Sun 20 - V'nen P'as iv'i Turanien Trtarep' m'a Turanien M'dah

A Iesu ithal ml arna m'ienen

¹ Arna Sadi m'etav'aran nrnren, naran nut idahren, hin a Meri, iv'i tav'et a Maktala, ima asn navap lahara kala ti atlev'la sera nav'et la itukar karliu na navap ha.

² Laha, ivrvr kadav'a asn a Saimun P'ita m'a m'ertuan a Iesu uraur hara, la ilap'as ani ha, kavr anr kavr ti a, “Atlev'la sera Mlinad al navap, v'eti navrndu nut ataui.”

³ Sarei, a P'ita, m'a m'ertuan a Iesu uraur lahara, arv'el karv'a asn navap.

⁴ Arru karp'lt karvrvr, v'eti m'ertuan a Iesu uraur lahara ivrvr kasiv'p'lei a P'ita, katauamu asn navap.

⁵ Kaiaul kariri kala svs kalik iter atlera, v'eti iahv'a eim.

⁶ Sarei, a Saimun P'ita ima kasapei kadav'a eim al navap kala svs kalik atlera.

⁷ Kala kalik anpakar a ptn iahter m'a duana kalik, v'eti iter a nut iamk, athp' sarei.

⁸ Sarei, m'ertuan a Iesu uraur, la ima asn navap itauamu hara, iv'a eim ml al navap kala si lera kav'ahi.

⁹ Sena ti adarrndu mamh ti Paivul ivr ti ipathal arna m'ien pr.

¹⁰ Sarei, arm'ertuan a Iesu lera arv'el karhau ml.

A Meri a Maktala ilei a Iesu ti ithal ml

¹¹ V'eti a Meri ip'tir av'aran asn navap katakal. Itakal dav'a kaiaul kariri al navap.

¹² Kala ensel iru, klusar itva. Arlak arna nut atu p'akn a Iesu, tv'aln asn ptn, tv'aln asn tln.

¹³ Laha, arvr ani karvr ti a, “?Tav'et, ktakal sena v'ata?” Ivr anr kavr ti a, “Sena ti atlev'la sarei a Mlinak, narndu nut ataui.”

¹⁴ Ivr sera si lera kavav hin, kalei a Iesu ip'tir, v'eti iarndu ti iv'i a Iesu.

¹⁵ A Iesu ivr ani, kavr ti a, “?Tav'et, ktakal sena v'ata? ?Ktala an a hin ak?” Tav'et lera iv'ah ti iv'i dui ip'aur pitvet kavr ani, kavr ti a, “Mlin, ipavr ti ktlev'la sera p'akn, pavr a kana nut ktaui, laha kana p'elav'i kauirhau.”

¹⁶ A Iesu ivr ani, kavr ti a, “Meri.” A Meri ivav hin kavr ani, kavr ti a, “Rapuni.” Inep'a ti ivr ti a, “Tisa”, arna v'nenar.

¹⁷ A Iesu ivr ani, kavr ti a, “Maier p'akk, sena ti Kana ndahv'a eia asn a Tetiak, v'eti pav'a asnr tv'alk kavr anr kavr ti a, ‘Hin ivr ti a, Kana p'av'a eia asn a Tetiak m'ei a Tetiam'i, kadav'a asn Atuak m'ei Atuam'i.’ ”

¹⁸ Hin a Meri, iv'i tav'et a Maktala lera, ima kavr anr m'ertuan a Iesu, kavr ti a, “Kana nlei a Mlin Lilad”, kavr anr a ti Hin ivr si lera ani.

A Iesu iv'iv'en Hin anr m'ertuan

¹⁹ Sarei, arna lihat lera, iv'i Sadi, m'ertuan a Iesu avp'lt arna nut iamk kavp'leskar liu na nmah, sena ti avdedrn anr m'ertu lilil a Isrel. Laha, a Iesu ima kap'tir a p't nut nar kavr anr kavr ti a, “Tamat ipater asnm'i.”

²⁰ Ivr sera si lera kav'iv'en lm'an m'a nv' kln anr. Laha, arm'ertuan avrn ip'as istudau naran avlei a Mlin Lilad.

²¹ Laha, a Iesu ivr anr ml kavr ti a, “Tamat ipater asnm'i. Hilaha kana ntep'a kam'i, inep'a nut a Tetiak ittep'a sera Kana inap'ei.”

²² Ivr si lera sarei kam'im'in aranar kavr anr kavr ti a, “Kam'i pavlev' M'im'iln P'as.

²³ Ipavr ti pavmhmah a si stuar m'ertu kinkin, Atua ipamhmah a si stuar. Ipavr ti kaavmhmah a si stuar m'ertu kinkin, Atua ikamhmah a si stuar.”

A Iesu iv'iv'en Hin an a Tumas

²⁴ V'eti a Tumas, iv'i lman iru na m'ertuan a Iesu, la avr m'alev' ani ha, hin ialak m'er, naran a Iesu ima.

²⁵ Laha, duanar m'ertuan a Iesu avvr ani kavvr ti a, “Ntvla sarei a Mlin Lilad.” V'eti hin ivr anr kavr ti a, “Ipavr ti nkala m'lna nil al lm'an, katu nirh lm'ak ipav'a al m'lna nil lahara, katu lm'ak ipav'a a nl nv' kln, kana nkav'ahi.”

²⁶ Naran uik iamk iv'siau, m'ertuan a Iesu avlak eim ml kavp'leskar liu na nmah. Hin a Tumas ilak m'er. Laha, a Iesu ima kap'tir a p't nut nar kavr anr kavr ti a, “Tamat ipater asnm'i.”

²⁷ Laha, ivr an a Tumas kavr ti a, “Pala lm'ak, pama katu nirh lm'am atlaha, karisen lm'am ipav'a a nl nv' klk. Manep'a m'ertu ahavv'ah Kana, v'eti pav'ah Kana.”

²⁸ A Tumas ivrprani, kavr ti a, Nakm kv'i a Mlin Lilak m'ei Atuak.

²⁹ A Iesu ivr ani, kavr ti a, Tumas, nakm kv'ah Kana sena ti kla Kana, v'eti m'ertu avv'ah Kana naran ahavla Kana, hir apavrn ipap'as mau.

A Sun iulul a puk laha a ti m'ertu apav'ah a Iesu Kristu

³⁰ A Iesu ien pari lilil uraur istudau arna nah m'ertuan, naulul ani arna puk laha.

³¹ V'eti kana nulul a ki laha a ti kam'i pavrndu ti a Iesu iv'i a Kristu, a Natn Atua, a ti kam'i pavv'ahi kavlev' silv'ien p'as arna nahan.