Sim'is 5 - V'nen P'as iv'i Turanien Trtarep' m'a Turanien M'dah

Kam'i kvv'i m'ertu siam'i istudau, pavtakal sena der ipama aranam'i

¹ Kam'i la kvv'i m'ertu siam'i istudau ha, nrn ti pavv'rn a v'nenak. Ip'as a ti pavvalau kavtakal sena der ipama aranam'i.

² Siam'i udlani itstu sarei, klusam'i kakrus ithapapri.

³ Kulam'i m'a silvam'i nadei ituei. Nadei lera ipav'iv'en si stuam'i, kaha p'akm'i inep'a ti iv'i nep'v'en. Kvtupien siam'i istudau arna napn itauatah dau.

⁴ Pavrni, drlr m'ertu kam'i kvulr istu kavv'nah pna nav'etar, iv'ara eia, laha, drlr m'ertu atvlev' sera si udlani al pitvetam'i itier sarei asnk, nv'i Mlin na m'rnur udlani.

⁵ Kam'i kvsapa si p'as na nadep' istudau. Kvsran vn a siam'i. Ktvmsnen sera kam'i iel, inep'a ti iv'i napn na sakrivais.

⁶ Kvvr ti m'ertu p'as ien sei hin iahani, kavkap'ni, v'eti m'ertu nen iatukar kam'i.

Pavlak ms kavtrah ti a Mlin Lilad ipama

⁷ Sena si lera, tv'alk, kam'i pavlak ms kavtrah naran a Mlin Lilad ipama. Pavrni, m'ertu ip'aur pitvet itrah si p'as ilaui al pitvet, katrahi ip'arei ipaier naran nu ipau ipatauamu dav'a katrah nu uraur ml.

⁸ Kam'i nlm'i ipap'arei ipanap'i lera, kadaterp'n, sena ti ikap'arei a Mlin Lilad ipama.

⁹ Tv'alk, asnm'i, tv'aln imasip'len tv'aln, imahei ti Atua ipav'ana hua m'a kam'i. Pavrni, inep'a ti Atua ispspa liu ti ipav'ana m'a nakd.

¹⁰ Tv'alk, nrn ti kam'i pavv'ahur arpruvet, la atvv'ana sarei arna nahan a Mlin Eia ha. Hir avv'iv'en nut m'ertu apavlak ms naran der iarr kavlak p'arei a nv'n inap'ei.

¹¹ Pavrni, nakd nvvr ti m'ertu avlak ms naran der iarr avrn ip'as. Ktvrn sera nut a Sup ilak ms naran der iari inap'ei, katvrn sera nut a Mlin Eia imhmah ani naran deran udlani ihiris inap'ei, kavrndu ti a Mlin Eia irn istu istudau a m'ertu, kalini a vtmien.

¹² V'eti tv'alk, eia na si udlani lera, nrn ti p'evr a kam'i a ti mavah lm'am'i kavvr nut eia, v'aha nut arna nadep', v'aha si kinkin uraur. V'eti naran kam'i pavvr aau, iak, naran pavvr ihei, ihei, imahei ti Atua iputakm a kam'i sanan.

Tamat na v'ahien p'as

¹³ Asnm'i, ipavr ti m'ertu kinkin der iari, ipatu tamat. Ipavr ti irn ip'as, ipahai a npin.

¹⁴ Ipavr ti m'ertu kinkin asnm'i im'at, ipav'ara anr elta na sas. Ip'as a ti hir apavtu tamat sanan kavtu ueil aranan arna nahan a Mlin Eia.

¹⁵ Laha, tamat na v'ahien p'as ipalev'la m'ertu im'at. A Mlin Eia ipani ti ipathal ml arna m'etienan. Laha, ipavr ti iten sera si stu kinkin, Atua ipamhmah ani arna si stuan.

¹⁶ Kam'i pavvrp'ep'a si stuam'i kvani m'a kam'i, kavtu tamat sena kam'i a ti pavrv'i. M'ertu p'as, la itu tamat ihua arna v'ahienan udlani ha, tamatan ien sei istudau.

¹⁷ A Ilaitsa iv'i dui v'ahienan inep'a nkad uaki, v'eti itu tamat arna v'ahienan udlani a ti nu imahau, laha, nu iahau dav'a pai itl nal ilm'sei.

¹⁸ Sarei, itu tamat ml. Laha, nu iendan arna p'knaran, dav'a si udlani isi arna nadep' ml.

Ipavr ti m'ertu kinkin ipaln v'nen p'as, pavani ti ipavav v'ahienan ml

¹⁹ Tv'alk, ipavr ti m'ertu kinkin asnm'i ipaln v'nen p'as, v'eti tv'aln ipani ti ipavav v'ahienan ml,

²⁰ hin iparndu ti naran m'ertu kinkin iani ti tv'aln iasapa navanel stuan ml, ilev'la silv'iena m'ertu iamk a ti ikahm'a, katutuan si stu istudau.