Sun 3 - V'nen P'as iv'i Turanien Trtarep' m'a Turanien M'dah

M'ertu ikiakuri ml pr

¹ Varisi iamk iv'i mlin ki iamk arna nut a Isrel, nahan iv'i a Nikutimas.

² Arna lihat iamk, hin ima asn a Iesu kavr ani, kavr ti a, “Tisa, kam'em' nvrndu ti kv'i tisa iamk Atua itap'ah, sena ti dui kinkin ikahamk ikarndu ti ipan pari lilil la Nakm kani nakl ra, ipavr ti Atua ialak asnn.”

³ A Iesu ivrprani, kavr ti a, “Nvrdaui, nvr anh. M'ertu la iaiakuri ml ha, ikala v'anuan Atua.”

⁴ A Nikutimas ivr ani, kavr ti a, “?M'ertu la itama katrtarep' sarei ha, hin ipaiakuri ml ipanap'i? Hin ikahv'am'alet ml al v'atn a unian kaiak ml ipav'aru.”

⁵ A Iesu ivrprani, kavr ti a, “Nvrdaui, nvr anh. M'ertu la iaiak arna nauei m'a M'im'iln P'as, hin ikahv'a al v'anuan Atua.

⁶ M'ertu tav'et ilav'i iv'i m'ertu. V'eti m'ertu iak arna M'im'iln P'as iv'i nka M'im'iln Atua.

⁷ Matah a ti nvr anh kavr ti a, ‘Kam'i mkviakuri ml pr.’

⁸ Nalen itvtv arna nut irni. Krn tnen v'eti kaarndu nut iendan v'aha nut ipav'a. M'ertu udlani aviak arna M'im'iln P'as avnap'i lera.”

⁹ A Nikutimas imimani, kavr ti a, “?Si udlani lera ipatu hin ipanap'i?”

¹⁰ A Iesu ivrprani, kavr ti a, “?Nakm kv'i tisa lilar ardu a Isrel, v'eti inap'i hin kaarndu si lera?

¹¹ Nvrdaui, nvr anh. Kam'em' nvvr sei nvrndaui, kavvrp'ep'a sei ntvla sarei. V'eti kam'i kaavv'ah v'nenam'em'.

¹² ?Ipavr ti kam'i kaavv'ah Kana naran nvrur sei arna nadep' uaki, inap'i hin pavv'ah Kana, ipavr ti p'evrur sei iter eia?

¹³ M'ertu kinkin idahv'a lei eia naran kinkin, v'eti Kana uaki nv'i Net M'ertu nlak eia tituei kadan eia kadama a nadep'.

¹⁴ A Musis tituei, naran ilak arna nut kaka, ilev' nmat iamk aani arna kul kataui eia arna nai p'arei iamk ip'tir. Ipanap'i lera apatu Kana eia, nv'i Net M'ertu.

¹⁵ Sena ti m'ertu udlani apavv'ah Kana apavlev' silv'ien ikahiris naran.

¹⁶ Sena ti Atua ilap'as a nelnal arna nadep' istudau, katap'ei a Natn iamk dudau asnn, sena ti m'ertu udlani apavv'ahi akavmln, v'eti apavlev' silv'ien ikahiris naran.

¹⁷ Sena ti Atua iatap'ei a Natn arna nadep' a ti iputakm a m'ertu arna nadep', v'eti itap'ei a ti Hin ipalev'la si stuar m'ertu arna nadep'.

¹⁸ M'ertu iv'ah Kana, Atua ikav'ana hua m'ei, v'eti m'ertu iav'ah Kana, Atua itv'ana hua sarei m'ei, sena ti iav'ah nahan a Natn Atua la Hin uaki iamk iak asnn ha.

¹⁹ Sena si lera Atua ipav'ana hua m'er, sena ti nut ren itama sarei arna nadep', v'eti nelnal avlap'as a m'alk isiv' nut ren, sena ti pariar istu.

²⁰ Sena ti m'ertu udlani la avan si stu ha avlep'la nut ren. Ahavrama asn nut ren, sena ti ahavrn ti nelnal apavla si stuar.

²¹ V'eti m'ertu ien sei iviviln ima asn nut ren, sena ti nelnal apavla parian, ti iani arna nut huan Atua.”

A Sun Paptais iani ti nahan a Iesu iv'a eia

²² Itauatah a si lera a Iesu m'er arm'ertuan avrav'a arna nut a Sutia, sarei ilak m'er atlera kan paptais nakl.

²³ Hin a Sun ml ien paptais arna nut Ainun, ihih nut a Salim, sena ti nauei istudau atlera. Dav'a m'ertu avrama nakl kavpaptais.

²⁴ Iv'i naran adasran a Sun al p'resin.

²⁵ Laha, arm'ertuan a Sun avv'nv'ana m'er ardu a Sutia sena nut asila m'ertu inap'ei.

²⁶ Hir avrav'a asn a Sun kavvr ani kavvr ti a, “Tisa, Dui lahara ilak m'ah a tv'eliel a Surtan, la Nakm kvruri hara, parn, Hin ien paptais. Laha, nelnal avrav'a asnn.”

²⁷ A Sun ivrpranr kavr ti a, Dui kinkin ikalev' si kinkin, ipavr ti Atua iatau ani.

²⁸ Kam'i kvrndu ti pavvr ti nvr ti nav'i Kristu, v'eti nv'i dui atep'a kana ntauamu.

²⁹ Dui ip'hul tav'et iv'i dui ipaua tav'et nen. V'eti tv'aln, la ip'tir katrah ti iparn drln ha, hin irn ip'as istudau, naran irn drl dui ip'hul tav'et. Inap'i lera kana nrn ip'as a si lera istudau.

³⁰ Hin ikav'a eia pr, v'eti kana p'av'a a nadep'.

³¹ Hin la iendan eia kadama a nadep' ha, hin ilil mau arna nelnal udlani. M'ertu iv'i m'ertu na nadep' iv'ah sei arna nadep' kavruri uaki. Hin la iendan eia ilil kasiv' m'ertu udlani.

³² Hin ivrp'ep'a sei itla sarei katrn sarei. V'eti m'ertu kinkin ihei irn v'nenan.

³³ V'eti arm'ertu avlev' v'nenan kavv'ahi, hir avv'iv'en a ti Atua ivrdaui.

³⁴ Sena ti hin la Atua ittep'a sarei ha, ivrp'ep'a v'nenan Atua, sena ti Atua itu M'im'iln P'asan ani ilini a nln.

³⁵ A Tatei ilap'as an a Natn kattu sera si udlani al lm'an.

³⁶ M'ertu iv'ah a Natn lera, hin itlev' sera silv'ien p'as ikahiris, v'eti m'ertu iav'ah a Natn lera ikala silv'ien. Nl reran Atua iter aranan.