Sun 1 - V'nen P'as iv'i Turanien Trtarep' m'a Turanien M'dah

V'nenan Atua ilak itauamu dau

¹ Itauamu dau, V'nenan Atua ilak. Hin ilak m'ei a Mlin Eia kav'i Atua.

² V'nen lera ilak m'ei a Mlin Eia kav'i Atua, naran nadep' idatu hin.

³ Hin ien si udlani. Arna si udlani itu hin, si kinkin ihei Hin iahani.

⁴ Hin silv'ien ilak a nln. Silv'ien nen iv'i nut renar m'ertu.

⁵ Nut ren lera iren al m'alk, m'alk iauakari.

A Sun Paptais ivrp'ep'a Nut Ren Dau

⁶ Atua itep'a dui ki iamk, nahan iv'i a Sun.

⁷ Hin ima kav'i v'nen a ti ipavrp'ep'a Nut Ren, sena ti arm'ertu apavrn v'nenan kavv'ahi.

⁸ Hin iav'i Nut Ren lera, v'eti iv'i dui uaki ivrp'ep'a Nut Ren lahara.

⁹ V'nen lera iv'i Nut Ren dau, la ier asnr m'ertu udlani avrama arna nadep' ha.

¹⁰ Hin ien nadep' ka, v'eti naran ilak aranan, m'ertu udlani ahavrndaui.

¹¹ Hin ima arna utan v'eti arm'ertu a utan ahavrn ti apavlav'i.

¹² V'eti m'ertu udlani la avlav'i ha, Hin itu nut hua anr a ti apavrama kavv'i a natn a Mlin Eia, avv'i hir udlani la avv'ah nahan ha.

¹³ Hir ahaviak arna di a uniar m'ei a tetiar, v'aha sena ti p'ak m'ertu irni, v'aha sena ti dui nen irni, v'eti sena ti Atua iani ti itu hin.

V'nenan Atua ima kav'i m'ertu

¹⁴ V'nen lera ima kav'i m'ertu kalak m'a kam'em'. Kam'em' ntvla sera si p'sp'as udlanian. Si p'sp'as udlani lera iv'i nkan, sena ti Hin uaki iv'i a Natn a Tatei kamk, kaiak asnn kalini a vtmien m'a v'nen dau.

¹⁵ Hin a Sun ivrp'ep'ei kav'ana eia kavr ti a, “Aulaha iv'i Dui la ntvrur sarei hara, naran nvr ti a, ‘Dui la ipama ipatauatah a kana, Hin ipalil kasiv' kana, sena ti ilak naran kana ndahiak.’ ”

¹⁶ Hin ilini a si p'as. Nakd udlani nvlev' vtmien dav'a dav'a asnn.

¹⁷ Sena ti nvlev' v'nen hua asn a Musis, v'eti nvlev' vtmien m'a v'nen dau asn a Iesu Kristu.

¹⁸ M'ertu kinkin idamulelei Atua, v'eti a Natn uaki iamk la ilak mima asn a Tetian ha, Hin iv'iv'ani.

Nadl iv'ana arna nut kaka

¹⁹ Si laha iv'i v'nenan a Sun naran ardu lilil a Isrel avtep'a pris kinkin m'er dui kinkin avv'i Livait, avaan a Serusalem a ti apavmiman ani kavvr ti a, “?Nakm kv'i ak?”

²⁰ Hin iamamih v'eti ivrp'ep'ei kavr ti a, “Kana nav'i a Kristu.”

²¹ Laha, avmiman ani kavvr ti a, “?Kv'i a hin ak? ?Kv'i a Ilaitsa?” Ivr ti a, “Ihei, nav'i hin.” “?Kv'i pruvet lahara?” Hin ivr ti a, “Ihei.”

²² Sena si lera avvr ani kavvr ti a, “?Kv'i ak, sena ti p'vrndu ti p'vuirv'a prien nen asnr arm'ertu avtep'a kam'em'? Pavrurh, kv'i ak?”

²³ Ivr ti a, “Kana nv'i nadl iv'ara eia arna nut kaka, ‘Pavan mamh alan a Mlin Lilad’ inep'a nut Aisaia, iv'i pruvet, ivri inap'ei.”

²⁴ Ardu la avtap'er ha avv'i Varisi.

²⁵ Avmimani kavvr ti a, “?Inap'i hin nakm kan paptais a m'ertu, ipavr ti kaav'i a Kristu, v'aha a Ilaitsa, v'aha pruvet lahara?”

²⁶ A Sun ivrpranr kavr ti a, “Kana nen paptais a nauei. V'eti Dui iamk ip'tir a p't nut nam'i, kam'i kaavrndaui.

²⁷ Hin ima itauatah a kana kalil kasiv' kana. Kana naviviln a ti p'eiaul kahsla sitrav na susan.”

²⁸ Si lera itu hin arna nut a Petapara a tv'eliel na nauei a Surtan, iv'i nut a Sun ien paptais nakl.

Sivsivan Atua

²⁹ M'ih nen a Sun ilei a Iesu iv'el dama asnn, sarei kavr ti a, “Pavlei, Sivsivan Atua hilera, ipalev'la si stuar nelnal arna nadep'.

³⁰ Hin iv'i Dui la ntvrur sarei hara kavr ti a, ‘Ipatauatah a kana Dui ipamk ipama, ipalil kasiv' kana, sena ti Hin ilak, naran kana ndaiak.’

³¹ Kana naledaui, v'eti nma kan paptais a nauei, sena ti p'ev'iv'ani asnr m'ertu a Isrel.”

³² A Sun ivruri ml kavr ti a, “Ntla sera M'im'iln Atua ima dan arna nut Eia kanep'a sera navimar kalak aranan.

³³ Kana narndaui itauamu, v'eti Atua la itep'a kana a ti p'en paptais a nauei ha, itvr sarei a kana kavr ti a, ‘Dui la pala M'im'iln P'as ipaan eia kalak aranan ha, Hin iv'i nki ipan paptais a M'im'iln P'as.’

³⁴ Kana ntla sarei kavrp'ep'ei a ti Dui lera iv'i a Natn Atua.”

Dui arru arma karv'i m'ertuan a Iesu

³⁵ M'ih nen ml a Sun ip'tir m'er m'ertuan arru,

³⁶ kap'ei a Iesu ti Hin iv'el kadama, sarei kavr ti a, “Pavlei, Sivsivan Atua hilera.”

³⁷ Arm'ertuan arru lahara arrn v'nen lera karsapei a Iesu.

³⁸ Sarei, a Iesu iklup'la kala ti arsapei kavr anr kavr ti a, “?Krtala a v'ata?” Arvr ani karvr ti a, “?Rapai” (v'nen lera iv'i tisa), “utam iter ip'i?”

³⁹ Ivr anr kavr ti a, “Parma karlei.” Laha, arv'a karla nut ilak karlak m'ei arna napn lera, sena ti itv'i sera m'etaneiel iv'a knarev'.

⁴⁰ Hir ki iamk la arrn v'nenan a Sun hara karsapei, nahan iv'i Adru, titiatah nan a Saimun P'ita.

⁴¹ Hin ipasla tv'aln iv'i a Saimun itauamu, kavr ani, kavr ti a, “Ntvpasla sarei a M'isaia” (v'nen lera iv'i a Kristu).

⁴² Hin iv'av'ei a Saimun iv'a asn a Iesu. A Iesu ip'ei kavr ani, kavr ti a, “Nakm kv'i a Saimun, a natn a Suna. V'eti naham ipav'i a Sivas,” (v'nen lera iv'i a P'ita, inep'a ti iv'i nav'et).

A P'iliv' m'ei a Nataniel arma karv'i m'ertuan a Iesu

⁴³ M'ih nen a Iesu irn ti ipav'a arna nut a Kalili, sarei kapaslei a P'iliv' kavr ani, kavr ti a, “Pasapa Kana.”

⁴⁴ A P'iliv' iv'i dui a Petsaita, arna v'anuan Adru m'ei a P'ita.

⁴⁵ A P'iliv' ipaslei a Nataniel kavr ani, kavr ti a, “Ntvpasla sera dui la Musis ivruri arna v'nen hua, la pruvet avvruri hara. Hin iv'i a Iesu, dui a Nasaret, a natn a Susev'.”

⁴⁶ V'eti a Nataniel ivr ani, kavr ti a, “?Inap'i? ?Si p'as kinkin irndu ti ipaan a Nasaret?” A P'iliv' ivr ani, kavr ti a, “Dahma kalei.”

⁴⁷ A Iesu ilei a Nataniel iv'el dama asnn kavruri kavr ti a, “Pavlei, dui dau a Isrel iamk, la ikahap'il naran kinkin ha.”

⁴⁸ A Nataniel ivr ani, kavr ti a, “?Inap'i hin krndu kana?” A Iesu ivr ani, kavr ti a, “Kana nlah, naran a P'iliv' idav'ara anh, naran kdlak uam a nv' p'alak.”

⁴⁹ A Nataniel ivrprani, kavr ti a, “Tisa, kv'i a Natn Atua, kv'i Mlin Lil a Isrel.”

⁵⁰ A Iesu ivrprani, kavr ti a, “?Nakm kv'ah Kana sena ti nvr ti nlah naran klak a nv' p'alak? V'eti nakm pala sei ipalil ipasiv' si lera.”

⁵¹ Laha, ivr ani ml kavr ti a, “Nvrdaui nvr a kam'i, pavla p'knaran ipaiela hin kavlar enselan Atua apavrav'a eia kavrama a nadep' aranak, nv'i Net M'ertu.”