Sun 12 - V'nen P'as iv'i Turanien Trtarep' m'a Turanien M'dah

A Meri iah ueil aranan a Iesu

¹ Laha, a Iesu iv'a a P'etani, naran napn mau ilm'sei iter a ti ipav'i naran na Pasuva. A P'etani lera, iv'i nut a Lasaras im'a, sarei a Iesu iani ti ithal ml arna m'ien.

² Sena si lera avan tim'ah nan a Iesu atlera. Hin a Mata iuirma tim'ah asnr. Naran nen, a Lasaras ip'lt m'er m'ertu avlak m'er a Iesu asn tiv'.

³ Laha, a Meri ilev' ueil kinkin, iv'i pna lita iamk, naha ueil nen iv'i nat, ulien nen ilil istudau. Kahi arna tln a Iesu, kavai a niln. Laha, nmah ilini a m'i ueil lera.

⁴ Laha, m'ertuan ki iamk, nahan iv'i a Sutas Iskariut, iv'i a natn a Saimun, la ipatau a Iesu al lm'ar m'ertu avlep'lei ha, ivr ti a,

⁵ “?Inap'i hin ahaulul a ueil laha kalev' 300,000 vatu aranan katau anr m'ertu siar ihei?”

⁶ Iavr si lera sena ti iv'ahur m'ertu siar ihei, v'eti sena ti iv'i dui na v'nv'nahien kaua naten na nav'et nakl kav'nah nav'et asrani a nln.

⁷ Laha, a Iesu ivr ti a, “Palni, sena ti hin iuada ueil lera dav'a itrah napn apatin Kana aranan.

⁸ Sena ti m'ertu siar ihei apavlak nakl asnm'i, v'eti Kana nkalak ikel m'a kam'i.”

Arpris lil avrn ti apavrpep'n a Lasaras

⁹ Arna naran nen, m'ertu a Isrel avstudau avrn ti ilak atlera, kavrama. Iav'i sanan a Iesu uaki, v'eti sena ti apavlei a Lasaras, la iani ti ithal ml arna m'ien ha.

¹⁰ V'eti arpris lil avp'lt kavtala a navanel na ti apavrpep'n a Lasaras ml.

¹¹ Sena ti m'ertu a Isrel avstudau avlnr kavrav'a kavv'ah a Iesu sanan a Lasaras.

Nelnal avspsapa alan a Iesu naran ima a Serusalem

¹² M'ih nen, m'ertu avstudau, la avrama sena tim'ah na Pasuva ha, avrn v'nen a ti a Iesu ipama a Serusalem.

¹³ Kavlev' ru m'tu kavv'el a ti apavlei, kavv'ara kavvr ti a, “Atua, palev'la kam'em'. P'vpata Mlinar m'ertu a Isrel la ima arna nahan a Mlin Eia ha.”

¹⁴ Laha, a Iesu ipasla net tuki iamk kalak aranan, inep'a nut Paivul ivri inap'ei kavr ti a,

¹⁵ “Mavdedrn kam'i a Saiun, pavlei, a Mlinam'i ima kalak arna net tuki.”

¹⁶ Arm'ertuan a Iesu ahavrndu si lera itauamu, v'eti naran a Iesu itua sera si p'sp'asan, hir avv'ahur ti Paivul ivrur si lera kavv'ahur ti aten sera si lera ani.

¹⁷ M'ertu avlak m'ei a Iesu naran iv'ara an a Lasaras a ti ipadan al navap kani ti ithal ml arna m'ien, avvrur si lera dav'a.

¹⁸ Sena si lera nelnal avspsapa alan a Iesu, sena ti avrn ti Hin ien pari lil lera.

¹⁹ Laha, arvarisi avvr a duanar kavvr ti a, “Pavlei, kaavan si kinkin. Nelnal arna nadep' avsapei.”

M'et na uit ipam'a pr, laha katu navan

²⁰ M'ertu a Kris kinkin avlak m'er m'ertu la avrama a ti apavpatei Atua arna tim'ah na Pasuva ha.

²¹ M'ertu lera avrama asn a P'iliv', iv'i dui a Petsaita arna nut a Kalili, kavmiman ani kavvr ti a, “Mlin, nvrn ti p'vlei a Iesu.”

²² A P'iliv' iv'a kavr si lera an Adru, sarei Adru m'ei a P'iliv' arvr an a Iesu.

²³ Laha, a Iesu ivrpranr kavr ti a, “Hilaha naran nen itama sarei a ti Kana, nv'i Net M'ertu, nahak ipav'a eia.

²⁴ Nvrdaui nvr a kam'i, ipavr ti m'et na uit ikahrs a nadep' kadam'a, ipater mamk uaki, v'eti ipavr ti ipam'a, navan ipastudau.

²⁵ M'ertu ilap'as a silv'ienan hin ipakasmni, v'eti m'ertu ilep'la silv'ienan arna nadep' ka, hin ipauadei dav'a ikahiris naran.

²⁶ Ipavr ti m'ertu kinkin ipam'akarak, iksapa Kana pr, laha m'ertu na m'akarienak ipalak arna nut Kana p'elak. Ipavr ti m'ertu kinkin ipam'akarak, hin a Tatei ipani ti nahan ipav'a eia.

A Iesu ivrur ti ipam'a arna su lamu

²⁷ Hilaha nrn istu arna nlk. ?P'evr v'ata? ?P'evr ti a, Tatei, palev'la Kana arna der ipatu hin arna naran laha? Ikahei, sena ti Kana nma arna nadep' a ti der na naran laha ipaier Kana.

²⁸ Tatei, pani ti naham ipav'a eia.” Laha, nadl iamk idan eia kavr ti a, “Kana nten sera nahak itav'a eia, p'ani ti ipav'a eia ml.”

²⁹ Naran m'ertu la avp'tir mima ha avrn si lera, avvr ti nav'l iv'l. M'ertu kinkin uraur avvr ti a, “Ensel kinkin iamk iv'ana m'ei.”

³⁰ A Iesu ivrpranr kavr ti a, “Nadl lera iahma sena Kana, v'eti ima sanam'i.

³¹ Hilaha iv'i naran Atua ipav'ana hua m'er m'ertu arna nadep'. Hilaha Atua ipasran mlin lil na nadep' ka.

³² Laha, naran apatu Kana eia na nadep', Kana p'erv' m'ertu udlani apavrama asnk.”

³³ Naran ivr si lera, iv'iv'en nut ipam'a ipanap'ei.

³⁴ Laha, arm'ertu avvrprani kavvr ti a, “Nvrn ti Paivul ivr ti a Kristu ipalak dav'a ikahiris naran. ?Inap'i hin kvr ti a, Aktu Net M'ertu eia pr? ?Net M'ertu lera iv'i ak?”

³⁵ Laha, a Iesu ivr anr kavr ti a, “Nut ren ipater asnm'i ipasusupa uaki. Pavv'el naran nut iren, imahei ti m'alk ipauakar kam'i. Sena ti m'ertu iv'el m'alk ikarndu nut ipav'el.

³⁶ Naran nut iren uam asnm'i, pavv'ah nut ren, a ti kam'i pavrama kavv'i net nut ren.” A Iesu ivr si lera karuh katutuah anr.

M'ertu a Isrel avstudau ahavv'ah a Iesu

³⁷ Hin iten sera pari lilil istudau asnr, v'eti ahavv'ahi.

³⁸ Iani ti v'nenan Aisaia, iv'i pruvet, ima katu hin asnr, ivr ti a, “?Mlin Eia, hin ak iv'ah v'nenam'em', a Mlin Eia iv'iv'en nut huan an a hin ak?”

³⁹ Sena si lera ahavrndu ti apavv'ahi, sena ti Aisaia ivri ml kavr ti a,

⁴⁰ “Hin iani ti m'atar iala sei ml, kani ti nlr ima kahua, a ti akavla si kinkin a m'atar v'aha akavrndu si kinkin arna nlr, kavvav v'ahienar a ti Kana p'emhmah anr.”

⁴¹ Hin Aisaia ivr si lera naran ila si p'sp'asan kavruri.

Pav'el arna nut ren

⁴² V'eti mlin lilil avstudau asnr avv'ahi, v'eti ahavvrp'ep'ei, sena ti avdedrn anr Varisi, imahei ti apavsranr arna sasar m'ertu a Isrel.

⁴³ Sena ti hir avrn ip'as a ti m'ertu apavpatar isiv' ti Atua iparn ipap'as anr.

⁴⁴ A Iesu iv'ara eia kavr anr kavr ti a, “Naran m'ertu iv'ah Kana, iav'ah Kana uaki, v'eti iv'ah Hin la itep'a Kana ha.

⁴⁵ M'ertu ila Kana, ila M'ertu la itep'a Kana ha.

⁴⁶ Kana nma kav'i nut ren arna nadep', a ti m'ertu iv'ah Kana ikalak ml al m'alk.

⁴⁷ Ipavr ti m'ertu kinkin irn v'nenak, v'eti iav'ahi, Kana nav'ana hua m'ei, sena ti nahma a ti p'ev'ana hua m'a m'ertu arna nadep', v'eti nma a ti p'elev'la m'ertu arna nadep'.

⁴⁸ M'ertu la iav'ah v'nenak kamlen Kana ha, M'ertu iamk iak a ti ipav'ana hua m'ei. V'nen ntvr sarei, v'nen lera ipav'ana hua m'ei arna napn ipatauatah dau.

⁴⁹ Sena ti v'nenak iahandan asnk uaki, v'eti a Tetiak, la itep'a Kana ha, hin iv'iv'en a Kana nut p'ev'ana ipanap'ei, m'a sei p'evrp'ep'ei.

⁵⁰ Kana nrndu ti v'nen huan iv'i silv'ien ikahiris naran. Sena si lera, si udlani nvri, nvri inep'a nut a Tatei itvr sarei a Kana inap'ei.”