m'ertu ipaviviln arna nahn Atua ipanap'i?

³ Ipavr ti m'ertu irn ti ipamlen Atua, V'eti ikavrpren Atua ipav'amk, ipavr ti ktrvrur sera sei iv'i tausen iamk (1,000).

⁴ Atua iak a v'ahien p'as, nut huan ililet. ?Hin ak itp'tir sarei arna nahn, katmlen sarei, sarei kalev' si p'as dan asnn?

⁵ Hin ilev'lar ptha lilil, v'eti ahvrndaui. Aau, ahavrndu naran na ti Atua ipavavp'lar, naran nln irer anr.

⁶ Hin iani ti nadep' idudul karuh a m'lnen, Kani ti nakalamu na nadep' avvrdedrn nakl.

⁷ Hin iv'ana hua m'a neiel, dav'a, iatpeia, Itukarr msi, a ti akalar ml.

⁸ Hin uaki ilmlm nut eia, Kav'el arna nahau na nata.

⁹ Atua ien msi nahan iv'i Pea, m'a Uriun, m'a Pleiatis, Kan m'lna msi arna Saut.

¹⁰ Ien si p'sp'as istudau, akapasladinei. Aau, ien sei atah ani, akaspandri.

¹¹ Ipavr ti ipav'el kav'siau asnk, v'eti nkalei ki. Ipavr ti ipasiv' kana arna navanel, nkarndu ti iv'i Hin, v'aha ihei.

¹² ?Ipavr ti Hin ipalev'la si kinkin, hin ak ipatukari? ?Hin ak ipavr ani, kavr ti a, ‘Nakm kan v'ata?’?

¹³ Atua ikalev'la nl reran, Arm'ertu la avp'lt m'er arm'ertu avukl hir nakl ha, apaviaul asnn uaki.

¹⁴ ?Inap'i lera, kana p'evrprani ipanap'i? ?P'ev'ahur sei p'evruri m'ei ipanap'i?

¹⁵ Imvr ti kana p'eviviln arna nahn, v'eti nkavrprani. Nsarei p'av'a asn Atua na v'nen hua, la iv'i Atuak ha, kamiman ani ipahua, a ti Hin iparn istu a kana.

¹⁶ Ipavr ti ipav'ana eia kavrpren kana, V'eti nkav'ah ti Hin ilak kav'rn a drlk.

¹⁷ Sena ti iutakm a kana m'a nalen lil, Katr kana, p'akk imaur istudau, v'eti narndu ti iv'i sena v'ata.

¹⁸ Iam'ahu a ti p'em'im'in ipap'as, Aau, iani ti nlini a si haau nakl.

¹⁹ Ipavr ti apavrur hin ak ihua mau, aau, Hin ihua ihuadau. ?Ipavr ti apavrur v'nen hua, hin ak ipatu napn a ti p'ep'tir asn m'ertu na v'nen hua?

²⁰ Ipavr ti p'ani ipaviviln, v'eti pnk ipav'ana kavrp'ep'a si stuak pr. Ipavr ti p'evr ti nv'i m'ertu ien si p'as nakl, v'eti v'nen lera ipav'iv'en ti naviviln.

²¹ Nla ti nv'i m'ertu nen si p'as, v'eti narndu mamh kana. Nlep'la silv'ienak.

²² Si udlani inap'amk uaki. Sena si lera, p'evr ti a, ‘Hin irpep'nr m'ertu avan si p'as karpep'nr m'ertu avan si stu.’

²³ Ipavr ti nahau, la arp m'ertu m'ei ha, iparpep'n m'ertu ipalahml sarei, Hin ivtma a m'ertu idahan si stu kinkin.

²⁴ Nla ti nadep' ka iter al lm'ar arm'ertu stu. Atua itukarr nahr armlin, la avv'ana hua m'a m'ertu ha. ?Ipavr ti iav'i Hin, iv'i hin ak?

²⁵ Hilaha, napnak avruh ilahml sarei uaki, inep'a sera m'ertu ivrvret. Avruh ilahml sarei, ahavla si p'as kinkin.

²⁶ Avv'el kavsiv' kana, inep'a sera nauak, la avvrvr ilahml ha, Avnep'a sera np'el, la itetv kaier si dm, la irn ti ipahani ha.

²⁷ Ipavr ti p'ev'ana, kavr ti a, ‘P'evnapn a si stu nvruri nakl, P'ani ti nahk ikav'iv'en ti nrn istu, aau, p'evtma uaki,’

²⁸ V'eti p'ededrn sanar der lilil, la avier kana ha. V'eti nrndu ti Nakm mkav'ah ti ndahan si stu kinkin.

²⁹ ?Ipavr ti ntlak sarei a nv' v'nen huam, P'em'akar sena si kaka sena v'ata?

³⁰ Ipavr ti p'esila kana m'a nauei, la iv'i snu itauamu ha, Kasila mamh lm'ak m'a suv,

³¹ V'eti Nakm pasran kana al tah lil, Sarei, klusak apavlep'la kana.

³² Sena ti Atua iav'i m'ertu, inep'a nut kana nv'i m'ertu, a ti p'evrprani, A ti p'erv'a asn m'ertu na v'nen hua.

³³ M'ertu ipap'tir a p't nut na kam'em' ihei, A ti ipatu lm'an aranam'em'.

³⁴ Nmiman an Atua a ti ipalev'la napilaktan asnk, a ti ikarp kana m'ei. Kana narn ti p'ededrn ani ml, sena ti ndedrn ani istuduet.

³⁵ Ipavr ti ipanap'i lera, p'erndu ti p'ev'ana m'ei, nkadedrn ani ml, V'eti hilaha ianap'i lera asnk.