Sun 10 - V'nen P'as iv'i Turanien Trtarep' m'a Turanien M'dah

A Iesu iv'i M'ertu dau ip'aur sivsiv

¹ Nvrdaui nvr a kam'i, ipavr ti m'ertu kinkin iahandan al pn liu na naml na sivsiv, v'eti ihap'r dan arna navanel uraur, m'ertu lera iv'i m'ertu na v'nv'nahien kutakm a m'ertu a ti ipalev' siar.

² V'eti m'ertu ima dan arna pn liu, hin iv'i m'ertu ip'aur sivsiv.

³ Dui ip'aur pn liu iela liu sanan. Sivsiv avv'rn a drln. Hin iv'ara nahar sivsivan udlani, kav'av'ar avrama av'aran.

⁴ Naran iani ti sivsivan udlani avrama av'aran, hin iv'av'ar, sivsivan avsapei, sena ti avrndu drln.

⁵ Hir akavsapa v'anudl kinkin, v'eti apavruh asnn, sena ti ahavrndu drlr v'anudl.”

⁶ A Iesu isran v'nen lera asnr, v'eti ahavrndu sei ivr anr.

A Iesu iv'i pn liu kav'i M'ertu p'as na sivsiv

⁷ Laha, a Iesu ivr anr ml kavr ti a, “Nvrdaui nvr a kam'i, Kana nv'i pn liu na sivsiv.

⁸ M'ertu udlani avtauamu a Kana avv'i m'ertu na v'nv'nahien kavutakm a m'ertu a ti apavlev' siar, v'eti sivsiv ahavv'rn anr.

⁹ Kana nv'i pn liu. Ipavr ti m'ertu kinkin ipav'alet dan asnk, Atua ipalev'la si stuan, laha hin ipama eim kadav'a av'aran kapasla nina.

¹⁰ M'ertu na v'nv'nahien ima sena si iamk uaki, a ti ipav'nah sei karpep'n m'ertu kutakm a sei. V'eti Kana nma a ti p'etu silv'ien anr, la ipalini a si p'as ha.

¹¹ Kana nv'i m'ertu p'as np'aur sivsiv. M'ertu p'as ip'aur sivsiv itu silv'ienan sena sivsiv.

¹² V'eti m'ertu auli uaki sena ti ipap'aur sivsiv, la sivsiv iav'i nkan ha, hin ipaln sivsiv uaki karuh naran ipala ti lip'ah didi ima. Laha, lip'ah didi ipahada ki, nki apavamkma.

¹³ M'ertu auli a ti ipap'aur sivsiv iparuh uaki, sena ti auli uaki, hin iav'ahur sivsiv.

¹⁴ Kana nv'i M'ertu p'as np'aur sivsiv. Kana nrndu sivsivak, sivsivak avrndu Kana.

¹⁵ Kana nrndau a Tetiak inap'i laha, inep'a nut a Tetiak irndu Kana inap'ei. Kana ntu silv'ienak sena sivsiv.

¹⁶ Sivsivak uraur iak, la ahavlak al naml laha. Kana nklav'r pr. Hir ml apavrn drlk, sarei sivsivak udlani apavp'lt kavamk. M'ertu ip'aurr ipamk uaki.

¹⁷ Sena si lera a Tetiak ilap'as a Kana, sena ti ntu silv'ienak, sarei ti p'elav'i ml.

¹⁸ M'ertu kinkin ialev'lei asnk, v'eti Kana uaki ntaui. Nut huak iak a ti p'etaui, nut huak iak a ti p'elav'i ml. A Tetiak ittu sera parei lera a Kana a ti p'ani.”

¹⁹ V'nen lera iani ti ardu a Isrel avtupr hir ml.

²⁰ Laha, hir avstudau avvr ti a, “M'im'iln stu ilak a nln, ididilin. ?Kvv'rn ani sena v'ata?”

²¹ M'ertu kinkin uraur avvr ti a, “V'nen lera iav'i v'nena m'ertu m'im'iln stu ilak a nln. ?M'im'iln stu irndu ti ipani ti m'etapis ipala sei ml ipanap'i?”

A Iesu irndu sivsivan

²² Dav'a ier naran m'ertu a Isrel avan tim'ah arna nut a Serusalem kavv'ahur naran aiela liu na nmah tamatar ml tituei. Naran nen iv'i naran na m'la.

²³ A Iesu iv'el a nl naml na nmah tamat al vrada iamk avr ti iv'i vradan a Sulumun.

²⁴ Laha, ardu a Isrel kinkin avrama kavlaktalu ani, kavvr ti a, “?Pani ti p'vtrah sei dav'a dav'a ipaier v'aran? Ipavr ti kv'i a Kristu, pavr mamh a kam'em'.”

²⁵ A Iesu ivrpranr kavr ti a, “Kana ntvr sarei a kam'i, v'eti kaavv'ahi. Parei la nani arna nahan a Tetiak ha, ivrp'ep'a Kana.

²⁶ V'eti kam'i kaavv'ah Kana, sena ti kaavv'i sivsivak, inep'a nut ntvr sarei a kam'i inap'ei.

²⁷ Sivsivak avv'rn a drlk. Kana nrndaur, hir avsapa Kana.

²⁸ Kana ntu silv'ien ikahiris naran anr, hir akavmln naran kinkin, m'ertu kinkin ikalev'lar al lm'ak.

²⁹ A Tetiak la itaur al lm'ak ha, Hin ilil kasiv' m'ertu udlani. M'ertu kinkin ikalev'lar al lm'an a Tetiak.

³⁰ Kana m'ei a Tetiak nramk.”

Ardu a Isrel avrn ti apavhmhr a Iesu ml

³¹ Sena si lera, ardu a Isrel avlev' nav'et ml a ti apavmhri.

³² A Iesu ivr anr kavr ti a, “Ntv'iv'en sera pari p'as inelnal a kam'i, iaan asn a Tetiak. ?Pavmhr Kana sena parei lera ki v'ata?”

³³ Ardu a Isrel avvrprani kavvr ti a, “Nkavmhrh sena pari p'as kinkin, v'eti sena ti ksip'len Atua, sena ti Nakm kv'i M'ertu uaki kanh kv'i Atua.”

³⁴ A Iesu ivrpranr kavr ti a, “Nsarei v'nen huam'i ivr ti a, ‘Kana ntvr sera ti a, “Kam'i kvv'i atua.” ’

³⁵ Ipavr ti Paivul ivr ti m'ertu, la v'nenan Atua ima asnr ha, hir avv'i atua, v'eti mkavkapr v'nen arna Paivul.

³⁶ ?Ipavr ti Paivul ivri inap'i lera, inap'i hin kam'i kvvr ti Kana, la a Tatei ittu sera Kana a ti p'ama arna nadep' ha, nsip'len Atua, sena ti nvr ti Kana nv'i a Natn Atua?

³⁷ Ipavr ti naan parian a Tetiak, mavv'ah Kana.

³⁸ V'eti ipavr ti nani, pavv'ah pariak, ipavr ti mkavv'ah Kana. A ti pavrndaui kavv'ah ti a Tetiak ilak a nlk, Kana nlak a nln.”

³⁹ Sena si lera avrn ti apavuadei ml, v'eti Hin iruh asnr.

M'ertu istudau avv'ah a Iesu arna tv'eliel na nauei a Surtan

⁴⁰ Laha, iln v'anu lera kadav'a a tv'eliel na nauei a Surtan kadama arna nut a Sun ien paptais itauamu kalak atlera.

⁴¹ Laha, m'ertu avstudau avrama asnn kavvr ti a, “Hin a Sun iahan pari lil kinkin, v'eti si udlani a Sun itvr sarei itauamu ivrdaui kavrp'ep'ei Aulaha.”

⁴² Laha, naran ilak atlera, m'ertu istudau avv'ahi.