Suil 2 - V'nen P'as iv'i Turanien Trtarep' m'a Turanien M'dah

Napnan a Mlin Eia

¹ !Paviv natav arna nut a Saiun, kavv'ana eia a ti m'ertu apavandedp' hir arna mrnut p'asak! Arm'ertu udlani avlak arna v'anu apavvrdedrn, sena ti napnan a Mlin Eia itv'i ti ipama, aau, ipama ra.

² Napn lera ipav'i napn na m'alk, kav'i napn na ieneiev'. Ipav'i napn na p'knaran, kav'i napn na ti m'alk ipatukar sei, aau, ipanep'a sera naran p'knaran na m'etav'aran itukarr ptha lilil. Arm'ertu apavrama, apavhuet kavlilet, adamulela m'ertu inap'i lera naran kinkin. Sarei, arm'ertu lera akaviak arna nadep' ml naran kinkin, aau, pai ipastudau apavv'siau, v'eti akalar m'ertu ipanap'i lera ml.

³ Nap' ipamk ipalev'la sei arna nahr. Sarei, nap' iak a tahr. V'anu iter arna nahr inep'a sera pitvet a Iten, v'eti a tahr, inep'a sera nut kaka, m'ertu ihei. Nvrdaui, si kinkin ikaruh asnr m'ertu lera.

⁴ Naran ap'ar, ala ti avnep'a sera hus. Aau, avvrvr kavnep'a sera hus, la irndu ti ipavrvr ipalahml ha.

⁵ Kat na naurar avkakar, avsihavs kavluvn a mrnut. Drlr inep'a sera nap' lil, la ilev'la nina m'lih ha, aau, inep'a sera naran m'ertu hua avp'lt a ti apavan naur.

⁶ Arm'ertu avrn istuet arna p'akr naran avp'tir arna nahr m'ertu lera. Laha, nahr m'ertu avram't sanar.

⁷ Avvrvr kavnep'a sarar ardu hua, aau, avhapr a naml kavnep'a sarar m'rnur. Hir udlani p'sev' avv'el mamh kavnap'ar m'rnur, ahavruh arna navanel ki.

⁸ Ahavtp' hir arna navanel, ihei, avv'el kavspsapa hir uaki nakl. Ipavr ti su naur kinkin ipani ti hir kinkin apavrars a nadep', v'eti apavv'el uam.

⁹ Avvrvr a ki laha, kavvrvr a ki lera, arna v'anu lil. Avvrvr arna nut eia na naml hua lil, avhapr kavrav'a eim al nmah, aau, avrav'a eim dan al uidua nakl, inep'a nut m'ertu iv'nah sei nakl iani inap'ei.

¹⁰ Laha, nadep' idudul arna nahr, liha masamas ivrdedrn. Sarei, neiel m'a nal arma karm't, msi ahaver inep'a nut avani itauamu.

¹¹ A Mlin Eia ipav'ana arna nahr m'rnuran, sena ti nut avhl nmah kanuisar aranan ililet. M'ertu ien sei ivri iv'i M'ertu hua iamk. Sena ti napnan a Mlin Eia iv'i napn lil iamk, apadedrn ani ipastudau. ?Hin ak ipap'tir arna napn lera?

A Mlin Eia iv'ara anr m'ertu, a ti apavrn istu a si stuar

¹² Laha, a Mlin Eia iv'ana, kavr ti a, “Sena si lera, nvrdaui, pavvav kam'i m'a nlm'i udlani. Aau, pavln tim'ah, kavvalau, kavtakal.”

¹³ Ipanap'i lera, Paviapr nlm'i, maviapr klusam'i. Pavm'alet asn a Mlin Eia, iv'i Atuam'i, sena ti Hin ilap'as a m'ertu, karn istu a m'ertu nakl. Nln iahrer ilahml, aau, ien si p'as a m'ertu. Ivav hin nakl, a ti ikautakm a m'ertu.

¹⁴ ?Hin ak irndu ti ipavav Hin kam'alet, kaln si p'as iamk a tahn naran iv'el--nsarei ipaln uit a ti ipav'i uvrin ipamk, v'aha nauei kinkin, a ti apavv'i uvrin ipamk--sanan a Mlin Eia, iv'i Atuam'i?

¹⁵ Piv natav a Saiun. Pataui ti arm'ertu apavln tim'ah, sarei kavp'lt arna nahn Atua.

¹⁶ Pav'ara anr m'ertu, aau, pani ti apavandedp' hir a ti apavp'as arna nahn Atua. Pani ti arm'ertarep' apavp'lt, kani ti armardel m'er arki avnunu uam apavrama. Dui ien lheien ipaln m'lna m'ertu kav'el, sarei, tav'et ien lheien iparuh arna nut itu klusan nakl.

¹⁷ Sarei, arpris, la avm'akar arna nahn a Mlin Eia ha, apavvalau a p't nut na vrada m'a tiv' na sakrivais. Laha, apavvr ti a, “U Mlin Eia, pam'ahu a ti arm'ertuam apavsilv'. Mam'ahu a ti m'ertu apavsip'lanr a natm, la avv'i nkam ha. Mam'ahu a ti v'anudl apavv'i mlinar. ?Kv'ah ti ipap'as a ti arm'ertu apavvr ti a, ‘Atuar hin ip'i?’?”

Nadep' ipama kap'as ml

¹⁸ Naran lera, a Mlin Eia nln ipap'ausus v'anuan, iparn istu anr m'ertuan.

¹⁹ A Mlin Eia ipavrpranr m'ertuan, kavr ti a, “Palei, Kana p'etep'a uit m'a naui m'iel m'dah, m'a ueil asnm'i. Laha, si lera nakl ipani ti pavrapd. Laha, p'ani ti mkavv'i sei arm'ertu na v'anu apavsip'lani nakl.

²⁰ Aau, p'elev'la kam'i asnr m'rnur na Nut, pavlak v'iv'a au anr. Sarei, p'etp'ev' m'ertu lera, ipav'a arna nut kaka, iv'i nut si kinkin ihei aranan. Nahn ipap'a nata arna Is, nata arna Ues ipater a tahn. Laha, m'i stuan ipaiak, aau, m'in, la istuet ha, ipama eia, sena ti iten sera si stu lil istudau.”

²¹ U nadep', madedrn. !Parn ip'as, aau, parn ip'eset, sena ti a Mlin Eia iten sera sei apatah ani ipastudau!

²² Kam'i, arsi dm na lili, mavdedrn, sena ti nina arna m'lden avrama eia ra. Laha, nai avtu navar, p'alak m'a nahau avrama kavhua ra.

²³ Kam'i arm'ertu a Saiun, pavrn ip'as, aau, pavrn ipap'as an a Mlin Eia, iv'i Atuam'i, sena ti ittu sera nu arna naran itauamu, iani iviviln. Hin ipani ti nu ipau sanam'i--nu ipama ipatauamu m'a nu ipama ipatauatah, ipama arna nal itauamu pr.

²⁴ Laha, nmah aldan uit a nlr apavlini a uit. Sarei, nut atu naui m'iel m'dah m'a ueil apavlini dav'a ti apavrarev'.

²⁵ Ipanap'i lera, p'etum'alet a sei tapat (la itetv ha), m'a tapat (la ivrvr arna nadep' ha), m'a tapat (la ihan si udlani ha), m'a tapat (la iha sei ha), atvhan sarei--la avv'i m'rnurak la nttep'a sarei asnm'i ha.

²⁶ Laha, pavhan tim'ah ipastudau kavrapd, sarei pavpata nahan a Mlin Eia, iv'i Atuam'i. Hin itmhmah sarei a kam'i istuduet. Laha, mertu kinkin akavani ti arm'ertuak apavmamih ml naran kinkin.

²⁷ Naran lera pavrndu ti Kana nlak a p't nut na v'anu a Isrel. Kana nv'i a Mlin Eia, kav'i Atuam'i, nki uraur ihei. Aau, mertu kinkin akavani ti arm'ertuak apavmamih ml naran kinkin.

M'im'iln Atua

²⁸ Laha, ipatu hin ipatauatah, Kana p'hsran M'im'ilk ipama aranar m'ertu udlani, laha a netm'i dui m'a tav'et apavvrp'ep'a v'nenan Atua. Malakal asnm'i apavla sei, m'er m'ertarep' asnm'i apavm'atr kavla sei.

²⁹ Aau, arna naran lera p'hsran M'im'ilk ipama aranar dui m'a tav'et na m'akarienak.

³⁰ Kana p'en pari lilil apatah ani arna p'knaran eia, kan pari lilil arna nadep'. P'en nadei m'a nep'v'en m'a ienap'.

³¹ Neiel ipama kadam't, nal ipama kav'i nadei. Sarei, nelnal apavla napn lilan a Mlinad.

³² Laha, arna naran lera, a Mlin Lilad ipalev'la m'ertu udlani apavv'ara a nahan. Sena ti, arna ptha lil a Saiun, m'ei arna v'anu lil a Serusalem, nut lera aparv'i nut Atua ipalev'lar m'ertu arna der, inep'a nut a Mlin Eia itvr sarei inap'ei. Aau, ipalev'la duanar m'ertuan, apavv'i hir la a Mlin Eia ipav'ara anr ha.