Sup 12 - V'nen P'as iv'i Turanien Trtarep' m'a Turanien M'dah

A Sup ivrprani

¹ Sarei, a Sup ivrprani, kavr ti a,

² “!Nsarei kam'i uaki kavv'i m'ertu lilil, Aau, naran kam'i pavram'a, m'ertu uraur ikaiak a v'ahien p'as ml!

³ V'eti kana nrndu sei, iav'i kam'i uaki. Kana nav'i m'ertu narndu sei inep'a nut kam'i kvrndu sei inap'ei. Nvrdaui. ?Hin ak iarndu sei kam'i ktvvr sarei hilaha?

⁴ Kana nv'i m'ertu, la tv'aln avsip'lani ha. Ntv'ara sarei an Atua, sarei, itvrpren sera kana. Kana nani iviviln uaki, aau, nen si p'as nakl, v'eti m'ertu avsip'len kana uaki.

⁵ M'ertu avlak vn uaki avv'ahur ti lait iamk iv'i si kaka uaki, V'eti lait lera ilaksrah m'ertu tln itv'i ti ipars.

⁶ Arm'ertu avv'nah sei avlak mamh al nmah kanuisar. Arm'ertu avmlen Atua avlak p'as uaki, Kavua sei, la Atua ittu sarei anr ha, aau, iendan al lm'an.

⁷ V'eti, hilaha uaki, pavmiman anr si dm, hir apavv'iv'en sei a kam'i, Aau, pavmiman anr m'anh, la avtetv eia ha, hir apavvr a kam'i.

⁸ Pavv'ana m'a nadep', ipav'iv'en sei a kam'i, Aau, pavmiman anr tilau al nata, hir apavvrp'ep'ei a kam'i.

⁹ Hir ak asnr si lera nakl ahavrndu ti Iv'i lm'an Atua uaki iten sera si laha.

¹⁰ ?Silv'iena si udlani iter al lm'an a Hin ak? ?Arm'ertu udlani arna nadep' avm'im'in inap'i?

¹¹ ?Drl natei iendina v'nen, v'aha ihei? ?Pna natei ihandina tim'ah, kala ti ilalm, v'aha ihei?

¹² M'ertarep' aviak a v'ahien p'as, Aau, naran m'ertu isilv' ip'arei, irndu sei istudau.

¹³ V'eti v'ahien p'as, m'a nut hua iter asn Atua. Hin irndu ti ipav'iv'en navanel, karndu sei.

¹⁴ Ipavr ti Hin ipakapapr si kinkin, akahanuri ml. Ipavr ti Hin ipatu m'ertu al p'resin, akiela liu sanan ml.

¹⁵ Ipavr ti ipap'leskar nut nauei iendan aranan, nut ipam'am'a pr. Ipavr ti ipatep'a nauei a ti ipararev', ipalinkar nadep' uaki.

¹⁶ Nut hua m'a v'ahien p'as iter asnn. M'ertu, la athap'il sarei ani ha, m'a m'ertu ihap'il nakl, hir arru lera arv'i nkan Atua.

¹⁷ Hin iv'av'ar m'ertu, la avv'ev'a m'ertu nakl ha. Naran apavruh asnn, akaviak a v'ahien p'as ml. Hin iani ti m'ertu, la avv'ana hua m'a m'ertu nakl ha, avrama kavv'i m'ertu ptr ihei.

¹⁸ Armlin avhudar m'ertu, v'eti Atua ilev'la nahau. Sarei, iv'u sitrav arna lihar.

¹⁹ Atua ilev'lar mlin, kalev'la ultinar nakl. Isiv'r m'ertu hua, avtitihap'el kavrars a nadep'.

²⁰ Hin iani ti arm'ertu, la m'ertu uraur avv'ahr nakl ha, akavv'ana ml. Aau, ilev'la v'ahien p'as asnr arm'ertarep'.

²¹ Isip'lanr net mlin, Kalev'la su naur asnr m'ertu hua.

²² Aau, Atua iv'a arna nut m't, sarei, kapasla si tutuah. Ilev' m'lk m'ien, kataui al nut ren.

²³ Iani ti v'anu avrama kavhua, sarei, iutakm anr, kahiris anr uaki. Iani ti arm'ertu na v'anu kinkin avstuduet, sarei iv'av'ar, avrav'a arna nut uraur.

²⁴ Naran armlinar m'ertu na nadep' avrndu sei, v'eti Hin ilev'lei uaki. Iani ti avunanut uaki arna nut kaka, navanel ihei ml.

²⁵ Avklau a sei al m'alk, lait ihei, Aau, iani ti avv'el iap'as inep'a sera m'ertu im'nm'n.