Sup 24 - V'nen P'as iv'i Turanien Trtarep' m'a Turanien M'dah

¹ Atua na Nut Hua Udlani irndu napn na si udlani, akatutuani asnn. ?Sena si lera, arm'ertu, la avv'ahi ha, ahavla napn ittu sarei sena v'ata?

² Sena ti m'ertu kinkin avlev'lar dari nakl, Avv'nahr sivsiv, kavuadar ihua a ti apavv'i suadar.

³ Avtp'ev' tuki, la iv'i nka m'ertu a tetian ihei ha. Avlev'la pluka tvtanu, sena ti avtrah ti ipatu nav'et anr.

⁴ Avla m'ertu iamk, imiman anr a ti apavsr lm'an, sarei, avtp'i, irs arna tv'eliel na navanel. Avani ti arm'ertu na v'anu, la ahaviak a sei ha, avtutuah uaki, sena ti avan sei inap'i lera nakl.

⁵ Nvrdaui, avnep'a sera tuki didi, la avlak arna nut kaka ha, Avrav'a ti apavan parei, kavtala a suadar. Nut kaka itu tim'ah anr, katau anr a natr.

⁶ Avtupien sei avlav'i arna m'lden, Kavtktak a sei arna nut alu krep, iv'i nadep'ar arm'ertu stu.

⁷ Avlak lihat, v'eti avmalmal uaki, klusar ihei. Ahaviak a si kinkin a ti ipatavkarr naran avrn m'la.

⁸ Avuir sena nu, la irs arna ptha lilil nakl ha, Aau, avp'tir mima asn nav'et iamk, sena ti nmahar ihei.

⁹ Arm'ertu stu avlev'lua mardel, la a tetian ihei ha, naran inunu uam. Avani ti m'ertu sian ihei ien turanien iamk, sena ti avtrah ti ipatu nav'et anr.

¹⁰ Avani ti m'ertu sian ihei imalmal, klusan ihei ml, Aau, avlev'la uit asn m'ertu irn nam'er nakl.

¹¹ Arm'ertu lera avm'akar a ti apavlev' ueil, v'eti avlak al nmahar uaki, Avlden uit arna nut na naui m'iel, v'eti avrn navar uam.

¹² Arm'ertu, la itv'i ti apavram'a ha, avrn istu kavvalau papa arna v'anu lil, M'im'ilr arm'ertu, la atvtr sarar ha, avtakal eia; V'eti Atua iavr ti arm'ertu lera atvan sera si stu.

¹³ M'ertu kinkin aviak, avtetvan tahr a nut ren. Ahavrndu p'kl nut ren lera, Ahavv'el mamh arna navanelan.

¹⁴ M'ertu, la irpep'n m'ertu uraur nakl ha, ithal m'etav'aran nrnren, karpep'nr m'ertu siar ihei, m'er arm'ertu avmiman anr a ti apavsr lm'ar uaki. Naran nut ilihat, hin inep'a sera m'ertu iv'nah sei nakl.

¹⁵ Dui iv'nah tav'et ilaksrah knarev', naran nut itv'i ti ipam't. Sarei, iv'ana, kavr ti a, ‘M'ertu kinkin ikala kana.’ Sarei, itutuan nahn.

¹⁶ Naran nut im'alk, avkapr liu na nmah, Aau, nmah atvv'ahur sarei naran nut iren. Arm'ertu inap'i lera ahavrndu mamh nut ren.

¹⁷ M'etav'aran inep'a sera m'lk m'ien asnr. Ipavr ti m'ertu kinkin ipaledaur, apavtah kavdedrnet, ipanep'a sera ti m'lk m'ien iarr.

¹⁸ Arm'ertu lera avvrvret kavnep'a sera nauei naran ivrvr, V'eti ip'as a ti nadep'ar ipater a nv' nl reran Atua. Ipanap'i lera, m'ertu kinkin ikaruh arna navanel a ti ipav'a al nut hir avlu krep nakl.

¹⁹ Inep'a nut m'em'erien m'a nut vuv ilev'la nauei iv'i snu ilahml sarei uaki, Nut atin m'ertu (nahan iv'i Siul) ipahanr arm'ertu, la atvan sera si stu ha.

²⁰ Ip'as a ti naten na mardel ipavnapn a m'ertu lera, Aau, ip'as a ti ptpat ipahani karn ti p'akn ilalm. Ip'as a ti akav'ahuri ml, dav'a ti aprus si stu inep'a nut aprus nai inap'ei.

²¹ M'ertu lera ilev' tim'ah asn tav'et ikalev' sei, la iv'i ptm't ha, Iamhmah a tvtanu arna nut kinkin.

²² V'eti Atua irv'lar m'ertu hua m'a nut huan, Naran ipilaph, m'ertu kinkin ikav'ah ti ipasilv'.

²³ Aau, Atua iani ti avlak mamh, sarei, ima kav'i sei avv'ah ti ipatu hin uaki nakl, V'eti Hin ip'a nut avan sei nakl.

²⁴ Avrama eia arna silv'ienar, v'eti akavnap'i lera ipap'arei, aau, ipatauatah akavlak ml. Atua iani ti avlak a nadep', ilev'lar arna navanel, inep'a nut iani m'er arm'ertu udlani uraur inap'ei. Avm'am'a, kavnep'a sera pla uit.

²⁵ ?Ipavr ti ianap'i lera, hin ak ipav'iv'en ti nv'i m'ertu na hap'ilien? ?Hin ak ipani ti v'nenak ipama kav'i si vn uaki?”