Sup 18 - V'nen P'as iv'i Turanien Trtarep' m'a Turanien M'dah

A Piltat iv'ana ml

¹ Sarei ml, a Piltat, iv'i m'ertu a Sua, ivrprani, kavr ti a,

² “?Nakm pav'ana ipaier v'aran? Pandinei ti parndu sei, sarei, p'vvrur sei ml.

³ ?Kv'ahur kam'em' inep'a ti nvv'i si dm uaki, Kap'a kam'em' inep'a ti ptm'em' ihei, sena v'ata?

⁴ Nlm irer dav'a ti putakm anh. ?Nadep' ipater a nv' nl reran Atua sanam uaki? ?Apalev'la nav'et lil a m'lnen sanam?

⁵ Nvrdaui, silv'iena m'ertu stu ipam't pr, ipanep'a nut lait im't inap'ei. Aau, nap'an ipahiris pr, ikahv'en ml.

⁶ Lait, la iter al nmah kanuisan ha, ipama kadam't uam, Aau, nap', la iv'en asnn itauamu ha, ikahv'en ml.

⁷ Nut huan ipama kasusupa uaki, ipanep'a sera m'ertu iv'el papa naran irn np'n. Iv'iv'en sei a m'ertu, v'eti v'nenan im'alet kakasri a nadep'.

⁸ Sena ti tln prki arani ti irs al nit, Iv'el uaki, v'eti ier nam'et.

⁹ Aau, nit iuada tln, Sarei, ier nam'et.

¹⁰ Nahau iamk ilaksrahi arna nadep', v'eti attutuan sarei, Aau, tah lil iamk ilahsrahi arna navanel.

¹¹ Ip'ar tv'eliel udlani, sarei kadedrn istudau. Laha, ip'tir ilahml sarei sanan.

¹² Nut huan ihei sena ti irn nam'er istudau. Der lil, la irndu ti iputakm ani ipastudau ha, ihihi.

¹³ Der lera iutakm a nila p'akn. Titiamu na m'ien ipahan lm'an m'a tln, kahiris anr.

¹⁴ Apahsi ipanep'a nut apahs nina ipanap'ei, ikalak mamh al nmah kanuisan, Apani ti ipav'el arna nah mlin, la iani ti m'ertu avdedrn istudau ha.

¹⁵ M'ertu, la ahavv'i nl nam'elan ha, apavlak al nmah kanuisan, Laha, apassran salva arna nmahan.

¹⁶ Uarn a nv' nadep' apavm'am'a, Ranan, la avrater eia ha, apavmlili.

¹⁷ Arm'ertu udlani arna nadep' avvnapn ani uaki. Arm'ertu avv'ahurr m'ertu lilil nakl, v'eti akavrndu nahan ki.

¹⁸ Itauamu ilak arna nut ren, v'eti atp'av'i, dav'a, iv'a al m'alk. Avtkr ani, iruh arna nadep' ka.

¹⁹ A natn dui ihei, m'hip'n ihei, arna nl nam'elan. M'ertu kinkin ihei ml al nmahan.

²⁰ Arm'ertu avlak arna Ues avtah ani istudau. Sarei, arki avlak arna Is avdedrn.

²¹ Nvrdaui, nmahar arm'ertu na si stu apavnap'i lera ra. Aau, nut m'ertu, la iarndu Atua ha, ilak ipanap'i lera ra.”