Sup 17 - V'nen P'as iv'i Turanien Trtarep' m'a Turanien M'dah

¹ M'im'ilk irdapri, napnak atvhiris sarei. Nut atin m'ertu ilaksrah kana uaki.

² ?M'ertu avsip'len kana avlak asnk, v'aha ihei? ?M'atak ip'ar naran avmlen kana, v'aha ihei?

³ Atua, pav'ana m'ah uaki hilaha, sarei, pan turanien ipamk ipaier kana. ?Hin ak ipaier lm'ak sena si laha?

⁴ Sena ti, Atua, Nakm kttukar sera nlr a ti akavrndu sei, Sena si lera, mkahani ti nahar ipav'a eia.

⁵ M'ertu, la iv'ana mamh a ti ipalev' si ipamk asnr tv'aln ha, M'atar a natn apavrama kavstu.

⁶ V'eti Atua iten sarei ti nv'i m'ertu, la arm'ertu uraur avsip'lani nakl ha, Aau, ntama sarei kav'i m'ertu, la arm'ertu uraur avtup'i aranan nakl ha, aau, avtup'i arna nahk.

⁷ M'atak itama sarei kaprs, sena ti nrn istu istudau. Pna p'akk atvrama sarei kavnep'a sera m'lk sei.

⁸ M'ertu avp'tir mamh avtah istudau ani, Sarei, m'ertu, la iahan si stu ha, iuha hin a ti ipamlen m'ertu ip'ip'en lamuru.

⁹ V'eti m'ertu viviln ipav'el mamh arna navanelan. M'ertu iahan si stu m'a lm'an ipama kahua, dav'a ti ipahuet.

¹⁰ V'eti, nmiman a kam'i, pavm'alet ml asnk, Sena ti kana nkapasla m'ertu iak a v'ahien p'as asnm'i.

¹¹ Napnak atvhiris sarei, Sena ti itprusus sera sei nrn ti p'ani, aau, itlev'la sarar v'ahienak, la avdan a nlk ha.

¹² Arm'ertu avvav lihat, kani ti ima kav'i nut ren. Naran nut im'alk uam, avvr ti a, ‘Neiel itv'i ti ipatpeia ra.’

¹³ ?Ipavr ti p'etrah ti apavtin kana, inep'a ti nut lera iv'i nmahak, Aau, ipavr ti p'em'atr arna piasak naran nut ilihat,

¹⁴ Ipavr ti p'evr a sei iani ti sei ipu, ‘Nakm kv'i a tetiak’, V'aha p'evr a sles, ‘Nakm kv'i a uniak, kav'i a v'nk,’

¹⁵ P'ev'ah v'ata ml, a ti ipatu hin? ?Ipavr ti p'elak katrah turanien, hin ak ipalei?

¹⁶ ?Hir lera apavrav'a auei kavier pn liu na nut atin m'ertu nakl (nahan iv'i Siul)? ?Kam'em' p'vp'lt kavm'atr mamh al neiev', v'aha ipanap'i?”