Sup 20 - V'nen P'as iv'i Turanien Trtarep' m'a Turanien M'dah

A Suvar iv'ana

¹ Sarei, a Suvar, iv'i m'ertu a Namat, ivrprani, kavr ti a,

² “Iv'i sena si lera, v'ahienak, la avuha kana ha, avtp' kana a ti p'evrpranh, Aau, sena ti nrn istu istudau a nlk.

³ Ntrn sarei ti ktv'ana hua sarei m'a kana, katsip'len sera kana. Sei nrndaui inep'a sera nalen, itp' kana a ti p'evrpranh.

⁴ ?Nakm krndu ti, naran na ap'u, Itudina hin naran Atua itaur m'ertu arna nadep' ka, dav'a kaier hilaha,

⁵ M'ertu stu ipukl hin, v'eti ikanap'i lera ipap'arei? ?Nakm krndu ti m'ertu ip'ip'en lamuru iparn ipap'as, v'eti ipahiris ipalahml sarei uaki?

⁶ Aau, ipukl hin dav'a ti ipalil kaier nut eia, Ptn ipaier p'knaran.

⁷ V'eti hin ipam'a pr, ipanep'a nut nsn ipahiris ipanap'ei, akalei ml, ikahiris naran. M'ertu atavlela sarei apavvr ti a, ‘?M'ertu lera ilak ip'i?’

⁸ Ipatetv karuh, ipanep'a sera sei la av'ahuri naran am'atr ha itetv karuh inap'ei. Laha, akapaslei ml. Aau, apatkr ani, iparuh ipanep'a sera sei alei lihat iruh inap'ei.

⁹ M'eta m'ertu, la itla sarei itauamu ha, ikalei ml. Arm'ertu al nmahan akavp'ei ml.

¹⁰ A natn apavmiman sei asn m'ertu sian ihei, Sarei, lm'a m'ertu lera apavtum'alet a si p'sp'asan ml.

¹¹ Sun avhua uam, inep'a ti iv'i malakal uam, V'eti sun lera apavm'atr m'ei al neiev'.

¹² Aau, ipavr ti si stu ipalalm al pnn, Laha, ipatutuani a nv' nm'n,

¹³ Ipavr ti ipauadei, aau, ipavr ti ikaruh asnn, V'eti ipauadei al pnn uam,

¹⁴ Tim'ah lera, la ipav'a al v'atn ha, ipahaau pr, Ipama kav'i pusen na nmat iv'i kupra a nln.

¹⁵ Idrlm' si p'as istudau, Sarei kalui ml. Atua ilev'lei al v'atn, kasrani av'aran.

¹⁶ M'ertu lera ipam'n pusen na nmat nahan iv'i kupra, Nm'a nmat, nahan iv'i vaipa, iparpep'ni.

¹⁷ Ikala naui papa ml, Ikala naui lilil, la avlini a ns sukapak m'a m'ilik ha.

¹⁸ Ipatum'alet a sei itm'akar sanan, Ikadrlm'i. Ikarn ip'as a sei Iten sera pari lil a ti ipalav'i.

¹⁹ Sena ti itutakm sarar arm'ertu siar ihei, kattetvan sera tahn anr. Sena ti itlev' sera nmah, la hin idahli ha, aau, iutakm a m'ertu kalav'i.

²⁰ Sena ti iarndu ti ipalak ms a nln, Iparn sei, v'eti ikauadei ipap'arei.

²¹ Tim'ah a ti ipahani ihei ml, Sena si lera, p'akn ikap'as ipap'arei.

²² Ipav'ahur ti iarn ti m'ertu uraur ipasr lm'an, v'eti v'ahien lera ipani ti ipalak arna der lil. Lm'ar m'ertu udlani apavmlani, iparn istu ipastudau.

²³ Naran itv'i ti ipahan tim'ah lil, Atua nln iparer ani, ipanep'a ti ipasran nl reran aranan. Naran ipalak kahan suadan, nu ipau aranan.

²⁴ Su naur, la aani a aian ha, ipani ti iparuh ipalahml sarei, Tenpaui, la aani a aian v'il ha, ipaluei kavap'ni.

²⁵ Aau, m'ertu iuada tenpaui irv'i ihua a ti ipalua nalu. Sarei, nalu nen ivap'ni, kadan arna p'akn. Aau, nalu nen iendan al v'atn, ala ti iklkalan nakl. Laha, idedrn istudau sanan.

²⁶ Si p'sp'asan apavrater al m'alk, Nep'v'en, la nalen iatvi ha, ipaiari kahiris ani. Ipavr ti m'ertu kinkin ipalak uam al nmah kanuisan, v'eti ikap'as asnn.

²⁷ Nut eia ipav'iv'en si stuan, Nadep' ipap'tir kamlani.

²⁸ Nl nam'elan ikahma kalil mau, Ultinan akaviak ml, naran napn na nl reran Atua ipama.

²⁹ Si lera nakl avv'i sei Atua ittu sarei sena m'ertu na si stu, Avv'i sei Atua ittu sarei a ti ipav'i nkan.”