Sup 21 - V'nen P'as iv'i Turanien Trtarep' m'a Turanien M'dah

A Sup ivrprani

¹ V'eti a Sup ivrprani ml, kavr ti a,

² “Pavv'rn a v'nenak, Aau, ipamhmah a kam'i.

³ Pavm'ahu a ti kana p'ev'ana. Sarei, naran p'ehiris a v'nenak, pavsip'len kana uam.

⁴ Asnk, naran nvrur sei nrn istu ani, nav'ana m'a m'ertu. ?Imvr ti nmv'ana m'a m'ertu, iviviln a ti p'erdus nlk sanan?

⁵ Pavp'a kana, kavtah a kana, V'eti pavtu lm'am'i arna pnm'i.

⁶ Aau, naran nv'ahur sei ittu sera hin itauamu, ndedrn istudau, P'akk ivrdedrn istudau sanan, inep'a ti iuada kana.

⁷ ?Arm'ertu na si stu avsilv', Kavtrtarep', v'eti nut huar iak, aau, avhuet uam, sena v'ata?

⁸ A natr itauatah anr avp'tir mamh kavlak m'er, A natr avlak arna nahr.

⁹ Avlak al nmahar, ahavdedrn a sei, Napilaktan Atua iaiarr ki.

¹⁰ Plukar avtaur net pluk nakl, ahavkasmni naran kinkin, Aau, prapar na plukar aviak a net pluk, hir udlani avsilv'.

¹¹ Arm'ertu lera avtap'er a natr, avp'lt kavv'el kavnep'a sera sivsiv, Armardelar avan naval nakl.

¹² Avlev' hmau pa m'a kita lil, kavhai, Kavrn ip'as naran avrn drl sei nahan iv'i vlut.

¹³ Avlak uaki arna napn udlani kaviak a sei istudau, Sarei, ilahml sarei uaki, avrav'a auei a ti apatinr.

¹⁴ V'eti, avvr an Atua, kavvr ti a, ‘Paruh asnm'em', Sena ti navrn ti p'vrndu sei, la ipav'iv'en navanelam ha.

¹⁵ ?Atua na Nut Hua Udlani iv'i hin ak, a ti p'vv'i m'ertu na m'akarienan? ?Ipavr ti p'vtu tamat ani, ipul kam'em' ipanap'i?’

¹⁶ Nvrdaui, aviak a sei istudau, v'eti iahter al lm'ar, Arm'ertu na si stu avrn ti apavv'iv'en sei nakl, v'eti kana np'tir v'iv'a au anr.

¹⁷ V'eti arm'ertu na si stu avhiris inep'a nut akam't lait inap'ei. ?Nvrdaui, v'aha ihei? Der lil ima kutakm anr iel, sena ti nl reran Atua itu si lera anr, laha, avrn istu istudau. ?Nvrdaui, v'aha ihei?

¹⁸ Avnep'a sera nina m'lih naran nalen iuadei katvi. Aau, avnep'a sera heia m'et na uit naran nalen lil ilev'lei.

¹⁹ Avvr ti a, ‘Atua ipatuda uliena si stua m'ertu, v'eti iparpr a natn uaki.’ Nrn ti Atua ipatum'alet a sei a dui lera, sarei, iparndaui pr.

²⁰ M'aten ipala der, la iputakm ani ha, Hin ipam'ndina nl reran Atua na Nut Hua Udlani.

²¹ Sena ti m'ertu inap'i lera ikav'ahurr arm'ertu al nmahan, la apavtauatah ani ha, Naran Atua ittrus sera nal hin ipasilv' arna nadep', inep'a ti pnen iter uaki.

²² ?M'ertu kinkin irndu ti ipav'iv'en sei an Atua, v'aha ikahei, Sena ti Hin ilak eia kav'ana hua?

²³ M'ertu iamk im'a naran nut huan iak uam, aau, naran ihuet uam, Ilak p'as uaki, kalak arna tamat.

²⁴ M'ilik, la iter a nln ha, iak uam, ilini ani, Ui sun iak uam, iam'am'a.

²⁵ V'eti m'ertu uraur im'a, karn istu istudau arna m'im'iln, Idahatat karn ip'as naran kinkin.

²⁶ Hir arru arm'atr al neiev', Ptpat avvrvr kavtavkarr.

²⁷ Palei, kana nrndu v'ahienam'i. Nrndu ti ktviak sarei a v'ahien a ti pavutakm a kana.

²⁸ Sena ti, kvvr ti a, ‘?Nmahan a mlin iter ip'i? ?Nmah kanuis, la iv'i nut m'ertu na si stu ilak ha, iter ip'i?’

²⁹ ?Ktvmiman sarei anr arm'ertu avv'el arna navanel, v'aha ihei? ?Kavrndu ti atvv'iv'en sera navanel a kam'i?

³⁰ Sena ti Atua ittu sarei a ti arm'ertu na si stu apavlaksrah napn na der lil. Apalev'lar kauirv'ar av'aran arna napn na nl reran Atua.

³¹ ?Hin ak ipav'ana hua m'ei, kavrp'ep'ei ani ti navanel iv'el aranan iap'as? ?Hin ak ipatum'alet a sei ani sena sei iten sarei?

³² V'eti apauirv'a m'ertu lera uam arna nut atin m'ertu nakl, Aau, m'ertu ipap'tir katukar navap attin sarei a nln.

³³ Naran lera, nalv na m'ihual ipalalm asnn. M'ertu udlani apavsapei pr, Ipanep'a nut m'ertu istudau, la akaspanr ha, atvtauamu sarei ani inap'ei.

³⁴ ?Sena si lera, inap'i hin kvv'ah ti pavmhmah a kana, v'eti kvsran v'nen uaki, Sena ti, naran kvvrpren kana, v'nenam'i ilini a hap'ilien uaki?”