Sun 5 - V'nen P'as iv'i Turanien Trtarep' m'a Turanien M'dah

A Iesu ien mamh dui iamk arna nauei a Petesta

¹ Itauatah a si lera, arm'ertu a Isrel avan tim'ah iamk. Laha, a Iesu iv'el kadav'a eia arna nut a Serusalem.

² Arna nut a Serusalem, asn pn liu na sivsiv, nauei iamk iak av a nln nakl, nahan arna v'nenar ardu a Isrel iv'i a Petesta. Atlera vrada ilm' iter.

³ Nelnal istudau la avm'at ha avm'atr al vrada lera, nki iv'i m'etapis, nki ikav'eldri, nki pna p'akn im'em'a. Avlak kavtrah ti nauei lera ipadudul.

⁴ Sena ti naran kinkin enselan a Mlin Eia ima a nadep' kadav'a al nauei lera kani ti idudul. Naran nauei ima kadudul, m'ertu kinkin la iv'a a nln itauamu ha, ipavr ti m'etien kinkin ipani, v'eti p'akn udlani ipama kap'as ml.

⁵ Dui iamk atlera m'etien kinkin iani dav'a pai ineltl pln isatl (38)

⁶ Naran a Iesu ila ti aulera im'atr inap'i lera katrndu sera ti im'at tituei, imiman ani, kavr ti a, “?Nakm krn ti p'akm ipama kap'as ml?”

⁷ Dui la im'at hara ivr ani, kavr ti a, “Mlin, kana m'ertuak ihei a ti ipalev' kana p'av'a al nauei, naran nauei idudul. Naran nvr ti p'av'a, v'eti dui uraur isiv' kana kadav'a auei.”

⁸ A Iesu ivr ani, kavr ti a, “Pap'tir kalev' pap nam kav'el.”

⁹ Iv'amk m'a ti p'akn aulera ima kap'as udlani. Laha, hin iv'el kaua pap nan kunanut. V'eti napn nen iv'i Sapat.

¹⁰ Sena si lera, ardu a Isrel avv'ana m'a dui la p'akn itp'as hara kavvr ti a, “Hilaha iv'i Sapat, iaviviln a ti paua pap nam.”

¹¹ Hin ivrpranr kavr ti a, “Dui iani p'akk ip'as ml, hin ivr a kana kavr ti a, ‘Palev' pasam kauei kav'el.’ ”

¹² Avmiman ani ml kavvr ti a, “?Hin ak la hin ivr anh ra, kavr ti a, ‘Palev' pap nam kauei kav'el?’ ”

¹³ Dui la p'akn itp'as ml hara iarndu ti iv'i ak, sena ti a Iesu itln sera nelnal atlera katahau.

¹⁴ Itauatah a Iesu ipaslei al nmah tamat kavr ani, kavr ti a, “Parni, p'akm itama sarei katp'as ml. Man si stu ml, imahei ti sei ipastu kasiv' ki lera ipaiarh.”

¹⁵ Laha, dui lahara ihau kavr anr ardu a Isrel kavr ti naha dui iani p'akn ima kap'as ml iv'i a Iesu.

¹⁶ Sena si lera ardu a Isrel avrn ti apavutakm an a Iesu kavrpep'ni, sena ti ien pari lera arna Sapat.

¹⁷ V'eti a Iesu ivr anr kavr ti a, “A Tetiak im'akar dav'a ier hilaha. Kana ml nm'akar.”

¹⁸ Sena si lera ardu a Isrel avrni istudau a ti apavrpi, sena ti iutakm a Sapat uaki, v'eti ivr ti Atua iv'i a Tetian, inep'a ti ien Hin inap'amk m'ei Atua.

Pavani ti nahan a Natn ipav'a eia kanep'a nahan a Tatei

¹⁹ Laha, a Iesu ivrpranr kavr ti a, “Nvrdaui nvr a kam'i, Kana, nv'i a Natn Atua, nkaan si kinkin ikahamk arna v'ahienak uaki, ipavr ti nkala ti a Tetiak iani. Sena ti sei Hin iani, Kana, nv'i a Natn, nkani ipanap'i lera pr.

²⁰ Sena ti a Tetiak ilap'as a Kana, nv'i a Natn, kav'iv'en a Kana si udlani Hin iani. V'eti a Tetiak ipav'iv'en a Kana m'akarien ipalil kasiv' ki laha, sena ti pavtah ani.

²¹ A Tetiak irndu ti ipani ti m'ertu la avram'a ha apavthal ml arna m'ien kavsilv'. Inap'i lera, Kana, nv'i a Natn, nrndu ti p'etu silv'ien a m'ertu Kana nrn ti p'etau anr.

²² Iav'i a Tetiak ipav'ana hua m'a m'ertu, v'eti Hin itu parei udlani lera a Kana, nv'i a Natn.

²³ Hin iani inap'i lera sena ti nelnal apavua mamh p'klk, nv'i a Natn, inep'a ti avua mamh p'kln a Tatei. V'eti naran m'ertu ahavua mamh p'klk, ahavua mamh p'kln a Tetiak itep'a Kana.

Net M'ertu itu silv'ien a m'ertu kav'ana hua m'er

²⁴ Nvrdaui nvr a kam'i, m'ertu irn v'nenak kav'ah Hin la itep'a Kana ha, hin ilev' silv'ien ikahiris naran. Atua ikav'ana hua m'ei, v'eti itln sera m'ien kadama arna silv'ien.

²⁵ Nvrdaui nvr a kam'i, napn ima, aau, napn itama sarei hilaha, a ti m'ertu avram'a apavrn drln a Natn Atua. Nki apavrni, apavsilv'.

²⁶ A Tatei iv'i pla silv'ien, kani ti Kana ml, nv'i a Natn, nnap'ei kav'i pla silv'ien.

²⁷ Hin itu Kana a ti p'ev'ana hua m'er nelnal, sena ti Kana nv'i Net M'ertu.

²⁸ Kam'i mavtah a si lera, sena ti napn ipama a ti m'ertu atin sarar apavrn v'nenak,

²⁹ kavln nut atinr. M'ertu avan si p'as apavthal kavsilv', v'eti m'ertu avan si stu apavthal a ti Kana p'ev'ana hua m'er kutakm anr.

³⁰ Kana nkaan si kinkin Kana uaki nrni. Nv'ana hua inep'a nut nrni asn Tatei inap'ei. Naran nv'ana hua m'a m'ertu, nani iviviln, sena ti nasapa sei Kana uaki nrni, v'eti nsapa sei a Tatei itep'a Kana irni.

Sei iv'a avv'iv'en nut huan a Iesu: a Sun Paptais, a Tatei, v'nenan Atua, m'ei a Musis

³¹ Ipavr ti Kana uaki p'evrur Kana, v'nenak ikap'tir.

³² V'eti nki uraur ivrur Kana. Kana nrndu mamh ti v'nenan ivrur Kana iv'i v'nen dau.

³³ Kam'i kvtep'a sera m'ertu asn a Sun, laha ivrur v'nen dau.

³⁴ Kana nav'ana inap'i lera sena ti nrn dui ipav'i v'nenak, v'eti sena ti Atua ipalev'la kam'i arna si stuam'i.

³⁵ A Sun inep'a lait iamk iv'en kar mamh. Laha, kam'i kvrn ip'as a lait lera isusupa uaki.

³⁶ V'eti Kana v'nenak iamk iak ihua kasiv' v'nenan a Sun, sena ti pariak nani iel, la Atua itu Kana a ti p'ehiris ani ha, si lera ivrur ti a Tetiak itep'a Kana.

³⁷ Hin a Tetiak la itep'a Kana ha, iv'i v'nenak. Kam'i kaavrn drln, kaavla nahn naran kinkin.

³⁸ V'nenan iahter a nlm'i, sena ti kaavv'ah Kana, la Hin itep'a Kana ha.

³⁹ Kam'i kvtala a sei arna Paivul, sena ti kvv'ah ti kvlev' silv'ien ikahiris naran aranan. V'eti Paivul nen iv'i v'nen ivrur Kana.

⁴⁰ V'eti kam'i kaavrn ti pavrama asnk a ti pavlev' silv'ien ikahiris naran.

⁴¹ Kana narn ti m'ertu apavpata Kana.

⁴² V'eti Kana nrndu mamh kam'i a ti vtmienan Atua iahter a nlm'i.

⁴³ Kana nma arna nahan a Tetiak, v'eti kam'i kaavlev' Kana. V'eti ipavr ti m'ertu uraur ipama arna nahan uaki, pavlav'i.

⁴⁴ ?Pavv'ah Kana ipanap'i, ipavr ti kvrn ti tv'elm'i apavrn ipap'as a kam'i, v'eti kaavrn si p'sp'as idan asn Atua uaki iamk?

⁴⁵ Mavv'ah ti Kana uaki p'evrp'ep'a si stuam'i arna nahn a Tatei. A Musis la kvv'ahi ha, hin ipavrp'ep'a si stuam'i.

⁴⁶ Amvr ti mvv'ah a Musis, mdvv'ah Kana, sena ti a Musis ivrur Kana arna sei iulul ani.

⁴⁷ ?V'eti ipavr ti mkavv'ah sei itaui, pavv'ah v'nenak ipanap'i?”