Sun 19 - V'nen P'as iv'i Turanien Trtarep' m'a Turanien M'dah

Arm'rnur avsip'len a Iesu

¹ Sarei, a Pailat ilev' a Iesu a ti aparpi a nahau.

² Laha, m'rnur avlev' lu makau kavv'ati ima kanep'a manu a mlin kavtaui arna ptn, kavtu klus m'ielm't aranan.

³ Laha, kavvr ti a, “Ip'as, Mlin Lilar m'ertu a Isrel,” kavusei a lm'ar.

⁴ Laha, a Pailat iv'a av'aran ml kavr anr kavr ti a, “Pavlei, kana nuirma asnm'i, a ti kam'i pavrndu ti napasla si stu kinkin iani.”

A Pailat im'ahu a ti apavtau a Iesu arna su lamu

⁵ Laha, a Iesu ima av'aran kaua manu iv'i lu makau m'a klus m'ielm't. Laha, a Pailat ivr anr kavr ti a, “Pavlei Aulera.”

⁶ V'eti naran mlinar pris m'er ptm'iel avlei, avv'ara eia kavvr ti a, “Pataui arna su lamu, pataui arna su lamu.” A Pailat ivr anr kavr ti a, Kam'i uaki pavlav'i kavtaui arna su lamu, sena ti kana napasla si stu kinkin iani.

⁷ Dui lilil a Isrel avvrprani kavvr ti a, “Kam'em' v'nen hua iamk iak asnm'em'. V'nen hua lera ivr ti ipam'a pr, sena ti hin ivr ti iv'i a Natn Atua.”

⁸ Naran a Pailat irn v'nen lera, idedrn,

⁹ kadav'a eim ml al nmaha kavman kavr an a Iesu kavr ti a, “?Nakm kdan ip'i?” V'eti a Iesu iavrprani.

¹⁰ Laha, a Pailat ivr ani, kavr ti a, “?Kaav'ana m'a kana? ?Kaarndu ti nut huak iak a ti p'etauh arna su lamu, v'aha nut huak iak a ti p'ulnh?”

¹¹ A Iesu ivrprani, kavr ti a, “Imvr ti a Mlin Eia imatu nut huam anh a ti putakm a Kana, nut huam imdahei a ti putakm a Kana. Sena si lera, m'ertu itu Kana al lm'am ien si stu kasiv'h.”

¹² Arna naran lera a Pailat itala a navanel a ti ipulni. V'eti dui lilil a Isrel avv'ara eia kavvr ti a, “Ipavr ti nakm puln Aulera, nakm kaav'i tv'aln a mlin lil a Rum. Ipavr ti m'ertu kinkin ivr ti iv'i mlin, imlen mlin lil a Rum.”

¹³ Naran a Pailat irn v'nen lera, ilev' a Iesu ima av'aran kalak arna napl na m'ertu ipav'ana hua m'a m'ertu, arna nut iamk avr ti iv'i Nadep' aani a Nav'et, v'eti arna v'nenar m'ertu a Isrel avr ti naha nut lera iv'i Kapata.

¹⁴ Napn nen iv'i napn avandedp' a si udlani sena tim'ah na Pasuva. Ihih ti ipav'i lihalm'au. Laha, a Pailat ivr anr arm'ertu a Isrel kavr ti a, “Pavlei, Mlinam'i ra.”

¹⁵ V'eti hir avv'ara eia kavvr ti a, “Palav'i, palav'i kataui arna su lamu.” A Pailat ivr anr kavr ti a, “?Kvrn ti p'etu Mlinam'i arna su lamu?” Arpris lil avvrprani kavvr ti a, “Kam'em', mlin lil uraur ihei asnm'em', v'eti mlin lil a Rum uaki.”

¹⁶ Sarei, itaui al lm'ar kavr anr m'rnur a ti apavtaui arna su lamu. Laha, avlev' a Iesu iv'el.

A Mlin Lil ilal arna su lamu

¹⁷ Kaua su lamu nen kadav'a a nut iamk, avr ti nahan iv'i Su Pt Natei. Arna v'nenar m'ertu a Isrel avr ti iv'i Kulkuta.

¹⁸ Avtaui arna su lamu atlera m'er ardu uraur arru, tv'aln arna m'ldaun, tv'aln arna m'ir nen, a Iesu arna p't nut.

¹⁹ A Pailat iulul a v'nen kinkin kataui eia arna su lamu. V'nen lera ivr ti a, “A Iesu, iv'i Du a Nasaret, kav'i Mlin Lilar M'ertu a Isrel.”

²⁰ M'ertu a Isrel avstudau avla v'nen lera, sena ti nut avtau a Iesu arna su lamu imima asn v'anu lil. V'nen lera aulul ani arna v'nen a Isrel m'a v'nen a Kris m'a v'nen a Rum.

²¹ Sena si lera arpris lilar arm'ertu a Isrel avvr an a Pailat kavvr ti a, “Maulul kavr ti iv'i Mlin lilar m'ertu a Isrel, v'eti pulul kavr ti hin ivr ti iv'i mlin lilar m'ertu a Isrel.”

²² A Pailat ivrpranr kavr ti a, “Si kana nulul ani ntulul sarei ani.”

²³ M'rnur avtau a Iesu arna su lamu, sarei kavlev' klusan kavpirani a nut iv'a, kavsvsani anr m'rnur udlani. Laha, kavlev' klus p'arian. Klusan lera ani ip'arei uaki iamk, ahaspspi arna nut kinkin.

²⁴ Arm'rnur avvrvr a hir kavvr ti a, “M'aviausi, ip'as a ti p'vhlhalei kavrndu ti ipav'i nkan ak.” Avvr si lera kavani ti sei Paivul ivri ima katu hin, kavr ti a, “Avsvsen klusak, kavhlhala heiak.” Laha, m'rnur avan si udlani lera.

“Palei, a uniam.”

²⁵ Ihih su lamu nen a Iesu tav'et kinkin avp'tir, avv'i a unian m'a tv'aln a unian m'ei a Meri, iv'i a naun a Klupas, m'ei a Meri, iv'i tav'et a Maktala.

²⁶ Naran a Iesu ilei a unian m'a m'ertuan iamk la hin ilap'as ani ha, ivr an a unian kavr ti a, “Tav'et, palei a natm ra.”

²⁷ Sarei, ivr a m'ertuan lera kavr ti a, “Palei, a uniam ra.” Itudina hin naran lera a ti m'ertuan lera ilav'i ima kalak al nmahan.

M'ienen a Iesu

²⁸ Sarei, a Iesu irndu ti ihiris a parian udlani, laha ivr ti a, “Kana nrn navak.” Ivr si lera a ti sei Paivul ivri ipama katu hin.

²⁹ Putel iamk, naui haau iter a nln, iter atlera. Laha, avlev' kalik kinkin kavdai a naui haau kavtau arna nai iamk iv'i isup, kavuei iv'a eia kavtau arna pnn a Iesu.

³⁰ Naran a Iesu ilev' naui haau lera ivr ti a, “!Ithiris dau!” Sarei, ptn iaul. Laha, itum'alet a m'im'iln kadam'a.

M'rnur iva tv'eliel na kln a Iesu

³¹ Laha, dui lilil a Isrel avmiman an a Pailat a ti aparpus tlr a ti apalev'lar, sena ti napn lera iv'i napn avandedp' si udlani sena Sapat. Imahei ti p'ak m'ertu ipalal arna su lamu arna Sapat, sena ti Sapat lera iv'i terlil nen.

³² Laha, m'rnur avrama kavrpus tl tv'el m'ertu ataui arna su lamu m'ei a Iesu, sarei tv'aln.

³³ V'eti naran avrama asn a Iesu kavla ti itam'a sarei, ahavrpus tln.

³⁴ V'eti m'rnur iamk asnr iva tv'eliel na kln a Iesu a namas. Iv'amk m'a ti din m'a nauei ima aut.

³⁵ M'ertu iamk ila si lera kavrp'ep'ei, karndu mamh ti sei ivri iv'i v'nen dau, a ti kam'i pavv'ahi.

³⁶ Sena ti avan si lera a ti sei Paivul ivri ipama katu hin kavr ti a, “Akavrpus sun ki ikamk.”

³⁷ Paivul ivri ml arna nut uraur kavr ti a, “Apavp'a M'ertu la atvvei ha.”

Atin a Iesu al navapan a Susev', iv'i dui Arimatia

³⁸ Itauatah a si lera, hin a Susev', iv'i dui Arimatia, ima asn a Pailat kamiman ani a ti ipam'ahu a ti ipalev'la p'akn a Iesu. Hin a Susev' lera iv'i m'ertuan a Iesu iamk, v'eti itutuani uaki, sena ti idedrn anr m'ertu lilil a Isrel. Laha, a Pailat im'ahu ani. Laha, a Susev' ima kalev'la p'akn a Iesu.

³⁹ Laha, a Nikutimas, iv'i dui ima asn a Iesu lihat itauamu hara, arma m'ei, kaua sei m'in ip'as, avr ti iv'i mir m'a alus auhei, idv kihih kilu inelv'a (40)

⁴⁰ Sarei, arlev'la p'akn a Iesu kartu sida p'as aranan, karnpakari a kalik inep'a nut m'ertu a Isrel avtin m'ertu inap'ei.

⁴¹ Arna nut aluei a Iesu arna su lamu, pitvet iamk iter atlera. Al pitvet lera nut m'dah iamk a ti apatin m'ertu a nln iter, iv'i navap, v'eti adatin m'ertu a nln naran kinkin.

⁴² Laha, artau a Iesu atlera, sena ti napn lera iv'i napn avandedp' si udlani sena ti m'ih nen ipav'i Sapatar arm'ertu a Isrel. Sena ti navap lera imima uaki.