Sup 13 - V'nen P'as iv'i Turanien Trtarep' m'a Turanien M'dah

¹ Palei, m'atak itla sera si udlani lera, Drlnak itrn sarei, katrndu sarei.

² Sei kam'i kvrndaui, kana nrndaui. Kana nav'i m'ertu narndu sei inep'a nut kam'i kvrndaui inap'ei.

³ V'eti nrn ti p'ev'ana m'ei Atua na Nut Hua Udlani, Aau, nrn ti p'evrur sei m'ei Atua, nrni istudau.

⁴ V'eti kam'i kvv'i m'ertu na hap'ilien, Aau, kvv'i tukta, v'eti kaavmhmah a m'ertu.

⁵ U, ip'as a ti mkavvr si kinkin. !Imvr ti imnap'i lera, apala ti iv'i v'ahien p'asam'i!

⁶ Pavrn v'nenak, la iv'i v'ahienak ha, Pavv'rn a sei p'evri ipahua, la ipadan al pnk ha.

⁷ ?Kam'i pavvrp'ep'a si stu arna nahan Atua, Kavvrur sei ivri, v'eti iv'i hap'ilien uaki?

⁸ ?Kam'i pavv'ahur m'ertu ipamk ipasiv' m'ertu uraur, kavvr ti iv'i v'ahienan Atua? ?Pavmlen m'ertu arna nahan Atua?

⁹ ?Kvv'ah ti ipap'as asnn, naran ipandina kam'i? ?V'aha kvv'ah ti pavsip'lani, ipanep'a nut asip'len m'ertu inap'ei?

¹⁰ Hin ipav'ana hua m'a kam'i pr, Ipavr ti kavv'ahur m'ertu, v'eti kavtutuani.

¹¹ ?Kavrndu ti si p'sp'asan apavani ti pavdedrn? ?Kdavv'ahur ti Hin ipani ti pavdedrn ipastudau?

¹² V'nen kvsrani nakl avnep'a sera tih nap', Aau, sei kvvrprani nakl avnep'a sera naml aani a vdrei uaki.

¹³ !Mavvr si kinkin a kana ml. Pavm'ahu a ti kana uaki p'ev'ana! !Sarei, sei ipaier kana ipaier kana uaki, ipap'as uaki!

¹⁴ ?Kana nhanda p'akk al luk sena v'ata? ?Nuada silv'ienak al lm'ak sena v'ata?

¹⁵ Ipavr ti Atua iparpep'n kana, v'eti p'ev'ahi uam. Ipanap'i lera, p'ep'tir arna v'ahienak arna nahn uam.

¹⁶ Hin ipalev'la kana arna der, Sena ti m'ertu ip'ip'en lamuru, hin ikap'tir arna nahn ki.

¹⁷ Pavv'rn a v'nenak ipahua, Pavv'rn a sei kana p'evrp'ep'ei.

¹⁸ Palei, kana ntendedp' sera v'ahienak, Nrndu ti kana p'ep'tir kaviviln, naran Atua ipav'ana hua m'a kana.

¹⁹ ?Hin ak ipamlen kana? Ipavr ti nkavr si kinkin hilaha, v'eti p'am'a ra.

²⁰ Sei arru uaki, mavan a kana, Sarei, nkaruh asnm'i katutuan kana.

²¹ Palev'la lm'am asnk, pap'tir v'iv'a au. Mahani ti p'ern istu anh, kadedrn anh ipasiv' hilaha.

²² Sarei, pav'ara kana, sarei p'evrpranh pr. V'aha, pam'ahu a ti kana p'ev'ana, sarei, Nakm p'vrpren kana.

²³ ?Sei nani istuet, aau, si stu nani nakl, avstudau inap'i? Pavani ti p'erndu nut kana nasapa v'nen hua, aau, nrn ti p'erndu si stuak.

²⁴ ?Atua, katutuan nahm sena v'ata? ?Kv'ahur kana inep'a ti nv'i m'ertu imlanh sena v'ata?

²⁵ ?Pani ti ru nai, la itetv kadav'a a ki laha, sarei kadav'a a ki laha ha, ipadedrn anh? ?Patkr an nina m'lih, la itm'am'a sarei ha, sena v'ata?

²⁶ Sena ti, Atua, Nakm kulul a v'nen haau, laha, ier kana. Nakm kani ti sei, la nten sarei naran nv'i malakal ha, avm'alet kavier kana hilaha.

²⁷ Kvlkasda tlk al nai, Kap'a navanel udlani nv'el aranan nakl, aau, kap'ar ihua. Kani ti plh tlk akavv'el kavsiv'r dari kinkin.

²⁸ Nrndu ti m'ertu ipama kadapu, inep'a sera sei itstu sarei, Aau, inep'a sera klus, la kakrus ithan sarei ha.