Sun 9 - V'nen P'as iv'i Turanien Trtarep' m'a Turanien M'dah

A Iesu iani ti dui iamk iv'i m'etapis naran iak, iledu sei

¹ Laha, naran iv'el, ila dui iamk iv'i m'etapis naran iak dav'a kalil.

² Laha, arm'ertuan avmiman ani kavvr ti a, “?Tisa, si stuan ak iani ti dui laha iv'i m'etapis naran iak? ?Iv'i si stuan, v'aha si stuar a unian m'ei a tetian?”

³ A Iesu ivrpranr kavr ti a, “Iav'i sena ti aulaha ien si stu, v'aha sena si stuar a unian m'ei a tetian, v'eti iv'i sena ti Atua ipav'iv'en pari lilan aranan.

⁴ Kana nkan paria M'ertu itep'a Kana pr naran nut idaren uam. Naran m'alk ipama, m'ertu kinkin ikarndu ti ipam'akar ml.

⁵ Naran Kana nlak arna nadep', nv'i nut ren arna nadep'.”

⁶ Ivr si lera katup'i arna nadep' kuhei a nadep' ima kav'i nalv, katu nalv lera arna m'eta dui iv'i m'etapis.

⁷ Laha, ivr ani, kavr ti a, “Pav'a kasilei al nauei a Sailuam.” (Naha lera inep'a ti ivr ti a, “Atap'ei”). Sarei, iv'el kasilei kadama ml kaledu sei.

⁸ Sena si lera, m'ertu kinkin avlak arna v'anuan m'er m'ertu la avlei nakl kavla ti iv'i m'etapis ha, avvr ti a, “?Nsarei aulera iv'i dui ilak kakra sei asnr nelnal nakl, v'aha?”

⁹ M'ertu kinkin avvr ti a, “Aau, hin ra.” M'ertu kinkin uraur avvr ti a, “Hin inap'ei aulera.” V'eti hin ivr anr kavr ti a, “Aau, kana ra.”

¹⁰ Sena si lera avvr ani kavvr ti a, “?Inap'i kledu sei ml?”

¹¹ Ivrpranr kavr ti a, “Dui iamk, nahan iv'i a Iesu, ien nalv kataui arna m'atak kavr a kana kavr ti a, ‘Pav'a asn nauei a Sailuam kasilei.’ Sarei, nv'el kasilei, laha kaledu sei ml.”

¹² Laha, avvr ani kavvr ti a, “?Hin ilak ip'i?” Ivr ti a, “Narndaui.”

Arvarisi avsran dui iv'i m'etapis tituei arna sasar arm'ertu a Isrel

¹³ Sarei, avuirv'a dui la iv'i m'etapis tituei hara asnr arvarisi.

¹⁴ V'eti napn a Iesu ien nalv kani ti dui lera iledu sei ml aranan iv'i Sapat.

¹⁵ Sarei, arvarisi avmiman ani nut iledu sei ml inap'ei. Ivr anr kavr ti a, “Hin itu nalv arna m'atak, laha kana nsilei kaledu sei.”

¹⁶ Sena si lera, Varisi kinkin avvr ti a, “Aulera iahandan asn Atua sena ti iauada Sapat.” Hir kinkin uraur avvr ti a, “?M'ertu stu irndu ti ipan pari lil inap'i lera ipanap'i?” Laha, avtupr hir.

¹⁷ Avvr a m'etapis lahara ml kavvr ti a, “?Nakm kv'ah ti iv'i dui inap'i, sena ti iani ti kledu sei?” Ivr ti a, “Iv'i pruvet.”

¹⁸ V'eti ardu a Isrel ahavv'ah ti aulera iv'i m'etapis kaledu sei ml, ier naran avv'ara anr a tetian m'ei a unian aulera la iledu sei ha.

¹⁹ Laha, avmiman anr kavvr ti a, “?Aulaha iv'i a netm'i la krvr ti iv'i m'etapis naran iak ha? ?Inap'i hin hilaha iledu sei?”

²⁰ A tetian m'ei a unian arvrpranr karvr ti a, “Nrrndu ti aulera iv'i a netm'em' dui, karrndu ti iv'i m'etapis naran iak.

²¹ V'eti narrndu nut ima kaledu sei ml inap'ei, v'aha narrndu m'ertu la iani ti m'aten ip'as ml ha. Hin itv'i sera dui lil. Pavmiman ani. Hin uaki ipavruri.”

²² A tetian m'ei a unian arvr si lera, sena ti ardedrn anr ardu a Isrel, sena ti hir atvtu sera v'nen kavvr ti a, Ipavr ti m'ertu kinkin ipavr ti a Iesu iv'i a Kristu, apasrani arna sasar m'ertu a Isrel.

²³ Sena si lera a tetian m'ei a unian arvr ti a, Hin itv'i sera dui lil. Pavmiman ani.

²⁴ Sarei, avv'ara a dui iv'i m'etapis hara ml kavvr ani kavvr ti a, “Papatei Atua uaki, sena ti kam'em' nvrndu ti Aulera iv'i dui stu.”

²⁵ Ivrpranr kavr ti a, “Kana narndu ti Hin iv'i dui stu v'aha ihei, v'eti nrndu si iamk, ti tituei nv'i m'etapis, v'eti hilaha nledu sei.”

²⁶ Laha, avvr ani ml kavvr ti a, “?Ien v'ata anh? Imhmah a m'atam inap'i?”

²⁷ Ivrpranr kavr ti a, “Ntvrp'ep'a sera si lera a kam'i, v'eti kaavv'rn ani. ?Kvrn ti pavrni ml sena v'ata? ?Kam'i ml kvrn ti pavv'i m'ertuan?”

²⁸ Laha, avsip'lani kavvr ti a, “Nakm kv'i m'ertuan, v'eti kam'em' nv'i m'ertuan a Musis.

²⁹ Kam'em' nvrndu ti Atua iv'ana m'ei a Musis, v'eti Aulera, kam'em' navrndu nut iendan.”

³⁰ Dui lahara ivrpranr kavr ti a, “Nvrdaui, si lera iv'i si lil, a ti kam'i kaavrndu nut iendan, v'eti iani ti nledu sei.

³¹ V'eti nakd nvrndu ti Atua iav'rn anr m'ertu stu, v'eti ipavr ti m'ertu kinkin ipatei Atua kan sei hin irni, Atua ipav'rn ani.

³² Naran ap'u dav'a ier dika, aharn ti m'ertu iamk imhmah a m'eta m'ertu la iak kav'i m'etapis ha.

³³ Ipavr ti dui lera iahandan asn Atua, iarndu ti ipan si kinkin.”

³⁴ Avvrprani kavvr ti a, “Nakm kiak arna si stu uaki. ?Pav'iv'en sei a kam'em' ipanap'i?” Laha, avsrani.

M'ertu avv'ah a Iesu avla sei, m'ertu ahavv'ah a Iesu ahavla sei

³⁵ A Iesu irn v'nen a ti atvsran sarei. Laha, naran ipaslei, ivr ani, kavr ti a, “?Nakm kv'ah a Natn Atua?”

³⁶ Ivrprani, kavr ti a, “?Mlin, iv'i a hin ak, a ti p'ev'ahi?”

³⁷ A Iesu ivr ani, kavr ti a, “Nakm ktla sarei, hilaha iv'ana m'ah.”

³⁸ Laha, ivr ti a, “Mlin, kana nv'ahah.” Sarei, kaiaul asnn kapatei.

³⁹ A Iesu ivr ti a, “Kana nma arna nadep' ka a ti p'etupr m'ertu, a ti m'ertu ahavla sei apavla sei, a ti m'ertu avla sei apavrama kavv'i m'etapar.”

⁴⁰ Laha, Varisi kinkin avlak m'ei avrn v'nen lera, kavvr ani kavvr ti a, “?Nsarei kam'em' nvv'i m'etapis a?”

⁴¹ A Iesu ivr anr kavr ti a, “Idv'i kdvv'i m'etapis mdavan si stu, v'eti hilaha kvvr ti kvla sei. Sena si lera si stuam'i idater uam.