Sup 11 - V'nen P'as iv'i Turanien Trtarep' m'a Turanien M'dah

V'nenan a Suvar

¹ Sarei, a Suvar, iv'i dui a Namat, ivrprani, kavr ti a,

² “?Iviviln a ti apavrpren m'ertu iamk, naran iv'ana istudau? ?Ip'as a ti dui, la ilini a v'nen ha, ipap'tir ipanep'a ti iv'i dui p'as, v'aha inap'i?

³ ?Iviviln a ti nakm pasran v'nenam uaki, v'eti m'ertu uraur ikavr si kinkin? ?Naran ksip'len m'ertu, iviviln a ti m'ertu uraur ikav'ana hua m'ah?

⁴ Sena ti nakm ktv'ana sarei, kavr ti a, ‘V'nen dau, la nv'ahi ha, ip'eset, Pap'a kana kala ti np'as uaki.’

⁵ V'eti, nrn ti Atua ipav'ana, Ipaiela pnn kamlanh.

⁶ !Nrn ti Hin ipav'iv'en si tutuah anh, la iv'i v'nena m'ertu iak a v'ahien p'as ha! Sei krndaui, Hin ipatau anh ipav'aru ml. Sena si lera, parndu ti Atua itlev' sera sei asnm, v'eti idaier uliena si stuam ki.

⁷ ?Nakm krndu ti paklau a si tutuah, la avrur Atua ha? ?Krndu ti papasla ti Atua ier nut v'ata, la iv'i nut v'iv'a au ha, v'aha inap'i?

⁸ V'ahien lera nakl avrater eia kavsiv' liha masamas. ?V'eti nakm pan v'ata? Si lera nakl avrater a nv' nadep', aau, avrav'a auei kavsiv' nut atin m'ertu nakl (nahan iv'i Siul). ?V'eti nakm parndu v'ata?

⁹ Nut eia na si lera ier nut a nadep' na si lera ip'arei kasiv' nadep' ka. Tv'eliel ier tv'eliel na si lera ip'arei kasiv' nata.

¹⁰ ?Ipavr ti Hin iv'el kav'siau asnr m'ertu, v'aha itaur al p'resin, v'aha iv'ara anr a ti ipav'ana hua m'er, Hin ak ipatukari?

¹¹ Sena ti Hin irndaur arm'ertu na hap'ilien, kala si stuet nakl. ?Sena si lera, kv'ah ti ipav'ahuri, v'aha ikahei?

¹² Aau, dui ptn ihei iparndu ti ipama kav'i dui iparndu sei, Ipanep'a nut tuki didi iparndu ti ipalev' m'ertu a ti ipav'i a natn, inap'ei.

¹³ Ipavr ti pandedp' nlm, Kah lm'am asnn,

¹⁴ Aau, ipavr ti palev' si stuam, la iter al lm'am ha, sarei kataui arna nut v'iv'a au, Ipavr ti kaam'ahu a ti si stu ipav'a eim al nmah kanuisam,

¹⁵ Sarei, parndu ti paklau eia, tkv ikahter arna nahm. Aau, ipavr ti ipanap'i lera, parndu ti pap'tir mamh, mkadedrn.

¹⁶ Ipavr ti ipanap'i lera, pavnapn a ti krn istu istudau, Pav'ahur ti si lera nakl avnep'a sera nauei, la itrarev' sarei, kathiris sarei ha.

¹⁷ Aau, silv'ienam ipanep'a sera neiel naran ien lihalm'au. Itauamu kanep'a sera m'alk, v'eti arna naran lera panep'a sera neiel naran itpeia m'etav'aran.

¹⁸ Ipanap'i lera, palak p'as, sena ti parndu ti patrah Atua. Aau, parndu ti pahl sei arna nut klak nakl, sarei, parnrnh, karn ti si kinkin ikaiarh.

¹⁹ Naran lera, pam'atr a nadep', m'ertu kinkin ikahani ti padedrn. Aau, m'ertu istudau apavrama kavmiman sei anh.

²⁰ V'eti m'eta m'ertu stu apavrama kavstu, Akavruh arna der. Aau, sei apavtrahi ipav'i ti silv'ienar ipahiris uaki.”