Sup 2 - V'nen P'as iv'i Turanien Trtarep' m'a Turanien M'dah

¹ Sarei ml, arna napn iamk, arm'ertuan Atua avrav'a ml a ti apavp'tir arna nahn a Mlin Eia. Laha, a Sitan ima kap'tir asnr, a ti ipap'tir arna nahn a Mlin Eia.

² Sarei, a Mlin Eia ivr an a Sitan, kavr ti a, “?Nakm kdan ip'i?” Laha, a Sitan ivrprani, kavr ti a, “Kana nunanut uaki arna nadep' ka. Nv'a ki laha, sarei kam'alet kadav'a a ki laha arna nadep'.”

³ Sarei, a Mlin Eia ivr an a Sitan, kavr ti a, “?Nakm ktv'ahur sera m'ertu na m'akarienak, iv'i a Sup? M'ertu uraur ihei inap'ei arna nadep' ka. Iv'i dui iamk ien si p'as istudau, p'kln iviviln. Iv'i dui idedrn an Atua, katetvan tahn a si stu nakl. Nakm ktp' kana a ti p'emlani, kutakm ani, kavr ti p'erpep'ni, v'eti iav'i sena si kinkin. V'eti hin iuada mamh p'kl p'asan uam.”

⁴ Sarei, a Sitan ivrpren a Mlin Eia, kavr ti a, “!P'ak m'ertu sena p'ak m'ertu! Aau, m'ertu ipatu sian udlani anh, ipavr ti pam'ahu a ti ipasilv'.

⁵ !V'eti ipavr ti Nakm pah lm'am asnn hilaha, kaier sun m'a p'akn, hin ipap'tir arna nahm kav'ana stu m'ah pr!”

⁶ Sarei, a Mlin Eia ivr an a Sitan, kavr ti a, “Palei, ntaui al lm'am, v'eti marpep'ni.”

⁷ Sarei, a Sitan iruh arna nahn a Mlin Eia, karp a Sup m'a nadei stu, itudina hin arna nut auei na tln dav'a kaier nut eia na ptn.

⁸ Sarei, a Sup ilev' vdrei iamk, a ti ipahrhar p'akn, naran ilak a p't nut na tih nap'.

⁹ Laha, a naun ivr ani, kavr ti a, “?Nakm pauada p'klm, la iviviln ha, uam, v'aha ipanap'i? !Pav'ana stu m'ei Atua, sarei kadam'a!”

¹⁰ Sarei, ivr ani, kavr ti a, “Nakm kv'ana inep'a nut m'ertu ptn ihei iv'ana inap'ei. ?Iviviln a ti p'erlev' si p'as asn Atua, v'eti nkarlak arna der Hin ittep'a sarei asnd?” Arna si udlani lera, a Sup iav'ana kan si stu kinkin.

Tv'aln a Sup avrav'a asnn

¹¹ Laha, naran tv'aln a Sup artl avrn ti der lil udlani lera atvrama sarei aranan, hir udlani p'sev' avandan arna v'anuar kavrav'a asnn. Tv'aln lera avv'i a Elivas, iv'i dui a Teman, a Piltat, iv'i dui a Sua, m'ei a Suvar, iv'i dui a Namat. Sena ti avtu napn iamk a ti apavrav'a kavlak m'ei, kavtakal m'ei, kavmhmah ani.

¹² Laha, naran avlak v'iv'a au uam, avklau eia, kavlei a Sup, v'eti ahavledaui. Sarei, avtakal eia. Hir udlani p'sev' aviapr klusar, kavssran neiev' eia, kavssrani arna ptr.

¹³ Sarei, avlak arna nadep' m'ei napn isaru, m'a lihat isaru. V'eti ahavr si kinkin ani, sena ti avla ti irn istu istudau arna v'ahienan.