Sup 10 - V'nen P'as iv'i Turanien Trtarep' m'a Turanien M'dah

¹ M'im'ilk ilep'la silv'ienak. P'evrp'ep'a sei uaki, nkatukar kana, aau, p'ern ipastu ipastudau, P'ev'ana, sena ti m'im'ilk irn ti ihaau uaki.

² P'evr an Atua, kavr ti a, ‘Pav'ana hua m'a kana, v'eti marp kana. Pav'iv'en a kana a ti kmlen kana sena v'ata.

³ ?Kv'ah ti iviviln a ti putakm a m'ertu, A ti palep'la sei, la Nakm kani m'a lm'am ha, Sarei karn ip'as uaki, naran arm'ertu stu avvrp'ep'a sei apani nakl?

⁴ ?M'atam arnep'a sera m'eta m'ertu, v'aha inap'i? ?Nakm kp'a sei inep'a nut m'ertu ip'a sei inap'ei?

⁵ ?Nakm ksilv' inep'a sera m'ertu, la irndu ti ipam'a uaki ha, isilv', v'aha inap'i? ?Paiam istudau kanep'a sera paia dui, la ihua ha, v'aha inap'i,

⁶ A ti patala si stu kana nani, Aau, a ti patala a si stuak dav'a ti papaslei?

⁷ Nakm krndu ti kana nav'i m'ertu ien si stuet, Aau, krndu ti m'ertu kinkin ikalev'la kana al lm'am.

⁸ V'eti lm'am iten sera kana. Nakm ktmhmah sarei a kana. P'akk ip'lt a nut iamk, v'eti akarndu mamh nut Nakm kani inap'ei. V'eti krn ti putakm a kana, karp kana.

⁹ Ntu tamat anh, pav'ahur ti kten sera kana, nnep'a sera vdrei. ?V'eti Nakm pani ti p'evi neiev' ml?

¹⁰ Mahsran kana inep'a nut ahsran m'ilik inap'ei. Mauha kana inep'a nut auha m'ilik kani ti ima kav'i sis.

¹¹ Nakm kttu sera nila p'akk aranak, inep'a sera klus uaki, Kattu sera suk m'er nahau a nlk, inep'a ti kthuda mamh kana.

¹² Nakm kttu sera silv'ien a kana, katmhmah sarei a kana, Ktv'ahur sera kana, sarei, m'im'ilk isilv' uam.

¹³ Nakm kttutuan sera si lera nakl a nlm, Nrndu ti inap'i lera asnm.

¹⁴ Ipavr ti nen si stu hilaha, pap'a kana uaki. Aau, ipavr ti nen si stu, mkavnapn ani, mkalni uaki.

¹⁵ Ipavr ti nv'i m'ertu na si stu, nrndu ti der ipaier kana pr. Ipavr ti nv'i m'ertu viviln, v'eti nkaklau eia uam. !Nlini a mamihien, Pala ti nrn istu istudau!

¹⁶ Ipavr ti nukl kana, patkr a kana, inep'a nut laiun, la nln irer istudau ha, iani inap'ei. Aau, nla ti Nakm kv'iv'en a kana ml, a ti khua istudau, naran kmlen kana.

¹⁷ Nakm klev'urr m'ertu, la avp'tir kavrur kana kavmlen kana ha. Nlm irer istudau a kana, nla ti ima eia mau. Nlak arna naur iel, si udlani ivav hin nakl.

¹⁸ ?V'eti ktlev'la sera kana al naten na mardel sena v'ata? !Imvr ti kana ntam'a sarei uaki, imp'as, a ti m'eta m'ertu imdala kana ki!

¹⁹ Ipavr ti inap'i lera, ipanep'a ti ndasilv' naran kinkin, Ipanep'a ti atvlev'la sera kana al naten na mardel, katuirv'a sera kana arna nut atin m'ertu uaki.

²⁰ ?Nsarei nkasilv' ikp'arei? !Mahan si lera ml! Paln kana, a ti p'emhmah a kana ipasusupa.

²¹ P'en si lera ipatauamu a ti p'ava arna nut p'elak, sarei nkam'alet ml, Iv'i nut na m'alk, kav'i m'lk m'ien.

²² Nut lera im't, aau, im't dav'a kadam'tet, Iv'i m'lk m'ien, akarndu mamh si kinkin. Arna nut lera, nut ren inep'a sera nut lihat uaki.’ ”