Sup 4 - V'nen P'as iv'i Turanien Trtarep' m'a Turanien M'dah

A Elivas iv'ana m'ei a Sup

¹ Sarei, a Elivas, iv'i dui a Teman, ivrprani, kavr ti a,

² “?Ipavr ti m'ertu ipandina ti ipavr si kinkin anh, nakm parn np'm, v'aha ikahei? ?V'eti hin ak irndu ti ipauada hin, a ti ikav'ana?

³ Nvrdaui, nakm ktv'iv'en sera sei anr m'ertu istudau, Nakm ktmhmah sarei a m'ertu, la nut hua na lm'ar ihei ml ha.

⁴ V'nenam ituada sera m'ertu, la itv'i ti ipars ha. Nakm kttu sera nut hua anr p'lk tlr m'ertu la nut huar ihei ha.

⁵ V'eti hilaha si lera ima aranam, sarei, krn np'm. Iarh, sarei, krn istu.

⁶ ?V'eti naran padedrn an Atua, si lera ipani ti v'ahienam ipahua, v'aha ikahei? ?Naran pan sei iviviln, parndu ti patrah Atua, v'aha ikahei?

⁷ ?Hin ak itam'a sarei, v'eti idahan sera si stu? Mavnapn a si lera. ?Atua itrpep'nr arm'ertu viviln, v'aha inap'i?

⁸ Kana ntla sera si laha, arm'ertu avhl nadep' m'a si stuar, kavlaui. Sarei, naran apavlev' navan, navan ipav'i sei atvlu sarei.

⁹ Atua ipam'im'in ipahua, sarei, apavram'a. Naran nln iparer, ipam'im'in ihua, sarei karpep'nr kahiris anr.

¹⁰ Aau, laiun lil ipasusual, drl laiun lil lera ipav'iv'en ti iadedrn a si kinkin. Sarei, ipakapapr lur net laiun nakl.

¹¹ Laiun trtarep' ipam'a uaki, sena ti si slm ihei a ti ipahani, Net prapar na laiun apavamkma kavunanut.

¹² V'nen iamk ima asnk, iv'i v'nen tutuah, Drlnak irn v'nen lera, v'eti inep'a sera m'ertu inanau kavri.

¹³ Nrn si iamk, v'eti iv'i v'ahien iamk iani ti nalak ms arna v'ahienak, iv'i sei alei naran am'atr lihat nakl, Naran nm'atr dul nakl.

¹⁴ Kana ndedrn istudau, aau, nvrdedrn, Iani ti suk udlani avdudul.

¹⁵ Sarei, m'im'iln iamk iv'el kasiv' nahk, Nilk la iter arna p'akk ha ip'tir.

¹⁶ Laha, ip'tir, iav'el, v'eti naledu ti iv'i v'ata. Si iamk ip'tir arna nahk, V'eti iavr si kinkin. Sarei, nrn nadl iamk, ivr ti a,

¹⁷ ‘?M'ertu kinkin irndu ti ipaviviln kasiv' Atua? ?M'ertu kinkin irndu ti ipap'as kasiv' Atua, la iani ha?

¹⁸ Ipavr ti Hin iav'ah m'ertu na m'akarienan; ?Ipavr ti ivr ti enselan avan si stu nakl,

¹⁹ Hin ipani ipanap'i m'er arm'ertu avlak al nmah la aani a vdrei, La nakalamu nar iv'i neiev' uaki, La kakrus irndu ti ipap'tir aranar kakaprr ha?

²⁰ Apakapaprr m'ertu lera m'etav'aran ipaier lihat, Apavram'a, ikahiris naran, v'eti m'ertu kinkin ikav'ahurr ml.

²¹ P'kl p'asar iparuh asnr uaki. ?Nvrdaui, v'aha ihei? Apavram'a, v'eti v'ahien p'asar ikahei ml.’