Sup 5 - V'nen P'as iv'i Turanien Trtarep' m'a Turanien M'dah

A Elivas ivr ti Atua iv'ana hua m'ei a Sup

¹ Pav'ara eia hilaha. ?M'ertu kinkin ipavrpranh, v'aha ikahei? ?Pav'a asnr m'ertu p'as v'ata?

² Naran m'ertu nln irer istudau, si lera iparpep'n m'ertu ptn ihei, Naran nl m'ertu ipr m'ertu, m'ertu lera ipam'a pr, iv'i m'ertu iarndu sei.

³ Kana ntla sarei ti m'ertu ptn ihei iparndu ti ipalak p'as arna nut ipamk, V'eti ipalahml sarei, p'vrp'ep'a ti nmahan ipater a nv' nl reran Atua.

⁴ A natn dui ahavlak arna tamat, M'ertu avvrvr kavkasrr, sarei avram'a, naran avp'tir asn pn liu uaki. M'ertu ipalev'lar arna der ihei.

⁵ Sena ti arm'ertu, la avrn nam'er ha, avhan sei hin ihli al pitvetan. Aau, avlev'la tim'ah asnr lu makau. Sarei, nam'et, la m'ertu ittu sarei ha, ilev'la siar udlani.

⁶ Sena ti der iaadan arna ieneiev', Aau, der iaadan arna nadep'.

⁷ V'eti naran m'ertu iak ser, v'eti der ipama ra, Inep'a nut mlinap' itetv eia inap'ei.

⁸ V'eti asnk, kana p'etala an Atua. Kana p'ava asn Atua, kavr sei nrni ani.

⁹ Sena ti Hin ien sei istudau, akapasla si udlani iani, Ien sei apatah ani ipastudau, akaspandri.

¹⁰ Itep'a nu arna nadep', Aau, itep'a nauei arna m'lden.

¹¹ Iani, a ti ipani ti m'ertu, la avlak a nadep' ha, apavp'tir eia, Aau, Hin iparmanr m'ertu, la avtakal ha, kataur arna nut p'as.

¹² Hin itukarr m'ertu, la avv'ah ti apavsnarr m'ertu uraur ha. Inap'i lera, lm'ar ahavrndu ti apavan sei, la avv'ahur ti apavani itauamu ha.

¹³ Hin iuadar arm'ertu, la avv'ah ti avrndu sei ha, aau, iuadar arna navanel, la hir prki avv'ah ti apavsnarr m'ertu aranan ha. V'ahienar arm'ertu na hap'ilien ipam'alet karpr ipalahml sarei uaki,

¹⁴ Naran nut iren, m'alk ima aranar uaki. Avklau a sei naran nut iren lihalm'au, inep'a nut avani lihat nakl.

¹⁵ V'eti Atua ilev'lar arm'ertu ahaviak a sei, a ti tali han ikaiarr, Ilev'lar asn pnr m'ertu hua, kalev'lar al lm'ar.

¹⁶ Inap'i lera, arm'ertu ahaviak a sei apavrndu ti apavv'ah ti si p'as ipatu hin uam, Inep'a ti si stu ikavr si kinkin anr ml.

¹⁷ Palei, ipavr ti Atua ipav'ana hua m'a m'ertu, m'ertu lera iparn ipap'as. Sena si lera, naran Atua na Nut Hua Udlani ipav'ana hua m'ah, malep'lei.

¹⁸ Sena ti Hin iani ti m'ertu irn istu, sarei, ihuda p'akr ml. Itr p'ak m'ertu, sarei, kamhmah anr m'a lm'an, laha, avrama kavp'as ml.

¹⁹ Ipalev'lah arna der ipalm'sei, Aau, arna saru nen, si stu kinkin ikaiarh ml.

²⁰ Arna naran na m'em'erien, ipullah, a ti mkahm'a. Arna naran na naur, ipalev'lah arna nut hua na tali han.

²¹ Atua ipatutuanh, naran nm'r arm'ertu, la avmlanh ha, avnep'a sera nahau arp m'ertu m'ei. Nakm mkadedrn, naran der lil, la iputakm a si udlani ha, ipama asnm.

²² Pavtma naran der, la iutakm a sei ha, ipama, v'aha naran m'em'erien lil ipama. Mkadedrn anr si dm, la avlak arna nadep' ka ha.

²³ Sena ti pan turanien m'er nav'et, la avrater arna m'lden ha. Sarei, si dm, la avlak arna m'lden ha, apavlak arna tamat m'ah.

²⁴ Parndu ti nmah kanuisam ipalak arna tamat, Pav'el kadav'a a utam, sarei, kala ti si stu kinkin idaiari.

²⁵ Nakm parndu ti a natm, la apavtauatah anh ha, apavstudau. Armardelam apavnep'a sera nina arna nadep'.

²⁶ Aau, naran ipav'i napn a ti nakm pam'a, pav'i m'ertarep' dau, Aau, ipanep'a sera naran kun im'am'd naran iv'i napn a ti apalav'i.

²⁷ Palei, kam'em' ntvv'ahur mamh sera si lera nakl, iv'i v'nen dau. Pav'rn ani, sarei, parndu ti inap'i lera ra.”