Sup 22 - V'nen P'as iv'i Turanien Trtarep' m'a Turanien M'dah

A Elivas iv'ana

¹ Sarei, a Elivas, iv'i dui a Teman, ivrprani, kavr ti a,

² “?Kv'ah ti m'ertu ipamk iparndu ti ipan sei Atua iparn ipap'as ani, Ipanep'a nut m'ertu, la iak a v'ahien p'as ha, iparndu ti ipan si p'as kamhmah a hin ipanap'ei?

³ ?Kv'ah ti Atua iparn ipap'as sena ti nakm kviviln? ?Kv'ah ti patu si kinkin ani, ipavr ti nakm kahan si stu kinkin?

⁴ ?Kv'ah ti Hin ipav'iv'en sei anh sena ti kdedrn ani? ?V'aha ipav'ana hua m'ah sena si lera?

⁵ ?Karndu ti si stuam ililet? ?Karndu ti nakm kan si stuet, sarei, kdahiris a ti pani?

⁶ Sena ti nakm ktlev' sera nav'et asn tv'alm sena si kaka uaki, Ktlev'la sera klusar m'ertu, la ahaviak a klus ha.

⁷ Kdatu nauei a m'ertu irn navan, Sarei, kdatu tim'ah a m'ertu irn nam'er.

⁸ V'eti dui hua iua v'anu, Aau, dui, la arm'ertu uraur avv'ahi ha, ilak arna v'anu.

⁹ Nakm ktp'ev' sarar tvtanu, kdatu si kinkin anr, Nakm ktutakm sarei a nut hua na mardel, la a tetian ihei ha.

¹⁰ Sena si lera, atvtu sera nam'et asnm, laha, avmldanh. Hilaha, nakm kdedrn istudau, iani ti krn istu a nlm.

¹¹ M'alk itama sarei, iani ti kala si kinkin, Aau, naui lil itama sarei a ti ipatavkarh.

¹² ?Atua ilak arna nut eia dau na liha masamas, v'aha ihei? Palei, msi, la avrater eia sp'n ha, avrater arna nut v'iv'a dau.

¹³ V'eti nakm kvr ti a, ‘?Atua irndu v'ata? ?Hin irndu ti ipav'ana hua m'a m'ertu naran nut im'alk dau?

¹⁴ P'knaran lil avtukar Atua, a ti ikala sei. Hin iv'el kasapa nut eia na p'knaran.’

¹⁵ ?Sup, nakm pasapa navanel la itater sarei tituei ha, La arm'ertu na si stu avv'el aranan ha,

¹⁶ Naran Atua irpep'nr naran idav'i naran na ti apavram'a, Naran ilev'luar nakalamuar naran uiniv' ima?

¹⁷ Hir lera avvr an Atua, kavvr ti a, ‘!Paruh asnm'em'! ?Atua na Nut Hua Udlani ipan v'ata a m'ertu?’

¹⁸ V'eti Atua ittu sera si p'sp'as anr, laha, nmahar avlini a si lera nakl. V'eti sei arm'ertu stu avrn ti apavv'iv'en a kana iter v'iv'a au a kana.

¹⁹ Arm'ertu avviviln avlei, sarei, avrn ip'as ani, Arm'ertu adavan si stu avvtma anr, kavvr ti a,

²⁰ ‘Nvvrdaui, Atua itrla sarar arm'ertu, la avmlen kam'em' ha, Nap' itlev'la sarar duanar.’

²¹ Hilaha, pav'a ml kalei Atua, sarei kalak arna tamat. Ipanap'i lera, ipataur si p'sp'as anh.

²² Nmiman anh, pav'rn a sei Atua iv'iv'en anh, la iendan al pnn ha, Patuda v'nenan Atua a nlm.

²³ Ipavr ti pam'alet asn Atua na Nut Hua Udlani, ipamhmah anh, sarei nakm pama kalil ml. Aau, Hin ipalev'la si stu, dav'a, ipater v'iv'a au a nmah kanuisam.

²⁴ Sarei, patu kulam al neiev' uaki, Patu kul, la alav'i a Uvir ha, asnr nav'et papa, la avrater al naui papa nakl ha.

²⁵ Aau, Atua na Nut Hua Udlani ipav'i kulam, Kav'i silvam (la ulien nen ililet ha).

²⁶ Sarei, naran lera, nakm parn ipap'as m'ei Atua na Nut Hua Udlani, Aau, paklau eia kap'ei Atua.

²⁷ Patu tamat ani. Sarei, ipav'rn anh, sarei, nakm pan sei ktturan sarei a ti pani.

²⁸ Aau, nakm pavrp'ep'a si ipamk, sarei, ipama kav'i si dau asnm, Ipanap'i lera, nut ren iparnren arna navanelam.

²⁹ Naran apavtp'h, a ti pars a nadep', pavr ti a, ‘!P'ep'tir uam hilaha!’ Naran lera, Atua ipalev'la m'ertu, la ilak a nadep' ha, arna der.

³⁰ Hin ipalev'la m'ertu, la iten sera si stu ha, Aau, ipalev'la m'ertu lera sena ti lm'am prki, la arp'as ha, aparlev'lei.”