Sun 2 - V'nen P'as iv'i Turanien Trtarep' m'a Turanien M'dah

Nauei ima kav'i naui m'iel

¹ Arna nitla napn, lheien iamk iak arna nut a Keina a Kalili. A unian a Iesu ilak atlera.

² Atvv'ara sarei an a Iesu m'er arm'ertuan, a ti apavrama arna lheien lera.

³ Naran naui m'iel m'am'ar ihiris, a unian a Iesu ivr ani, kavr ti a, “Naui m'iel m'am'ar itama dau.”

⁴ V'eti a Iesu ivr ani, kavr ti a, “?Tav'et, inap'i hin ktu si lera aranak? Naranak idahma.”

⁵ A unian ivr anr ardu na parei kavr ti a, “Kam'i pavan sei Hin ivr a kam'i.”

⁶ Putel lil ilm'sei na nauei aani a nav'et aviak atlera, sena p'klr arm'ertu a Isrel a ti apavsisil nakl, avviviln a lita ipanelsatl (80) v'aha inelnal iv'amk (100) arna nki iamk.

⁷ A Iesu ivr anr kavr ti a, “Pavah nauei ipav'a al putel lera ipalini udlani.” Sarei, avah nauei a nlr ilini.

⁸ Sarei, ivr anr kavr ti a, “Hilaha pavtven ki kavuirv'a asn mlin na tim'ah.” Laha, avuirv'a.

⁹ Naran mlin na tim'ah im'ndina nauei, la ima kav'i naui m'iel ha, iarndu nut iendan. V'eti ardu na parei la avtven nauei ha, hir avrndaui. Laha, mlin na tim'ah lahara iv'ara a dui ien lheien,

¹⁰ kavr ani, kavr ti a, “Iel, m'ertu udlani avtu naui m'iel p'as itauamu, v'eti naran ardu atvm'nm'n dav'a, avlev' ki iap'as, v'eti nakm kuada terp'as dav'a ier hilaha.”

¹¹ Ki laha iv'i m'akarien lilan a Iesu iani itauamu arna nut a Keina a Kalili, kav'iv'en si p'sp'asan a nelnal, sarei arm'ertuan avv'ahi.

¹² Itauatah a si lera, hin iv'a auei asn nut a Kapaniam, a unian isapei, m'er artv'aln m'er arm'ertuan. V'eti avlak isusupa uaki arna nut lera.

A Iesu itp'ev' m'ertu stu al nmah tamat

¹³ Ihih napn na Pasuva iv'i tim'ahar ardu a Isrel, a Iesu iv'a eia arna nut a Serusalem.

¹⁴ Eim al nmah tamat hin ipasla dui istudau avulul a pluk m'a sivsiv m'a navimar, kala dui uraur avlak asn tiv' kavtupapren nav'etar arm'ertu nakl.

¹⁵ A Iesu ilev' nahau papa kinkin kani iv'i nam'et, katp'av'r ardu lahara m'a pluk m'a sivsivar avruh al nmahan a Mlin Eia. Hin ivavp'la tiv'ar arm'ertu la avlak kavtupapren nav'et nakl ha, kahsran udlen nav'etar ivrlis unanut.

¹⁶ Laha, iv'ana m'er ardu avulul a navimar kavr ti a, “Kam'i pavlev'la si laha kavuirv'a av'aran. Mavani ti nmahan a Tetiak ipama kav'i nmah apulul a sei a nln.”

¹⁷ Laha, arm'ertuan avv'ahur v'nen arna Paivul, ivr ti a, “Kana nlap'as a nmaham istudau. Si lera inep'a nap' iv'en a nlk.”

¹⁸ Ardu Isrel kinkin avv'ana m'ei kavmiman ani kavvr ti a, “?Nakm pan pari lil v'ata kav'iv'en ti iviviln a ti kan si udlani lera?”

¹⁹ A Iesu ivrpranr kavr ti a, “Kam'i pavkapr nmah laha, v'eti arna napn ipatl Kana p'ehluri ipap'tir ml.”

²⁰ Laha, ardu a Isrel lahara avvrprani kavvr ti a, “Nelnal avm'akar arna nmah lera pai inelv'a pln ilm'sei. (46) ?V'eti Nakm kv'ah ti pani ipap'tir arna napn ipatl uaki?”

²¹ V'eti ivrur nmah iv'i p'akn.

²² Itauatah naran a Iesu ithal ml arna m'ien, arm'ertuan avv'ahur ti ivr si lera anr, kavv'ah v'nen arna Paivul m'a v'nenan a Iesu lera.

A Iesu irndu nl m'ertu udlani

²³ Naran Hin ilak a Serusalem sena tim'ah na Pasuva, m'ertu istudau avv'ah a nahan, naran avla pari lilil hin iani nakl.

²⁴ V'eti a Iesu irndu mamh nelnal udlani, iarn ti hir apavrndu udlen v'ahienan.

²⁵ A Iesu m'ertu kinkin ikav'iv'en p'kl m'ertu ani, sena ti hin irndu nl m'ertu udlani.