Sup 19 - V'nen P'as iv'i Turanien Trtarep' m'a Turanien M'dah

A Sup ivrprani ml

¹ Sarei ml, a Sup ivrprani, kavr ti a,

² “?Kam'i pavutakm a m'im'ilk ipaier v'aran? ?Pavtrusus kana m'a v'nen ipaier v'aran?

³ Aau, ktvsip'len sera kana iv'anal. V'eti kaavmamih a ti ktvutakm sarei a kana.

⁴ Ipavr ti nten sera si stu, Aau, nkasmni, v'eti iter asnk uaki.

⁵ Ipavr ti kam'i pavvrp'ep'a ti kvv'i m'ertu lilil, sarei, kavmlen kana, Aau, ipavr ti pavvrp'ep'a ti kana p'emamih sena sei nani,

⁶ Pavrndu ti iv'i Atua iutakm a kana, Iv'i Hin imlden kana m'a nitan.

⁷ Ipavr ti nv'ara eia, kavrp'ep'a ti atvutakm a sarei a kana, m'ertu iav'rn a kana. Ipavr ti nvalau eia, v'eti m'ertu na v'nen hua iav'ana sanak.

⁸ Atua ittu sera naml iamk arna navanelak, a ti nkav'el kasiv'i. Ittu sarei ti m'alk itsiv'r navanel papa, la nv'el aranan nakl ha.

⁹ Itlev'la sera si p'sp'asak, Katlev'la sera manau arna ptk.

¹⁰ Itutakm sarei a kana arna tv'eliel udlani, inep'a ti nalak ml. Itlev'la sera v'ahienak, inep'a nut ahsla nai inap'ei.

¹¹ Nln irer a kana, ima eia inep'a sera nap', Iv'ahur kana inep'a ti nv'i m'ertu, la imlani nakl ha.

¹² M'rnuran avp'lt, Avan navanel iamk, a ti apavmlen kana. Avhl nmah kanuisar, kavmlden nmah kanuisak.

¹³ Itlev'la sarar tv'alk asnk, avlak arna nut v'iv'a au. Arm'ertu avrndu kana, la avv'i tv'alk ha, ahavrn ti apavla kana ml.

¹⁴ Arm'ertu na nl nam'elak atvruh sarei. Arm'ertu, la avlap'as a kana ha, atvvnapn sarei a kana.

¹⁵ Arm'ertu avlak al nmahak, m'er tav'et na m'akarienak Avv'ahur kana inep'a ti nv'i m'rau uaki. Naran avp'a kana, inep'a ti kana nv'i v'anudl iamk.

¹⁶ Nv'ara a m'ertu na m'akarienak, v'eti iavrpren kana, Aau, nmimani ihua, v'eti ihei.

¹⁷ Naran nm'im'in, a nauk irn ti m'in istu, iarn kana. Sarei, a natk, la avandan al p'akk ha, ahavrn kana.

¹⁸ Aau, armardel papa avlep'la kana, Np'tir, sarei, avv'ana stu kavmlen kana.

¹⁹ Artv'alk udlani, la avv'i tv'alk dau itauamu ha, avlep'la kana istudau. Arm'ertu, la nlap'as anr ha, atvtetvan sera tahr a kana.

²⁰ Suk avuada nila p'akk ihua, Nruh arna m'ien, v'eti inep'a ti luk uaki avuada silv'ienak.

²¹ !Pavrn istu a kana, pavrn istu a kana, kam'i kvv'i tv'alk, Sena ti lm'an Atua itrp sera kana!

²² ?Kvutakm a kana, inep'a nut Atua iutakm a kana inap'ei, sena v'ata? ?Kvrn ip'as, sena ti p'akk itstu sarei?

²³ !U, imvr ti amvulul a v'nenak! !Imvr ti amvulul ani arna puk iamk!

²⁴ !Imnap'i lera, amvkrisi arna nav'et, Amvulul ani m'a aian, m'a aian nahan iv'i let, dav'a, ipater ikahiris naran!

²⁵ Sena ti kana nrndu ti M'ertu, la irndu ti ipulla kana ha, isilv'. Hin ipap'tir arna nadep' naran si udlani ithiris sarei.

²⁶ Aau, naran atvutakm sarei a p'akk, p'erndu si laha, Arna p'akk, p'elei Atua pr.

²⁷ Kana uaki p'elei, M'atak apavp'ei, ikav'i m'ertu uraur. !Nlk irni istudau!

²⁸ Ipavr ti kam'i pavvr ti a, ‘?P'vutakm ani ipanap'i?’ (Sena ti pla sei iter a nlk),

²⁹ Pavdedrn a tali han, Sena ti tali han iparpr m'ertu nlr irer nakl, A ti pavrndu ti apap'tir a nv' v'nen huan Atua uam.”