Sup 14 - V'nen P'as iv'i Turanien Trtarep' m'a Turanien M'dah

¹ M'ertu iak asn tav'et, Napn ipasilv' akavstudau, sarei, napn lera apavlini a der lil.

² Ima eia inep'a sera plaua, sarei, kastu ilahml sarei uaki. Iruh inep'a ser m'lk sei, ialak p'arei.

³ ?Atua, Nakm kaiela m'atam a ti pap'a m'ertu inap'i lera? ?Pani ti p'ep'tir arna nahm, a ti pav'ana hua m'a kana?

⁴ ?Hin ak ipalev'la sei viviln al sei iaviviln? !M'ertu irndu ti ipan si lera ihei!

⁵ Sena ti nakm kttu sarei a ti m'ertu ipasilv' napn ipav'a, kattu sarei a ti ipasilv' nal ipav'a, aau, ktspan sarar. Nakm kttu sarar dari sena m'ertu, a ti ikasiv'r naran kinkin.

⁶ Atua, pavavh, a ti mkap'a m'ertu nen, a ti iparndu ti ipalak ms uaki, Dav'a ipahiris a napnan, ipanep'a sera dui la auli a ti ipan parei ha.

⁷ Sena ti nai irndu ti ipater ipap'as uaki, Sena ti, ipavr ti apatri, nsarei ipama eia ml, Aau, ranan, la avsusupa, ahavhua ha, akavhiris.

⁸ Ipavr ti uarn ipama katrtarep' al nadep', Ipavr ti plen ipam'a al nadep',

⁹ V'eti ipavr ti iparn m'i nu, ipassvt ml, Ranan ipaiak ml, ipav'i nai ml.

¹⁰ V'eti m'ertu im'a, sarei, atini, im'atr al nadep'. ?Naran iam'im'in ml, v'eti ilak ip'i?

¹¹ Inep'a nut nauei iruh arna nata inap'ei, Inep'a nut naui lil iamk ima kasusupa dav'a kahiris inap'ei,

¹² Inap'i lera, m'ertu im'atr arna nadep', sarei, iap'tir ml. Akaspar m'ertu inap'i lera, aau, akatp'r a ti apavthal ml, Dav'a ti p'knaran ikahei ml.

¹³ U, nmiman anh a ti patutuan kana, arna nut atin m'ertu nakl. Patutuan kana, dav'a ti nl reram iparuh. !Nrn ti patuda napn ipamk sanak, a ti pav'ahur kana ml!

¹⁴ ?Ipavr ti m'ertu ipam'a, ipasilv' ml, v'aha ipanap'i? Nlak kan pari hua lil, v'eti p'elaksrah Atua, Dav'a ti ipavav kana, p'ama kav'i si uraur.

¹⁵ Nakm pav'ara kana, sarei, p'evrpranh. Nakm parn ip'as a sei ktm'akar sarei aranan m'a lm'am.

¹⁶ Sena ti hilaha nv'el, aau, nsran tlk, v'eti Nakm kspani, V'eti kaav'ahur si stuak.

¹⁷ Kana nasapa v'nen huam, v'eti kttuda sarei al naten, akalev'luei. Nakm ktukar si stuak.

¹⁸ V'eti, inep'a nut ptha lil irs inap'ei, sarei kadama kasusupa, Aau, inep'a nut nav'et iruh a m'lnen inap'ei,

¹⁹ Inep'a nut nauei ilev'luar nav'et nakl inap'ei, Aau, inep'a nut uiniv' iv'el kalev'la nadep' inap'ei, Inap'i lera Nakm klev'la sei m'ertu iv'ahi nakl.

²⁰ Nakm kasiv' m'ertu, dav'a ikahiris naran. Sarei, hin iruh kav'el. Nakm kani ti nahn ima kuraur, katp'av'i, dav'a iruh.

²¹ Ipavr ti arnet dui apavrama kavv'i ardu lilil, v'eti tatei lera ikarndaui. V'aha, apavrama kavsusupa, v'eti hin ikarndu ti ipav'ahur mamh sei ittu sera hin.

²² V'eti p'akn iparer sanan, M'im'iln ipatakal sanan.”