Sup 6 - V'nen P'as iv'i Turanien Trtarep' m'a Turanien M'dah

A Sup ivrpren a Elivas

¹ Sarei, a Sup ivrprani, kavr ti a,

² “!U, kana nrn istu istudau! !Imvr ti aparndu ti apatina derak imp'as, Aau, imvr ti amtina der lilak, kala ti idv inap'i!

³ Sena ti, hilaha, idv kasiv' nun la iter al nata ha. Sena si lera, v'nenak iv'i v'nen asrani uaki nakl.

⁴ Sena ti naluan Atua na Nut Hua Udlani atvlua sera p'akk, M'im'ilk im'n pusen iter arna nalu lera. Atua iani ti ndedrn istudau, inep'a ti sei ndedrn ani ip'tir arna nahk kanep'a sera m'rnur ipamlen kana.

⁵ ?Tuki didi ikakar naran nina iak, v'aha ihei? ?Pluk ivalau naran suadan iak, v'aha ihei?

⁶ ?Apahan tim'ah ialalm, naran akapasla sul a ti apatau aranan, v'aha ikahei? ?Naran khan nahadrl ntu, krn ip'as a ti pahan nauei nen uaki?

⁷ M'im'ilk iarn ti ipaier si lera nakl, Avnep'a sera tim'ah alep'lei asnk.

⁸ !U, imvr ti a Mlin Eia imv'rn a sei nmimani, Aau, imvr ti Atua imtu sei a kana, la nrni istudau ha!

⁹ !Nrn ti Atua iparn ipap'as a ti iparp kana! !Nrn ti ipulnp'la lm'an, katrla kana!

¹⁰ Sarei, p'ern ipap'as. Aau, p'elak arna der lil karn istu, v'eti p'ep'tir mamh. Hin ikarn istu a kana, sena ti ndatutuan v'nenan Atua P'as.

¹¹ ?Nut huak iak, a ti p'ev'ah Atua, v'aha ihei ml? ?Kana p'am'a ipanap'i? Nrn ti p'erndaui a ti p'euadei ipahua?

¹² ?Nut huak inep'a sera nut hua na nav'et? ?P'akk iv'i aian v'il, v'aha inap'i?

¹³ ?Kana uaki p'emhmah a kana, v'aha ipanap'i? Nut hua na ti p'esiv' si laha ihei ml. ?Nsarei atp'ev' sarei asnk, dav'a ti ihei ml?

¹⁴ Ipavr ti m'ertu ipamk ipalak arna der, iviviln a ti tv'aln iparn istu ani, sarei kamhmah ani. Aau, ipavr ti m'ertu nen iadedrn an Atua na Nut Hua Udlani ml, v'eti tv'aln ipani uam.

¹⁵ V'eti artv'alk atvhap'il sarei m'a kana, aau, avnep'a sera naui pa, la alei al lili ha, Avnep'a sera nauei al nut papa nakl, avhiris ilahml sarei uaki.

¹⁶ Naui papa lera avram't sena ais, Snu iruh kadav'a a nln uaki.

¹⁷ Naran nut ima kavuv, nauei lera ahavvrvr ml, Aau, naran ivuv, avruh, ahaviak ml a m'lnar.

¹⁸ Avsapa navanelar kavrav'a a tv'eliel uraur, Avv'el kavrav'a a vut ki, sarei kavhiris.

¹⁹ Arm'ertu a Tema, la avv'el kavlak arna kam'el nakl ha, avklau anr. Arm'ertu a Sipa, la avv'el kavunanut uaki nakl ha, avv'ahurr.

²⁰ Avrn istu, sena ti, itauamu, v'ahienar ihua arna si lera, Avrav'a atlera, sarei, v'ahienar idedhar.

²¹ Sena ti, hilaha, kam'i kaavv'i si ki. Kvla ti der laha itsran sera kana a nadep', sarei, kavdedrn.

²² ?Kana ntvr sarei a kam'i naran kinkin, ‘Pavuirma si p'as ipamk a kana’? ?V'aha, ‘Pavlev' nav'etam'i, sena ti kviak a nav'et, sarei pavtu nav'et a m'ertu, a ti apavan sei sanak’?

²³ ?Ntv'ana sarei m'a kam'i, kavr ti a, ‘Pavlev'la kana al lm'a m'ertu imlen kana’? ?V'aha, ‘Pul kana, a ti p'eruh a nv' lm'ar arm'ertu avutakm a kana’?

²⁴ Pavv'iv'en sei a kana, sarei, p'euada nm'k, nkavr si kinkin. Pavvrp'ep'a sei a kana, a ti p'erndu nut nkasmni.

²⁵ !Aau, kana nrndu ti v'nen p'as ihua! ?V'eti naran kvv'lv'al nakl, kvan parei v'ata?

²⁶ ?Kvv'ah ti pavv'ana hua m'a kana sena v'nenak? V'eti sei nvrp'ep'ei iv'i v'nena m'ertu iarndu sei ml sena ti ptn ivdel, aau, inep'a sera nalen itvtv uaki.

²⁷ Aau, kam'i kvsiv' m'ertu a tetian ihei, Kavuha v'ahiena tv'elm'i.

²⁸ Sena si lera, pavrn ipap'as a ti pavp'a kana uaki, Sena ti kana nkahap'il m'a kam'i arna nahm'i naran kinkin.

²⁹ !Pavsapa v'ahienak hilaha, a ti p'vani ipaviviln! !Aau, pavln sei kvv'ahi hilaha, sena ti p'kl vivilnak ip'tir uam!

³⁰ ?V'nen kinkin, la iasapa v'nen hua ha, iter arna nm'k? ?Kvv'ah ti kana nkahandina sei, sarei karndu ti ipap'as v'aha ikap'as?