Sun 13 - V'nen P'as iv'i Turanien Trtarep' m'a Turanien M'dah

A Iesu isila tlr m'ertuan

¹ Naran tim'ah na Pasuva idahei, a Iesu itrndu sera ti naran nen itama sarei a ti ipaln nadep' laha kadav'a asn a Tatei. Hin ilap'as a m'ertuan arna nadep' kalap'as anr dav'a ier ti im'a.

² Naran avlak kavhatat, v'eti a Sitan ittu sarei arna nln a Sutas Iskariut, iv'i a natn a Saimun, a ti ipataui al lm'ar m'ertu avlep'lei.

³ A Iesu itrndu sera ti a Tatei ittu sera si udlani al lm'an, karndu ti Hin idan asn Atua, dav'a ti ipam'alet ml asn Atua.

⁴ Laha, kap'tir asn tiv' kahsla klusan kinkin kalev' taul kav'aui.

⁵ Sarei, ilev' dis iamk kahs nauei a nln kasiladina tlr m'ertuan kava tlr, a taul la iv'aui ha.

⁶ Dav'a kaier asn Saimun P'ita. Laha, a P'ita ivr ani, kavr ti a, “?Mlin, inap'i hin ksila tlk?”

⁷ A Iesu ivrprani, kavr ti a, “Hilaha nakm kaarndu sei Kana nani, v'eti ipatauatah parndaui.”

⁸ A P'ita ivr ani, kavr ti a, “!Ikahei!, !Nakm mkasila tlk naran kinkin!” A Iesu ivrprani, kavr ti a, “Ipavr ti Kana nkasila tlm, kaav'i m'ertuak”.

⁹ A Saimun P'ita ivr ani, kavr ti a, “Mlin, masila tlk uaki, v'eti pasila lm'ak m'a ptk.”

¹⁰ A Iesu ivrprani, kavr ti a, “Ipavr ti m'ertu itav sarei, iarn ti ipav ml, v'eti ipasila tln uaki, sena ti itav sarei. Kam'i kvtvav sarei, v'eti iav'i kam'i udlani.”

¹¹ Sena ti Hin itrndu sera m'ertu la ipataui al lm'ar m'ertu avlep'lei ha. Sena si lera ivr ti a, “Iav'i kam'i udlani ktvav sarei.”

¹² Laha, naran itsila sera tlr, iua klusan ml kalak asn tiv' kavr anr kavr ti a, “?Kam'i kvrndu sei nani asm'i?

¹³ Kam'i kvr ti nv'i Tisa, kavvr ti nv'i Mlin. Kvvrdaui, sena ti nv'i si lera.

¹⁴ V'eti ipavr ti Kana, la nv'i Mlinam'i kav'i Tisam'i ha, ntsila sera tlm'i, iviviln a ti kam'i pavsila tlr tv'elm'i.

¹⁵ Sena ti Kana ntv'iv'en sera navanel a kam'i a ti kam'i pavani ipanep'a nut nani asnm'i inap'ei.

¹⁶ Nvrdaui nvr a kam'i, m'ertu na m'akarien ialil kasiv' mlinan. Dui atap'ei ialil kasiv' m'ertu la itap'ei ha.

¹⁷ Ipavr ti kvrndu si lera, kam'i pavrn ipap'as ipavr ti pavani.

¹⁸ Navrur kam'i udlani. Kana nrndu m'ertu ntv'li sarar, v'eti irn ti sei Paivul ivri ipatu hin, ivr ti a, ‘M'ertu nrhan p'ret m'ei itetvan tahn kamlen Kana.’

¹⁹ Nvr si lera a kam'i naran idatu hin, a ti naran ipama katu hin, pavv'ah ti Kana nv'i Dui nen.

²⁰ Nvrdaui nvr a kam'i, ipavr ti m'ertu kinkin ipalev' m'ertu kinkin Kana ntap'ei, hin ilev' Kana. Laha, m'ertu ilev' Kana ilev' M'ertu itep'a Kana.”

A Iesu ivrp'ep'a ti m'ertuan kinkin ipamk ipataui al lm'ar m'ertu avlep'lei

²¹ A Iesu ivr si lera karn istu arna nln kavrp'ep'ei kavr ti a, “Nvrdaui nvr a kam'i, kam'i kinkin ipamk ipatu Kana al lm'ar m'ertu avlep'la Kana.”

²² Laha, arm'ertuan avp'ep'a hir, sena ti ahavrndu ti ivrur a hin ak.

²³ M'ertuan a Iesu ki iamk, la ilap'as ani istudau ha, iv'er arna mrn a Iesu.

²⁴ Sena si lera, a Saimun P'ita iah lm'an ani, a ti ipamiman ani ivrur a hin ak.

²⁵ Laha, dui iv'er arna mrn a Iesu ivr ani, kavr ti a, “?Mlin, iv'i ak?”

²⁶ A Iesu ivrprani, kavr ti a, “Iv'i dui la p'etu tk p'ret ntdi sarei ani ha.” Laha, naran itdi sera p'ret, itau an a Sutas Iskariut, iv'i a natn a Saimun.

²⁷ Naran a Sutas itlev' sera tk p'ret lera, a Sitan iv'a a nln. Laha, a Iesu ivr ani, kavr ti a, “Sei krn ti pani, pani ipalahml.”

²⁸ V'eti m'ertu kinkin ihei asn tiv' irndu sena v'ata ivr si lera ani.

²⁹ A Sutas iua pahus na nav'et. Sena si lera, hir kinkin avv'ah ti a Iesu ivr ani, kavr ti a, “Nakm pul sei nvrni sena tim'ah,” v'aha ivr ti ipatu si kinkin anr m'ertu siar ihei.

³⁰ Iv'amk m'a ti a Sutas ilev' tk p'ret kadav'a av'aran. Laha, nut im't.

V'nen hua m'dah

³¹ Naran itav'a sarei av'aran, a Iesu ivr ti a, “Hilaha Kana, nv'i Net M'ertu, nahak ipav'a eia, nahan Atua ipav'a eia sena Kana.

³² Ipavr ti nahan Atua ipav'a eia sena Kana, Atua uaki ipani ti nahak ipav'a eia. Aau, ipani ti nahak ipav'a eia ipalahml.

³³ Armardel papak, p'elak m'a kam'i ipasusupa mau. Kam'i pavtala Kana, v'eti ipanep'a nut nvr anr m'ertu lililar Isrel inap'ei, kavr ti a, ‘Nut Kana p'av'a, kam'i mkavrama.’ Hilaha nvr a kam'i ml inap'i lera.

³⁴ Kana ntu v'nen hua m'dah a kam'i a ti kam'i pavlap'sp'as a kam'i. Kam'i pavlap'sp'as a kam'i inep'a nut Kana nlap'as a kam'i inap'ei.

³⁵ M'ertu udlani apavrndu ti kvv'i m'ertuak, sena ti kvlap'sp'as a kam'i.”

A Iesu ivrp'ep'a ti a P'ita ipap'ep'ni

³⁶ A Saimun P'ita ivr ani, kavr ti a, “?Mlin, pav'a ip'i?” A Iesu ivrprani, kavr ti a, “Hilaha nakm mkasapa Kana arna nut p'av'a, v'eti ipatauatah pasapa Kana.”

³⁷ A P'ita ivr ani, kavr ti a, “?Mlin, inap'i hin nkasapah hilaha? Kana p'etu silv'ienak sanam.”

³⁸ A Iesu ivrprani, kavr ti a, “?Kvr ti patu silv'ienam sanak? Nvrdaui nvr anh, ntup'el ikdatiter ipaier naran nakm pavri ipav'atl kavr ti kaarndu Kana.